'വിദ്യാർത്ഥികൾ തനിച്ചല്ല'; രാഹുൽ ഗാന്ധിയുടെ നേതൃത്വത്തിൽ നീറ്റ് സമരത്തിന് പിന്തുണയുമായി INDIA സഖ്യം

'Students are not alone': Rahul Gandhi-led NEET alliance in India

ന്യൂഡൽഹി: നീറ്റ് (NEET) പേപ്പർ ചോർച്ചയിലും പരീക്ഷാ ക്രമക്കേടുകളിലും പ്രതിഷേധം ശക്തമാക്കി പ്രതിപക്ഷമായ INDIA സഖ്യം. പരീക്ഷാ ക്രമക്കേടുകളെത്തുടർന്ന് ജീവൻ നഷ്ടമായ വിദ്യാർഥികളുടെ സ്മരണ പുതുക്കാനും സമരത്തിനിടെ പരിക്കേറ്റ പ്രതിഷേധക്കാർക്ക് ഐക്യദാർഢ്യം പ്രഖ്യാപിക്കാനുമായി ലോക്സഭാ പ്രതിപക്ഷ നേതാവ് രാഹുൽ ഗാന്ധിയുടെ നേതൃത്വത്തിൽ ജനപ്രതിനിധികൾ തീസ് ജനുവരി മാർഗിലെ ഗാന്ധി സ്മൃതിയിലേക്ക് മാർച്ച് നടത്തി.

രാഹുൽ ഗാന്ധിയുടെ വസതിയിൽ ചേർന്ന യോഗത്തിന് ശേഷമാണ് കോൺഗ്രസ് നേതാവ് പ്രിയങ്ക ഗാന്ധി ഉൾപ്പെടെയുള്ള നേതാക്കൾ മൂന്ന് ബസുകളിലായി ഗാന്ധി സ്മൃതിയിലേക്ക് പുറപ്പെട്ടത്. രാജ്യത്തെ വിദ്യാർഥികൾ തനിച്ചല്ലെന്നും നീതി ലഭിക്കുന്നതുവരെ മുഴുവൻ പ്രതിപക്ഷവും അവർക്കൊപ്പം ഉറച്ചുനിൽക്കുമെന്നും രാഹുൽ ഗാന്ധി സമൂഹമാധ്യമത്തിലൂടെ അറിയിച്ചു.

ആദ്യം ഇന്ത്യാ ഗേറ്റിലേക്ക് മാർച്ച് നടത്താനായിരുന്നു തീരുമാനം. എന്നാൽ പോലീസ് അനുമതി നിഷേധിച്ചതിനെ തുടർന്ന് പ്രതിഷേധ യാത്ര ഗാന്ധി സ്മൃതിയിലേക്ക് മാറ്റുകയായിരുന്നു.

കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവയ്ക്കണമെന്ന ആവശ്യമാണ് കോൺഗ്രസ് ഉൾപ്പെടെയുള്ള പ്രതിപക്ഷ കക്ഷികൾ ഉയർത്തുന്നത്. ഇതിനുമുമ്പ് പ്രധാനമന്ത്രി നരേന്ദ്ര മോദിയുടെ വസതിയിലേക്ക് നടത്തിയ മാർച്ചിനിടെ രാഹുൽ ഗാന്ധിയെയും പ്രിയങ്ക ഗാന്ധിയെയും ഉൾപ്പെടെ നിരവധി നേതാക്കളെ ഡൽഹി പോലീസ് കസ്റ്റഡിയിലെടുത്തിരുന്നു.

അതേസമയം, നീറ്റ് പരീക്ഷാ ക്രമക്കേടുകൾക്കെതിരെ കോക്രോച്ച് ജനതാ പാർട്ടി (CJP) ജന്തർ മന്തറിൽ സംഘടിപ്പിച്ച പ്രതിഷേധത്തെ തുടർന്ന് പ്രദേശത്ത് ഒന്നര കിലോമീറ്റർ ചുറ്റളവിൽ മൊബൈൽ ഇന്റർനെറ്റ് സേവനങ്ങൾ താത്കാലികമായി നിർത്തിവച്ചിട്ടുണ്ട്. വിദ്യാർഥികൾക്ക് നീതി ലഭിക്കുന്നതുവരെ സമരത്തിൽ നിന്ന് പിന്നോട്ടില്ലെന്ന് കോൺഗ്രസ് എം.പി. കുമാരി സെൽജ വ്യക്തമാക്കി.

Tags: