Vaikom complained that a Yuva Morcha district committee member was locked in the room and beaten up at the BJP office.

വൈക്കം: ബിജെപി വൈക്കം മണ്ഡലം കമ്മറ്റി ഓഫീസിൽ യുവമോർച്ച ജില്ലാ കമ്മറ്റിയംഗത്തിനെ മുറിയിൽ പൂട്ടിയിട്ട് ക്രൂരമായി മർദ്ദിച്ചതായി പരാതി. യുവമോർച്ച കോട്ടയം ജില്ലാ കമ്മറ്റിയംഗം വെച്ചൂർ ഇടയാഴം സ്വദേശി അതുലാണ് ക്രൂരമർദ്ദനത്തിരയായത്. ഒരു ദിവസം മുഴുവൻ ബിജെപി ഓഫീസിൽ പൂട്ടിയിട്ട് ക്രൂര മർദ്ദനത്തിന് ഇരയാക്കിയ സംഭവം ഇരയുടെ വീഡിയോ പുറത്ത് ഇറങ്ങും വരെ ബിജെപി രഹസ്യമാക്കി. ഗുരുതരമായ സംഭവങ്ങളാണ് ബിജെപി ഓഫീസിൽ ഉണ്ടായത്. നഗരസഭ അംഗം ഉൾപ്പെടെയുള്ള സഹപ്രവർത്തകരിൽ നിന്നാണ് മർദ്ദനം. ബിജെപി വെച്ചൂർ പ്രസിഡന്റ്‌ ഗൗതം കൃഷ്ണ ഉൾപ്പെടെ നാല് പേർക്ക് എതിരെയാണ് പരാതി.

ബിജെപി വെച്ചൂർ മണ്ഡലം പ്രസിഡന്റ്‌ ഗൗതം കൃഷ്ണയുടെ വനിതാ സുഹൃത്ത് ബന്ധ വിഷയവുമായി ബന്ധപ്പെട്ട് ടിയാന്റെ ഭാര്യയുടെ ആവശ്യപ്രകാരം സംസാരിക്കാൻ ചെന്ന യുവമോർച്ച കോട്ടയം ജില്ലാ കമ്മിറ്റിയംഗം കൂടിയായിട്ടുള്ള അതുലിനെ ഓഫീസിലേക്ക് വിളിച്ചു വരുത്തി, മുറിയിൽ പൂട്ടിയിട്ട് മർദ്ദിക്കുകയായിരുന്നുവെന്ന് പരാതിയിൽ പറയുന്നു. ഗൗതം കൃഷ്ണ, ബിജെപി വൈക്കം മണ്ഡലം പ്രസിഡന്റ്‌, മണ്ഡലം സെക്രട്ടറി, വൈക്കം നഗരസഭാ കൗൺസിലർ എന്നിവർക്കെതിരെയാണ് പരാതി നൽകിയിരിക്കുന്നത്. ജനുവരി രണ്ടിനാണ് സംഭവം ഉണ്ടായത്. 31ന് ഇത് സംബന്ധിച്ച് പരാതി നൽകിയത്. സംഭവവുമായി ബന്ധപ്പെട്ട് കഴിഞ്ഞ ദിവസം അതുൽ മർദ്ദനം സംബന്ധിച്ച് തൻ്റെ ഫെയ്സ് ബുക്കിൽ വീഡിയോ പുറത്തിറക്കിയിരുന്നു. സംഭവത്തിൽ വൈക്കം പോലീസ് വിശദമായ അന്വോഷണം ആരംഭിച്ചിട്ടുണ്ട്.