The first football game of the year is a new one.

ദോഹ: ഫ്രഞ്ച് ഫുട്‌ബോളിലെ ചാമ്പ്യൻ ക്ലബിനെ കണ്ടെത്താനുള്ള പോരാട്ടം നാളെ (ഞായറാഴ്ച്ച) ഖത്തറിൽ നടക്കും. വൈകിട്ട് ഏഴരയ്ക്ക് ണയൻ സെവൻ ഫോർ സ്റ്റേഡിയത്തിലാണ് പിഎസ്ജി- എ.എസ് മൊണാക്കോ മത്സരം. 15 ലോകചാമ്പ്യൻഷിപ്പുകൾ ഉൾപ്പെടെ ചെറുതും വലുതുമായ 84 കായിക മേളകൾക്കാണ് 2025ൽ ഖത്തർ വേദിയൊരുക്കുന്നത്.

നാളത്തെ ഫ്രഞ്ച് സൂപ്പർ കപ്പ് മുതൽ വർഷാവസാനത്തെ അറബ് കപ്പ് വരെ നീളുന്നതാണ് മത്സരങ്ങളുടെ നിര. ഖത്തർ ഒളിമ്പിക് കമ്മിറ്റിയാണ് ഈ വർഷത്തെ കായിക മത്സരങ്ങളുടെ കലണ്ടർ പുറത്തുവിട്ടത്.

അണ്ടർ 17 ലോകകപ്പ് ഫുട്‌ബോളും ഫിഫ അറബ് കപ്പുമാണ് ഫുട്‌ബോൾ ആരാധകർ കാത്തിരിക്കുന്ന പോരാട്ടങ്ങൾ. നവംബർ 5 മുതൽ 25 വരെയാണ് കൗമാര ലോകകപ്പ് നടക്കുക. അറബ് കപ്പിന് ഡിസംബർ ഒന്നിന് കിക്കോഫ് വിസിൽ മുഴങ്ങും. ഡിസംബർ 18നാണ് കലാശപ്പോര്. ഫോർമുല വൺ ഖത്തർ ഗ്രാന്റ് പ്രി നവംബർ 30 നും ഡയമണ്ട് ലീഗ് അത്‌ലറ്റിക്‌സ് -മേയ് 16 നും നടക്കും. വേൾഡ് കപ്പ് ആർടിസ്റ്റിക് ജിംനാസ്റ്റിക്‌സ്, വേൾഡ് ടി.ടി ചാമ്പ്യൻഷിപ്പ് എന്നിവയ്ക്കും ഖത്തറാണ് വേദി. നൊവാക് ജോക്കോവിച്ച് ഉൾപ്പെടെയുള്ള ലോകോത്തര താരങ്ങൾ പങ്കെടുക്കുന്ന ഖത്തർ ഓപ്പൺ ടെന്നീസ് ടൂർണമെന്റ് ഫെബ്രുവരിയിലാണ് നടക്കുക. ഇതിന് പുറമെ വൻകരാ തലത്തിലും മേഖലാ തലത്തിലും നടക്കുന്ന വിവിധ പോരാട്ടങ്ങൾക്കും ഖത്തർ വേദിയാകും.

Tags: