ബംഗ്ലാദേശിലെ സത്ഖിരയിലെ ജശോരേശ്വരി ക്ഷേത്രത്തില്‍ പ്രധാനമന്ത്രി നരേന്ദ്ര മോദി സമ്മാനിച്ച കാളി ദേവിയുടെ കിരീടം മോഷണം പോയതായി റിപ്പോര്‍ട്ട്. വ്യാഴാഴ്ച ഉച്ചയ്ക്ക് ക്ഷേത്രത്തിലെ പൂജാരി പൂജ കഴിഞ്ഞ് പോയതിന് തൊട്ടുപിന്നാലെയാണ് വെള്ളിയും സ്വര്‍ണ്ണവും പൂശിയ കിരീടം മോഷണം പോയത്. ബംഗ്ലാദേശി പത്രമായ ദ ഡെയ്ലി സ്റ്റാര്‍ പ്രകാരം ദേവന്റെ തലയില്‍ നിന്ന് കിരീടം നഷ്ടപ്പെട്ടതായി ക്ലീനിംഗ് ജീവനക്കാര്‍ പിന്നീട് കണ്ടെത്തി.

2021 മാര്‍ച്ചില്‍ ബംഗ്ലാദേശ് സന്ദര്‍ശന വേളയിലാണ് പ്രധാനമന്ത്രി മോദി ജശോരേശ്വരി ക്ഷേത്രത്തിന് കിരീടം സമ്മാനിച്ചത്. തലമുറകളായി ക്ഷേത്രം പരിപാലിക്കുന്ന കുടുംബത്തിലെ അംഗമായ ജ്യോതി ചതോപാധ്യായ ബംഗ്ലാദേശ് മാധ്യമങ്ങളോട് പറഞ്ഞു, കിരീടം വെള്ളിയില്‍ നിര്‍മ്മിച്ചതും സ്വര്‍ണ്ണം പൂശിയതുമാണ്.

മോഷ്ടിക്കപ്പെട്ട കിരീടം ഭക്തര്‍ക്ക് സാംസ്‌കാരികവും മതപരവുമായ പ്രാധാന്യം വഹിക്കുന്നു. ഹിന്ദു പുരാണങ്ങളില്‍, ഇന്ത്യയിലും അയല്‍രാജ്യങ്ങളിലുമായി വ്യാപിച്ചുകിടക്കുന്ന 51 ശക്തിപീഠങ്ങളില്‍ ഒന്നായി ജശോരേശ്വരി ക്ഷേത്രം ബഹുമാനിക്കപ്പെടുന്നു. സത്ഖിരയിലെ ഈശ്വരിപൂരില്‍ സ്ഥിതി ചെയ്യുന്ന ഈ ക്ഷേത്രം പന്ത്രണ്ടാം നൂറ്റാണ്ടിന്റെ അവസാന പകുതിയില്‍ അനാരി എന്ന ബ്രാഹ്‌മണനാല്‍ നിര്‍മ്മിച്ചതാണെന്ന് വിശ്വസിക്കപ്പെടുന്നു. ജശോരേശ്വരി പീഠത്തിനായി 100 വാതിലുകളുള്ള ക്ഷേത്രം അദ്ദേഹം നിര്‍മ്മിച്ചു. പിന്നീട് പതിമൂന്നാം നൂറ്റാണ്ടില്‍ ലക്ഷ്മണ്‍ സെന്‍ ഇത് നവീകരിച്ചു, ഒടുവില്‍ പതിനാറാം നൂറ്റാണ്ടില്‍ രാജ പ്രതാപാദിത്യ ക്ഷേത്രം പുനര്‍നിര്‍മ്മിച്ചു.

ക്ഷേത്രത്തില്‍ ഇന്ത്യ വിവിധോദ്ദേശ്യ കമ്മ്യൂണിറ്റി ഹാള്‍ നിര്‍മ്മിക്കുമെന്ന് പ്രധാനമന്ത്രി മോദി സന്ദര്‍ശന വേളയില്‍ പറഞ്ഞിരുന്നു. പ്രദേശവാസികള്‍ക്ക് സാമൂഹികവും മതപരവും വിദ്യാഭ്യാസപരവുമായ പരിപാടികള്‍ക്ക് ഇത് ഉപയോഗപ്രദമാകണമെന്നും ചുഴലിക്കാറ്റ് പോലുള്ള ദുരന്തസമയത്ത് എല്ലാവര്‍ക്കും അഭയകേന്ദ്രമായി ഇത് പ്രവര്‍ത്തിക്കുമെന്നും അദ്ദേഹം അഭിപ്രായപ്പെട്ടു.