ഗ്യാനേഷ് കുമാറിനെ പുറത്താക്കാൻ നീക്കം; 'ഇന്ത്യ' മുന്നണിയുടെ അടിയന്തര യോഗം സെപ്റ്റംബർ 30ന്

മുഖ്യ തിരഞ്ഞെടുപ്പ് കമ്മീഷണർക്കെതിരായ പ്രമേയത്തിന് രൂപം നൽകാൻ പ്രതിപക്ഷ നീക്കം; ഒപ്പുശേഖരണവും തുടർ പ്രതിഷേധങ്ങളും ചർച്ച ചെയ്യും

ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ പദവിയിൽ നിന്ന് പുറത്താക്കുന്നതിനുള്ള പ്രമേയത്തിന് രൂപം നൽകാൻ 'ഇന്ത്യ' മുന്നണി അടിയന്തര യോഗം ചേരുന്നു. സെപ്റ്റംബർ 30-നാണ് യോഗം തീരുമാനിച്ചിരിക്കുന്നത്. പാർലമെന്റിൽ പ്രമേയം അവതരിപ്പിക്കുന്നതിനുള്ള തന്ത്രങ്ങളും ആവശ്യമായ ഒപ്പുശേഖരണവും യോഗത്തിൽ ചർച്ച ചെയ്തേക്കും.

തൃണമൂൽ കോൺഗ്രസ് അധ്യക്ഷ മമതാ ബാനർജി, ലോക്‌സഭാ പ്രതിപക്ഷ നേതാവ് രാഹുൽ ഗാന്ധി, സി.പി.എം. ജനറൽ സെക്രട്ടറി എം.എ. ബേബി എന്നിവരുമായി വിഷയം ചർച്ച ചെയ്തിരുന്നു. അധികം വൈകാതെ യോഗം ചേരണമെന്ന എം.എ. ബേബിയുടെ നിർദേശത്തെ തുടർന്നാണ് സെപ്റ്റംബർ 30-ന് യോഗം നടത്താൻ തീരുമാനിച്ചതെന്നാണ് വിവരം.

ഗ്യാനേഷ് കുമാറിനെ പുറത്താക്കാൻ പ്രമേയം കൊണ്ടുവരാനുള്ള പ്രതിപക്ഷത്തിന്റെ മൂന്നാമത്തെ ശ്രമമാണിതെന്നാണ്റിപ്പോർട്ട്. യോഗത്തിൽ പ്രമേയത്തിനാവശ്യമായ ഒപ്പുകൾ ശേഖരിക്കുന്നതും പരിഗണിച്ചേക്കും.

മൂന്ന് പ്രധാന അജണ്ടകൾ

യോഗത്തിൽ പ്രധാനമായും മൂന്ന് വിഷയങ്ങളാണ് ചർച്ച ചെയ്യുക.

ഒന്നാമതായി, മുഖ്യ തിരഞ്ഞെടുപ്പ് കമ്മീഷണറെ പുറത്താക്കുന്നതിനുള്ള പ്രമേയം പാർലമെന്റിൽ അവതരിപ്പിക്കാനുള്ള തന്ത്രവും അതിനാവശ്യമായ ഒപ്പുശേഖരണവും ചർച്ച ചെയ്യും.

രണ്ടാമതായി, ഗ്യാനേഷ് കുമാറിന്റെ രാജി ആവശ്യപ്പെട്ടുള്ള നീക്കങ്ങൾ ശക്തമാക്കുക, തിരഞ്ഞെടുപ്പ് കമ്മീഷന്റെ തീരുമാനങ്ങളെക്കുറിച്ച് നിഷ്പക്ഷമായ അന്വേഷണം ആവശ്യപ്പെടുക, തുടർ പ്രതിഷേധങ്ങൾ സംഘടിപ്പിക്കുക എന്നിവ സംബന്ധിച്ച തീരുമാനങ്ങളുണ്ടാകും.

മൂന്നാമതായി, പഞ്ചാബ്, ഉത്തർപ്രദേശ്, ഉത്തരാഖണ്ഡ് തുടങ്ങിയ തിരഞ്ഞെടുപ്പ് നടക്കാനിരിക്കുന്ന സംസ്ഥാനങ്ങളെ കേന്ദ്രീകരിച്ച് രാജ്യവ്യാപകമായി പ്രതിഷേധങ്ങൾ സംഘടിപ്പിക്കുന്നതിനുള്ള രൂപരേഖ തയ്യാറാക്കും. ഈ വിഷയത്തിൽ കോൺഗ്രസിന്റെ അന്തിമ നിലപാട് രൂപീകരിക്കുന്നതിനായി സെപ്റ്റംബർ 29-ന് കോൺഗ്രസ് പ്രവർത്തക സമിതി (CWC) യോഗം ചേരുന്നുണ്ട്.

പ്രമുഖ പ്രതിപക്ഷ നേതാക്കൾ പങ്കെടുക്കും

കോൺഗ്രസ് നേതാക്കളായ രാഹുൽ ഗാന്ധി, സോണിയ ഗാന്ധി, മല്ലികാർജുൻ ഖാർഗെ, തൃണമൂൽ കോൺഗ്രസ് നേതാക്കളായ മമതാ ബാനർജി, അഭിഷേക് ബാനർജി, സമാജ്‌വാദി പാർട്ടി അധ്യക്ഷൻ അഖിലേഷ് യാദവ്, ശിവസേന (യു.ബി.ടി) തലവൻ ഉദ്ധവ് താക്കറെ എന്നിവരുൾപ്പെടെയുള്ള ഘടകകക്ഷി നേതാക്കൾ യോഗത്തിൽ പങ്കെടുക്കുമെന്നാണ് പ്രതീക്ഷിക്കുന്നത്.

പശ്ചിമ ബംഗാളിൽ രാഷ്ട്രീയ എതിരാളികളായ തൃണമൂൽ കോൺഗ്രസും സി.പി.എമ്മും തിരഞ്ഞെടുപ്പ് കമ്മീഷനുമായി ബന്ധപ്പെട്ട വിഷയത്തിൽ ഒരുമിച്ച് നീങ്ങാൻ തയ്യാറായിരിക്കുന്നത് ശ്രദ്ധേയമാണ്.

അതേസമയം, തമിഴ്‌നാട് നിയമസഭാ തിരഞ്ഞെടുപ്പിന് ശേഷം കോൺഗ്രസ് ടി.വി.കെ.യുമായി സഖ്യമുണ്ടാക്കിയതിനെ തുടർന്ന് 'ഇന്ത്യ' മുന്നണിയിൽ നിന്ന് അകലം പാലിക്കുന്ന ഡി.എം.കെ. യോഗത്തിൽ പങ്കെടുക്കുമോ എന്ന കാര്യത്തിൽ ഇതുവരെ വ്യക്തതയില്ല.