Tue Dec 12, 2023 10:56 PM 1ST

Sign In

ബിഎ തോറ്റിട്ടും എംഎ സർട്ടിഫിക്കറ്റ് നേടി; കാലടി സർവകലാശാലയിലെ വീഴ്ച പുറത്ത്

22 Nov 2026 23:10 IST

NewsDelivery

Share News :

കാലടി ശ്രീശങ്കരാചാര്യ സംസ്കൃത സർവകലാശാലയുടെ തുറവൂർ പ്രാദേശിക കേന്ദ്രത്തിൽ ബിഎ പരീക്ഷ പാസാകാത്ത വിദ്യാർഥിനിക്ക് എംഎ പ്രവേശനം നൽകിയതായി സർക്കാർ ഓഡിറ്റ് റിപ്പോർട്ട്. 2019ൽ എംഎ മലയാളം ബി ഗ്രേഡിൽ പൂർത്തിയാക്കി സർട്ടിഫിക്കറ്റും മാർക്ക് ലിസ്റ്റും നേടിയ വിദ്യാർഥിനിയുടെ ബിരുദ യോഗ്യതയുമായി ബന്ധപ്പെട്ട വീഴ്ചയാണ് ഇപ്പോൾ പുറത്തുവന്നത്.

കൊച്ചി: ബിരുദ പരീക്ഷ പാസാകാത്ത വിദ്യാർഥിനിക്ക് ബിരുദാനന്തര ബിരുദത്തിന് പ്രവേശനം നൽകി എംഎ സർട്ടിഫിക്കറ്റും മാർക്ക് ലിസ്റ്റും അനുവദിച്ചതായി കാലടി ശ്രീശങ്കരാചാര്യ സംസ്കൃത സർവകലാശാലയിൽ കണ്ടെത്തൽ. സർവകലാശാലയുടെ തുറവൂർ പ്രാദേശിക കേന്ദ്രത്തിലാണ് സംഭവം. നവംബർ 17ന് സമർപ്പിച്ച സർക്കാർ ഓഡിറ്റ് വിഭാഗത്തിന്റെ റിപ്പോർട്ടിലാണ് ക്രമക്കേട് സംബന്ധിച്ച വിവരങ്ങൾ പുറത്തുവന്നത്.

2014–17 അധ്യയന വർഷത്തിൽ തുറവൂർ കേന്ദ്രത്തിൽ ബിഎ സംസ്കൃത സാഹിത്യം പഠിച്ച വിദ്യാർഥിനി ബിരുദ പരീക്ഷയിൽ പരാജയപ്പെട്ടിരുന്നു. എന്നാൽ 2017ൽ ഇതേ കേന്ദ്രത്തിൽ എംഎ മലയാളം കോഴ്‌സിന് പ്രവേശനം നേടി. തുടർന്ന് 2019ൽ ബി ഗ്രേഡോടെ ബിരുദാനന്തര ബിരുദം പൂർത്തിയാക്കുകയും സർവകലാശാലയിൽനിന്ന് എംഎ സർട്ടിഫിക്കറ്റും മാർക്ക് ലിസ്റ്റും കൈപ്പറ്റുകയും ചെയ്തു.

ജോലി ആവശ്യത്തിനായി ബിരുദ സർട്ടിഫിക്കറ്റ് വാങ്ങാൻ അടുത്തിടെ സർവകലാശാലയിലെത്തിയപ്പോഴാണ് 29കാരി ബിഎ പരീക്ഷ പാസായിട്ടില്ലെന്ന വിവരം പരീക്ഷാ വിഭാഗത്തിന്റെ ശ്രദ്ധയിൽപ്പെട്ടത്. ഇതോടെ എംഎ പ്രവേശനത്തിനും ബിരുദാനന്തര ബിരുദ സർട്ടിഫിക്കറ്റിനും ആവശ്യമായ യോഗ്യത സംബന്ധിച്ച് ചോദ്യങ്ങളുയർന്നു.

2017 സെപ്റ്റംബർ 30ന് അഞ്ചാം സെമസ്റ്ററിലെ എല്ലാ വിഷയങ്ങളിലും പരാജയപ്പെട്ടതിനെ തുടർന്ന് വിദ്യാർഥിനി പുനർമൂല്യനിർണയത്തിന് അപേക്ഷ നൽകിയിരുന്നതായും ഓഡിറ്റ് പരിശോധനയിൽ കണ്ടെത്തിയിട്ടുണ്ട്.

ബിരുദ യോഗ്യതയില്ലാതെ എങ്ങനെ എംഎ പ്രവേശനം അനുവദിച്ചുവെന്നും തുടർന്ന് ബിരുദാനന്തര ബിരുദ സർട്ടിഫിക്കറ്റും മാർക്ക് ലിസ്റ്റും നൽകിയതെങ്ങനെയെന്നും വ്യക്തമാക്കുന്നതാണ് ഓഡിറ്റ് റിപ്പോർട്ടിലെ കണ്ടെത്തൽ. സംഭവത്തിൽ സർവകലാശാലയുടെ തുടർനടപടികളും വിശദീകരണവും ശ്രദ്ധേയമാകുകയാണ്.

Follow us on :

More in Related News