എം.കെ. മുനീർ ഭരണപരിഷ്‌കാര കമ്മിഷൻ അധ്യക്ഷൻ; ജി. ദേവരാജന് ഡൽഹിയിൽ പ്രത്യേക ചുമതല

M.K. Muneer Chairperson of Administrative Reforms Commission; G. Devarajan has a special duty in Delhi

തിരുവനന്തപുരം: മുസ്‌ലിം ലീഗ് നേതാവും മുൻ മന്ത്രിയുമായ ഡോ. എം.കെ. മുനീറിനെ സംസ്ഥാന ഭരണപരിഷ്‌കാര കമ്മിഷൻ അധ്യക്ഷനായി നിയമിക്കാൻ മന്ത്രിസഭാ യോഗം തീരുമാനിച്ചു. കാബിനറ്റ് പദവിയോടെയാണ് നിയമനം. മുഖ്യമന്ത്രി വി.ഡി. സതീശന്റെ അധ്യക്ഷതയിൽ ചേർന്ന മന്ത്രിസഭാ യോഗത്തിലാണ് തീരുമാനം.

ഭരണനിർവഹണം കാര്യക്ഷമമാക്കൽ, ചട്ടങ്ങളിലും നിയമങ്ങളിലും ആവശ്യമായ ഭേദഗതികൾ സംബന്ധിച്ച പഠനം, അധികാര വികേന്ദ്രീകരണം തുടങ്ങിയ വിഷയങ്ങളിൽ സർക്കാരിന് ശുപാർശകൾ നൽകുകയാണ് ഭരണപരിഷ്‌കാര കമ്മിഷന്റെ പ്രധാന ചുമതല. ഒന്നാം പിണറായി വിജയൻ സർക്കാരിന്റെ കാലത്ത് മുൻ മുഖ്യമന്ത്രി വി.എസ്. അച്യുതാനന്ദനായിരുന്നു കമ്മിഷൻ അധ്യക്ഷൻ. 2021ൽ അദ്ദേഹം പദവി ഒഴിഞ്ഞതിന് ശേഷം സ്ഥാനം ഒഴിഞ്ഞുകിടക്കുകയായിരുന്നു.

കമ്മിഷൻ അധ്യക്ഷ പദവിക്കായി കോൺഗ്രസ് നേതൃത്വവും അവകാശവാദം ഉന്നയിച്ചിരുന്നെങ്കിലും ഒടുവിൽ മുസ്‌ലിം ലീഗിന്റെ ആവശ്യത്തിന് അംഗീകാരം ലഭിക്കുകയായിരുന്നു. യു.ഡി.എഫിലെ പ്രധാന ഘടകകക്ഷിയായ ലീഗിന് കാബിനറ്റ് റാങ്കിലുള്ള പദവി നൽകുന്നതുമായി ബന്ധപ്പെട്ട് നേരത്തെ ചർച്ചകൾ നടന്നിരുന്നു.

അതേസമയം, ഓൾ ഇന്ത്യ ഫോർവേഡ് ബ്ലോക്ക് ദേശീയ ജനറൽ സെക്രട്ടറി ജി. ദേവരാജനെ ന്യൂഡൽഹിയിൽ കേരള സർക്കാരിന്റെ പ്രത്യേക പ്രതിനിധിയായി നിയമിക്കാനും മന്ത്രിസഭ തീരുമാനിച്ചു. അദ്ദേഹത്തിനും കാബിനറ്റ് പദവി ലഭിക്കും. കേന്ദ്ര സർക്കാരുമായുള്ള ഏകോപനവും ഡൽഹിയിലെ സംസ്ഥാന സർക്കാരിന്റെ വിവിധ വിഷയങ്ങളും പദ്ധതികളും പിന്തുടരുന്നതിനാണ് പുതിയ ചുമതല.