മഹല്ലുകളിൽ ദീനി പ്രവർത്തനങ്ങൾ സജീവമാക്കണം – കാന്തപുരം

08 Dec 2025 20:23 IST

Share News :

Deeni activities should be activated in mahalls – Kanthapuram

കുന്ദമംഗലം: മഹല്ലുകളിൽ ദീനി പ്രവർത്തനങ്ങൾ കൂടുതൽ സജീവമാക്കണമെന്നും, കുന്ദമംഗലം മസ്ജിദുകളും മദ്റസകളും മഹല്ലിന്റെ പ്രധാന ദീനി കേന്ദ്രങ്ങളാണെന്നും കുന്ദമംഗലം മഹല്ല് ഖാളി കാന്തപുരം എ.പി. അബൂബക്കർ മുസ്‌ലിയാർ പറഞ്ഞു. കുന്ദമംഗലം മഹല്ല് ഭരണസമിതിയിലേക്കുള്ള തിരഞ്ഞെടുപ്പിൽ സുന്നി പാനൽ സമ്പൂർണ വിജയം നേടിയതിനെ തുടർന്ന് മർകസ് മസ്ജിദുൽ ഹാമിലിയിൽ നടന്ന സാരഥി സംഗമത്തിൽ സംസാരിക്കുകയായിരുന്നു അദ്ദേഹം.

ഭരണ സ്ഥാനങ്ങളിലേക്ക് തിരഞ്ഞെടുക്കപ്പെടുന്നവർ തങ്ങള്ക്കുള്ള ഉത്തരവാദിത്വം മറക്കരുതെന്നും, വിജയങ്ങളിൽ വിനയവും കൂടുതൽ തഖ്‌വയും പാലിച്ച് എല്ലാവരെയും ചേർത്ത് മുന്നോട്ട് പോകാനുള്ള പരിശ്രമം നടത്തണമെന്നും കാന്തപുരം ഓർമ്മിപ്പിച്ചു. പൂർവ്വികർ കാണിച്ച അഹ്‌ലുസുന്നയുടെ ദീനി ചൈതന്യവും പാരമ്പര്യവും മഹല്ലുകളിൽ വീണ്ടും ശക്തിപ്പെടുത്തേണ്ടതുണ്ടെന്നും അദ്ദേഹം പറഞ്ഞു.

സംഗമത്തിൽ പുതുതായി തിരെഞ്ഞെടുക്കപ്പെട്ട 15 അംഗങ്ങളെ വി.പി.എം. ഫൈസി വില്യാപ്പള്ളി മർകസിന്റെ ഷാൾ അണിയിച്ചു. സയ്യിദ് അബ്ദുല്ല കോയ സഖാഫി അധ്യക്ഷത വഹിച്ചു. അക്ബർ ബാദുഷ സഖാഫി, അഷ്‌റഫ് കാരന്തൂർ, സൈനുദ്ദീൻ നിസാമി കുന്ദമംഗലം, എം.പി. ഉസ്മാൻ ഹാജി, ഉമർ നവാസ് ഹാജി, കെ. സലീം മുസ്‌ലിയാർ, കെ. അബ്ദുൽ മജീദ് ഹാജി, കെ. അബ്ദുല്ലത്തീഫ് എന്നിവർ സംസാരിച്ചു.