കീഴൂർ - അറുനൂറ്റിമംഗലം - ഞീഴൂർ റോഡ് പുനരുദ്ധരിക്കാൻ 3.50 കോടി സംസ്ഥാന സർക്കാർ അനുവദിച്ചു - മന്ത്രി മോൻസ് ജോസഫ്

കടുത്തുരുത്തി : റോഡ് നവീകരണത്തിന് മുൻ വർഷങ്ങളിൽ സംസ്ഥാന സർക്കാർ ആവശ്യമായ ഫണ്ട് അനുവദിക്കാതെ വന്നത് മൂലം അവഗണിക്കപ്പെട്ട് കിടന്നിരുന്ന കീഴൂർ - അറുനൂറ്റിമംഗലം - പാറശ്ശേരി - ഞീഴൂർ റോഡിൻ്റെ റീ ടാറിംഗ് പുനരുദ്ധാരണത്തിന് യു.ഡി.എഫ് സർക്കാർ 3.50 കോടി രൂപ അടിയന്തിര പരിഗണനയോടെ അനുവദിച്ചതായി ജലവിഭവ - ഭവന നിർമ്മാണ വകുപ്പ് മന്ത്രി അഡ്വ.മോൻസ് ജോസഫ് അറിയിച്ചു. 

ഇതുസംബന്ധിച്ച് സർക്കാർ അനുമതിക്കുവേണ്ടി ധനകാര്യ വകുപ്പിലേക്ക് വന്നിരിക്കുന്ന പുതുക്കിയ ഫയലിൽ മുഖ്യമന്ത്രി വി.ഡി സതീശൻ ഒപ്പുവെച്ചുകൊണ്ട് അനുകൂല നടപടി സ്വീകരിച്ചതായി മന്ത്രി മോൻസ് ജോസഫ് വ്യക്തമാക്കി. 

ഏതാനും ദിവസങ്ങൾക്കുള്ളിൽ പൊതുമരാമത്ത് വകുപ്പിൽ നിന്നും സർക്കാർ ഉത്തരവ് പുറപ്പെടുവിച്ച് കീഴൂർ - അറുനൂറ്റിമംഗലം - പാറശ്ശേരി - ഞീഴൂർ റോഡ് നവീകരണത്തിന് ഔദ്യോഗിക അനുമതി ലഭ്യമാക്കുന്നതാണ്. മാസങ്ങളായി ഉണ്ടായിരിക്കുന്ന ടാർ വില വർദ്ധനവിൻ്റെ സാഹചര്യത്തിൽ എസ്റ്റിമേറ്റ് നിരക്കിനോടൊപ്പം അഡീഷണൽ ഫണ്ട് കൊടുക്കാനുള്ള മന്ത്രിസഭാ തീരുമാനം ഇക്കാര്യത്തിലും പരിശോധിച്ച് ബാധകമാക്കുന്നതിന് പൊതുമരാമത്ത് വകുപ്പിന് നിർദേശം നൽകിയിട്ടുണ്ടെന്ന് മന്ത്രി വ്യക്തമാക്കി. മഴക്കാലത്തിൻ്റെ പ്രതികൂല കാലാവസ്ഥക്ക് മാറ്റമുണ്ടായാൽ ഉടനെ കീഴൂർ - ഞീഴൂർ റോഡിൻ്റെ റീ ടാറിംഗ് ജോലികൾ ആരംഭിക്കുന്നതിനുള്ള നടപടി സ്വീകരിക്കുന്നതാണ് . യു.ഡി.എഫ് സർക്കാർ അംഗീകരിച്ചിരിക്കുന്ന പുതുക്കിയ പ്രൊപ്പോസൽ പ്രകാരം കീഴൂർ മുതൽ ഞീഴൂർ വരെ ഹൈടെക് നിലവാരത്തിൽ ബി.സി ഓവർലേ ടാറിംഗ് ജോലികൾ നടപ്പാക്കാനാണ് അനുമതി നൽകിയിട്ടുള്ളതെന്ന് മന്ത്രി വ്യക്തമാക്കി. 

കീഴൂർ - ഞീഴൂർ റോഡിൽ ഇന്നത്തെ ദയനീയമായ ശോചനീയാവസ്ഥ പരിഹരിക്കുന്നത് സംബന്ധിച്ച് മുഖ്യമന്ത്രി വി.ഡി സതീശനുമായി കടുത്തുരുത്തി ബൈപ്പാസ് ഉദ്ഘാടനത്തിന് എത്തിച്ചേർന്നപ്പോൾ വിശദമായ ചർച്ച നടത്തുകയും ജനങ്ങളുടെ കഷ്ടപ്പാട് ബോധ്യപ്പെടുത്തുകയും ചെയ്തതായി മന്ത്രി അഡ്വ.മോൻസ് ജോസഫ് വ്യക്തമാക്കി. യു.ഡി.എഫ് സർക്കാർ അധികാരമേറ്റതിന്റെ തുടക്കത്തിൽ തന്നെ പൊതുമരാമത്ത് വകുപ്പ് മന്ത്രി പി.കെ ബഷീറുമായി നേരിട്ട് ചർച്ച ചെയ്ത് കീഴൂർ - ഞീഴൂർ റോഡിൻ്റെ പുതുക്കിയ എസ്റ്റിമേറ്റോടെയുള്ള ഫയൽ സർക്കാരിലേക്ക് സമർപ്പിക്കാൻ ബന്ധപ്പെട്ട ഉദ്യോഗസ്ഥർക്ക് നിർദ്ദേശം നൽകിയതിന്റെ അടിസ്ഥാനത്തിലാണ് ഇപ്പോഴത്തെ അനുകൂല നടപടികൾ ഉണ്ടായിരുന്നതെന്ന് മന്ത്രി ചൂണ്ടിക്കാട്ടി. 

കീഴൂർ മുതൽ അറുനൂറ്റിമംഗലം വരെ കേരള വാട്ടർ അതോറിറ്റി നടപ്പാക്കിയ കുടിവെള്ള പദ്ധതിക്ക് പൈപ്പ്‌ലൈൻ സ്ഥാപിച്ചതിനുശേഷം റോഡ് നന്നാക്കാൻ വേണ്ടിവന്ന ഫണ്ട് സർക്കാർ അനുവദിക്കാതെ വന്നതിനെ തുടർന്ന് കഴിഞ്ഞ നാലു വർഷക്കാലം എൽ.ഡി.എഫ് ഭരണകാലഘട്ടത്തിൽ പ്രതിസന്ധിയിലായിതീർന്ന റോഡിനാണ് ഇപ്പോൾ ശാപമോക്ഷം ഉണ്ടായിരിക്കുന്നതെന്ന് മന്ത്രി വ്യക്തമാക്കി. 

എൽ.ഡി.എഫ് ഭരണ കാലഘട്ടത്തിൽ നിരവധി പ്രാവശ്യം നിയമസഭയിൽ ഉന്നയിക്കുകയും വിവിധ മന്ത്രിമാരോട് ആവശ്യപ്പെടുകയും ചെയ്തിട്ടും സർക്കാർ തലത്തിൽ അനുകൂല നടപടി സ്വീകരിക്കാതെ ജനങ്ങളെ മറന്നുകൊണ്ട് പ്രവർത്തിക്കുന്ന പതിവായിരുന്നു മുൻ വർഷങ്ങളിൽ എൽ.ഡി.എഫ് ചെയ്തിരുന്നത്. പൊതുമരാമത്ത് റോഡ്സ് വിഭാഗവും വാട്ടർ അതോറിറ്റിയും പരസ്പരം പഴിചാരി ഫണ്ട് അനുവദിക്കാതെ നിരവധി വർഷങ്ങളായി കബളിപ്പിക്കൽ തുടർന്നു വന്നപ്പോൾ ദുരിതവും കഷ്ടതയും അനുഭവിച്ചത് ഞീഴൂർ , മുളക്കുളം, കടുത്തുരുത്തി പഞ്ചായത്തുകളിലെ ഭൂരിപക്ഷ ജനതയായിരുന്നു. കീഴൂർ ഞീഴൂർ റോഡ് തകർന്നുകിടക്കുന്നതിലൂടെ ജനങ്ങളെ കഷ്ടപ്പെടുത്തി രാഷ്ട്രീയ ലാഭം കൊയ്യാനാണ് എൽഡിഎഫ് സർക്കാർ ശ്രമിച്ചതെന്ന് കഴിഞ്ഞ നിയമസഭാ തിരഞ്ഞെടുപ്പ് കാലഘട്ടത്തിലെ കള്ള പ്രചരണങ്ങൾ തെളിയിച്ചതാണ് . എന്നാൽ യു.ഡി.എഫ് സർക്കാർ അധികാരത്തിൽ വന്നാൽ അടിയന്തര പരിഗണനയോടെ കീഴൂർ - ഞീഴൂർ റോഡ് വികസനത്തിന് ഫണ്ട് അനുവദിക്കുമെന്നുള്ള തിരഞ്ഞെടുപ്പ് വാഗ്ദാനം കൃത്യമായി പാലിക്കാൻ കഴിഞ്ഞതായി മന്ത്രി മോൻസ് ജോസഫ് വ്യക്തമാക്കി യു.ഡി.എഫ് സർക്കാരിൻറെ നൂറുദിനകർമ്മ പരിപാടിയുടെ പരിധിയിൽ ഉൾപ്പെടുത്തി പരിഹാരനടപടി സ്വീകരിച്ചിരിക്കുന്നത് നാടിനും ജനങ്ങൾക്കും ഏറ്റവും വലിയ അനുഗ്രഹമായി തീർന്നിരിക്കുകയാണ്. 

എൽ.ഡി.എഫ് സർക്കാർ രാഷ്ട്രീയ ലാഭത്തിനുവേണ്ടി നാടിനെ ദുരിതത്തിലാക്കി ജനങ്ങളെ വേട്ടയാടിയ കീഴൂർ - ഞീഴൂർ റോഡ് വികസന പദ്ധതിയുടെ അട്ടിമറിക്കൽ പരിപാടിയെ യു.ഡി.എഫ് സർക്കാരിൻ്റെ സഹകരണത്തോടെ ജനോപകാരപ്രദമായ വികസന പദ്ധതിയായി തിരിച്ച് പിടിച്ച് നടപ്പാക്കാൻ സാഹചര്യമുണ്ടാക്കിയതിലും ജനങ്ങളോടുള്ള വാക്ക് പാലിക്കാൻ കഴിയുന്നതിലും ചാരിതാർത്ഥ്യമുണ്ടെന്ന് മന്ത്രി അഡ്വ. മോൻസ് ജോസഫ് ചൂണ്ടിക്കാട്ടി.

തുടർച്ചയായുണ്ടാകുന്ന മഴക്കെടുതി അവസാനിച്ചാലുടനെ കീഴൂർ - ഞീഴൂർ റോഡിൻ്റെ പുനരുദ്ധാരണ പ്രവർത്തനങ്ങൾക്ക് തുടക്കം കുറിക്കാൻ നടപടി സ്വീകരിക്കുമെന്ന് അദ്ദേഹം വ്യക്തമാക്കി.