വേൾഡ് മലയാളി ഫെഡറേഷൻ ഒമാൻ ചാപ്റ്റർ സംഘടിപ്പിച്ച ഓണാഘോഷം വർണാഭമായി

മസ്‌കറ്റ്: വേൾഡ് മലയാളി ഫെഡറേഷൻ ഒമാൻ ചാപ്റ്ററിന്റെ ഓണാഘോഷം റുവി സി.ബി.ഡി.യിലെ സ്റ്റാർ ഓഫ് കൊച്ചിൻ ബാങ്ക്വറ്റ് ഹാളിൽ വർണാഭമായ പരിപാടികളോടെ സംഘടിപ്പിച്ചു. സംഘടനയുടെ ആഗോള, ദേശീയ, മിഡിൽ ഈസ്റ്റ്, മസ്‌കറ്റ് തലങ്ങളിലെ നേതാക്കളും അംഗങ്ങളും കുടുംബാംഗങ്ങളും പങ്കെടുത്ത ആഘോഷം പ്രവാസി മലയാളികളുടെ ഐക്യത്തിന്റെയും സൗഹൃദത്തിന്റെയും സംഗമമായി മാറി.

വേൾഡ് മലയാളി ഫെഡറേഷന്റെ പത്താം വാർഷികത്തിൻ്റെ ഭാഗമായി സംഘടനയുടെ നേതാക്കൾ എല്ലാം ചേർന്ന് കേക്ക് മുറിച്ച് ആഘോഷിച്ചു. സംഘടനയുടെ പത്തുവർഷത്തെ പ്രവർത്തനങ്ങളും ലോകമെമ്പാടുമുള്ള മലയാളികളെ ഒത്തൊരുമിപ്പിക്കുന്നതിൽ സംഘടന വഹിക്കുന്ന പങ്കും ആഘോഷത്തിന് കൂടുതൽ പ്രാധാന്യം നൽകി.

ഡബ്ല്യുഎംഎഫ് ഗ്ലോബൽ ചെയർമാൻ ഡോ. ജെ. രത്നകുമാർ, ഗ്ലോബൽ പ്രസിഡന്റ് ആനി ലിബു, ഗ്ലോബൽ വൈസ് പ്രസിഡന്റ് ഉല്ലാസ് ചെറിയാൻ, മിഡ്ലീസ്റ്റ് ട്രഷറർ സുനിൽകുമാർ എന്നിവർ ചടങ്ങിൽ സന്നിഹിതരായി. ദേശീയ പ്രസിഡന്റ് ജോർജ് പി. രാജൻ ഉൾപ്പെടെയുള്ള വിവിധ തലങ്ങളിലെ നേതാക്കളുടെയും എൻ.ഇ.സി. അംഗങ്ങളുടെയും ഭാരവാഹികളുടെയും സാന്നിധ്യം പരിപാടിക്ക് പ്രൗഢി പകർന്നു.

കേരളത്തിന്റെ തനത് സംസ്കാരവും ഓണത്തിന്റെ പാരമ്പര്യവും വിളിച്ചോതിയ സാംസ്കാരിക പരിപാടികൾ ആഘോഷത്തിന്റെ പ്രധാന ആകർഷണമായി. കുട്ടികളുടെയും വനിതകളുടെയും കലാപരിപാടികൾ, ഗാനങ്ങൾ, കവിതാവതരണങ്ങൾ എന്നിവ സദസ്സിന്റെ കൈയടി നേടി. ഡബ്ല്യുഎംഎഫിന്റെ ലിറ്റിൽ സ്റ്റാർസ് അവതരിപ്പിച്ച പരിപാടികളും പ്രത്യേക ശ്രദ്ധ നേടി.

തമ്ജീദ് അവതരിപ്പിച്ച മാവേലി വേഷം ആഘോഷത്തിന് ഓണത്തിന്റെ തനിമ പകർന്നു. മാവേലിയുടെ വരവ് കുട്ടികളിലും മുതിർന്നവരിലും ഒരുപോലെ ആവേശമുണർത്തി. കുട്ടികൾക്കായി സംഘടിപ്പിച്ച വിവിധ കളികളും ആഘോഷത്തിന് കൂടുതൽ മികവേകി.

പരിപാടിയുടെ കോ-ഓർഡിനേറ്റർമാരായി ശ്രീമതി അഞ്ജുവും അനിൽ വർഗീസും പ്രവർത്തിച്ചു. ദീപ്തി ശ്യാം അവതാരകയായി. അനിത രാജൻ, രൂപ സുനിൽ എന്നിവർ ഡെസ്ക് പ്രവർത്തനങ്ങൾ ഏകോപിപ്പിച്ചു. കുട്ടികളുടെ കളികൾ ഇൻഡു നാരായണന്റെ നേതൃത്വത്തിലാണ് സംഘടിപ്പിച്ചത്.

അനൂപ് ദിവാകരൻ, അർച്ചന, ജയനന്ദൻ, പ്രവീൺ മാധവൻ, അനിൽ വർഗീസ്, നീത അനിൽ, ദീപ്തി, ഡോ. അഞ്ജു, മുഹമ്മദ് യാസീൻ, തമ്ജീദ് തുടങ്ങിയവർ ആഘോഷത്തിന്റെ വിവിധ പ്രവർത്തനങ്ങൾക്ക് നേതൃത്വം നൽകി. ദേശീയ, മസ്‌കറ്റ് ടീമുകളുടെയും സന്നദ്ധ പ്രവർത്തകരുടെയും കുടുംബാംഗങ്ങളുടെയും സജീവ പങ്കാളിത്തം പരിപാടിയുടെ വിജയത്തിൽ നിർണായകമായി.

വിഭവസമൃദ്ധമായ പരമ്പരാഗത ഓണസദ്യയും ആഘോഷത്തിന്റെ പ്രധാന ഘടകമായി. കുടുംബാംഗങ്ങളും സുഹൃത്തുക്കളും ഒരുമിച്ചിരുന്ന് സദ്യ ആസ്വദിച്ചത് ഓണത്തിന്റെ കൂട്ടായ്മയും പങ്കുവെക്കലിന്റെ സന്ദേശവും കൂടുതൽ ഊട്ടിയുറപ്പിച്ചു.

ജീവനം മെഡിപോളിസ്, ആക്സിസ് മെഡിക്കൽ സൊല്യൂഷൻസ്, ഒയാസിസ് ഗ്രേസ്, അൽ ഗസാൽ ബിരിയാണി റൈസ്, ടീജാൻ ഫർണിഷിങ് എൽ.എൽ.സി., അൽ ഔഫുഖ്, അൽ നഈമി ഫാർമസി എൽ.എൽ.സി. എന്നിവരായിരുന്നു പരിപാടിയുടെ സ്പോൺസർമാർ. ആഘോഷം വിജയകരമാക്കുന്നതിൽ സ്പോൺസർമാരുടെയും സന്നദ്ധ പ്രവർത്തകരുടെയും പിന്തുണ സംഘാടകർ പ്രത്യേകം നന്ദിയോടെ അനുസ്മരിച്ചു.

അംഗങ്ങൾക്കും കുടുംബങ്ങൾക്കും സാംസ്കാരിക ബന്ധങ്ങൾ പുതുക്കാനും സൗഹൃദങ്ങൾ ശക്തിപ്പെടുത്താനും പരസ്പര പിന്തുണ ഉറപ്പാക്കാനുമുള്ള വേദിയായി ആഘോഷം മാറി. ഐക്യവും കൂട്ടായ പ്രവർത്തനവും സേവനമനോഭാവവും ഉയർത്തിപ്പിടിക്കുന്ന ഡബ്ല്യുഎംഎഫിന്റെ പ്രവർത്തനങ്ങൾക്ക് കൂടുതൽ കരുത്തുപകരുന്നതായിരുന്നു ഓണാഘോഷമെന്ന് സംഘാടകർ അറിയിച്ചു.