പണം ആവശ്യപ്പെട്ട് വ്യാജ ഫോൺ കോളുകൾക്കെതിരെ ജാഗ്രത പാലിക്കണം: ഇന്ത്യൻ എംബസി

മസ്‌കറ്റ്: പാസ്‌പോർട്ട്, വിസ, ഇമിഗ്രേഷൻ നടപടികൾ എന്നിവയുമായി ബന്ധപ്പെട്ട് പ്രശ്നങ്ങളുണ്ടെന്ന് വിശ്വസിപ്പിച്ച് പണം തട്ടാൻ ശ്രമിക്കുന്ന വ്യാജ ഫോൺ കോളുകൾക്കെതിരെ ഒമാനിലെ ഇന്ത്യൻ സമൂഹത്തിന് മുന്നറിയിപ്പുമായി ഇന്ത്യൻ എംബസി.

ഔദ്യോഗിക രേഖകളിൽ പ്രശ്നങ്ങളുണ്ടെന്നും പണം നൽകിയാൽ അവ പരിഹരിക്കാമെന്നും അവകാശപ്പെട്ട് അജ്ഞാതർ വിളിക്കുന്ന സംഭവങ്ങൾ ശ്രദ്ധയിൽപ്പെട്ട സാഹചര്യത്തിലാണ് എംബസിയുടെ ജാഗ്രതാനിർദേശം.

വ്യക്തികളുടെ പാസ്‌പോർട്ട്, വിസ, താമസാനുമതി തുടങ്ങിയ വിവരങ്ങൾ അറിയാവുന്നവരെന്ന വ്യാജേന വിളിക്കുന്നവർ ആൾമാറാട്ടത്തിലൂടെയും ഭീഷണിയിലൂടെയും പണം തട്ടാൻ ശ്രമിച്ചേക്കാമെന്ന് എംബസി മുന്നറിയിപ്പ് നൽകി. ഇത്തരം കോളുകൾ സാമ്പത്തിക തട്ടിപ്പിന്റെ ഭാഗമായിരിക്കാമെന്നും പ്രവാസികൾ അതീവ ജാഗ്രത പുലർത്തണമെന്നും നിർദേശിച്ചു.

തട്ടിപ്പിൽനിന്ന് രക്ഷപ്പെടാൻ സ്വീകരിക്കേണ്ട നടപടികൾ

1. പണം കൈമാറരുത്: പാസ്‌പോർട്ട്, വിസ, ഇമിഗ്രേഷൻ പ്രശ്നങ്ങൾ പരിഹരിക്കാനെന്ന പേരിൽ ഫോണിലൂടെ പണം ആവശ്യപ്പെടുന്ന അജ്ഞാതർക്ക് പണം കൈമാറരുത്. വ്യക്തിഗത ബാങ്ക് അക്കൗണ്ടുകളിലേക്കോ അപരിചിതമായ പേയ്‌മെന്റ് ലിങ്കുകൾ വഴിയോ പണം അയയ്ക്കരുത്.

2. വ്യക്തിഗത വിവരങ്ങൾ പങ്കുവെക്കരുത്: പാസ്‌പോർട്ട്, ഒമാൻ റസിഡന്റ് കാർഡ്, തിരിച്ചറിയൽ രേഖകൾ എന്നിവയുടെ പകർപ്പുകൾ, ബാങ്ക് വിവരങ്ങൾ, കാർഡ് നമ്പർ, ഒ.ടി.പി., പിൻ നമ്പർ, പാസ്‌വേഡുകൾ എന്നിവ ഫോൺ വിളിക്കുന്നവർക്ക് കൈമാറരുത്.

3. ഭീഷണിപ്പെടുത്തിയാൽ പരിഭ്രാന്തരാകരുത്: വിസ റദ്ദാക്കൽ, നാടുകടത്തൽ, അറസ്റ്റ്, നിയമനടപടി, ജോലി നഷ്ടപ്പെടൽ തുടങ്ങിയ കാര്യങ്ങൾ പറഞ്ഞ് ഉടൻ പണം നൽകാൻ നിർബന്ധിക്കുന്നവരുടെ വാക്കുകൾ വിശ്വസിക്കരുത്. ഫോൺ സംഭാഷണം അവസാനിപ്പിച്ച് ഔദ്യോഗിക മാർഗങ്ങളിലൂടെ വിവരങ്ങൾ സ്ഥിരീകരിക്കുക.

4. വിളിക്കുന്നയാളുടെ വ്യക്തിത്വം പരിശോധിക്കുക: ഫോണിൽ കാണുന്ന നമ്പർ മാത്രം വിശ്വസിക്കരുത്. ഇന്ത്യൻ എംബസി ഉദ്യോഗസ്ഥരാണെന്ന് അവകാശപ്പെടുന്നവരുടെ വിവരങ്ങൾ എംബസിയുടെ ഔദ്യോഗിക വെബ്‌സൈറ്റിൽ പ്രസിദ്ധീകരിച്ചിട്ടുള്ള സമ്പർക്കവിവരങ്ങൾ ഉപയോഗിച്ച് സ്വതന്ത്രമായി പരിശോധിക്കുക. സംശയാസ്പദമായ കോളിൽ നൽകിയ നമ്പറിലേക്കോ ലിങ്കിലേക്കോ തിരികെ ബന്ധപ്പെടുന്നതിനു പകരം ഔദ്യോഗികമായി പ്രസിദ്ധീകരിച്ച വിവരങ്ങൾ ഉപയോഗിക്കുക.

5. സംശയാസ്പദമായ കോളുകളുടെ വിവരങ്ങൾ സൂക്ഷിക്കുക: വിളിച്ച നമ്പർ, തീയതി, സമയം, സന്ദേശങ്ങൾ, പണം ആവശ്യപ്പെട്ടതിന്റെ വിവരങ്ങൾ, ലഭിച്ച ലിങ്കുകൾ തുടങ്ങിയവ സുരക്ഷിതമായി സൂക്ഷിക്കുക. പരാതിക്ക് ആവശ്യമായ തെളിവുകൾ ലഭ്യമാക്കാൻ ഇത് സഹായിക്കും. എന്നാൽ സംശയാസ്പദമായ ലിങ്കുകൾ തുറക്കുകയോ അവയിലൂടെ രേഖകൾ അപ്‌ലോഡ് ചെയ്യുകയോ ചെയ്യരുത്.

6. പണം നഷ്ടപ്പെട്ടാൽ ഉടൻ നടപടി സ്വീകരിക്കുക: ഇതിനകം പണം കൈമാറിയിട്ടുണ്ടെങ്കിൽ ഉടൻ ബാങ്കിനെയോ ബന്ധപ്പെട്ട ധനകാര്യ സ്ഥാപനത്തെയോ ബന്ധപ്പെടുക. ഇടപാട് തടയാനോ സാധ്യമെങ്കിൽ പണം തിരിച്ചുപിടിക്കാനോ ആവശ്യപ്പെടുക. ബാങ്ക് അക്കൗണ്ട്, കാർഡ് അല്ലെങ്കിൽ ഓൺലൈൻ ബാങ്കിങ് വിവരങ്ങൾ പങ്കുവെച്ചിട്ടുണ്ടെങ്കിൽ അവ സുരക്ഷിതമാക്കുകയും ആവശ്യമായ പാസ്‌വേഡുകൾ മാറ്റുകയും ചെയ്യുക. തുടർന്ന് ഒമാനിലെ ബന്ധപ്പെട്ട അധികാരികൾക്ക് പരാതി നൽകുക.

7. തട്ടിപ്പ് ശ്രമം റിപ്പോർട്ട് ചെയ്യുക: സംശയാസ്പദമായ ഫോൺ കോളുകളെക്കുറിച്ചും എംബസിയുടെ പേരിൽ നടത്തുന്ന ആൾമാറാട്ടത്തെക്കുറിച്ചും ഇന്ത്യൻ എംബസി, മസ്‌കറ്റിനെ അറിയിക്കുക. സാമ്പത്തിക നഷ്ടമുണ്ടായിട്ടുണ്ടെങ്കിൽ ബാങ്കിനെ അറിയിക്കുന്നതോടൊപ്പം ഒമാനിലെ ബന്ധപ്പെട്ട അധികാരികളെയും ഉടൻ സമീപിക്കുക.

എംബസിയുമായി ബന്ധപ്പെടാം

കോൺസുലാർ സേവനങ്ങളുമായി ബന്ധപ്പെട്ട അന്വേഷണങ്ങൾക്കും പരാതികൾക്കും cons.muscat@mea.gov.in എന്ന ഇ-മെയിൽ വിലാസത്തിലും പ്രവാസി ക്ഷേമവുമായി ബന്ധപ്പെട്ട കാര്യങ്ങൾക്ക് cw.muscat@mea.gov.in എന്ന വിലാസത്തിലും ഇന്ത്യൻ എംബസിയുമായി ബന്ധപ്പെടാം.

പാസ്‌പോർട്ട്, വിസ, ഇമിഗ്രേഷൻ തുടങ്ങിയ ഔദ്യോഗിക വിഷയങ്ങളിൽ പ്രശ്നങ്ങളുണ്ടെന്ന് അറിയിക്കുന്ന ഫോൺ കോളുകൾ ലഭിച്ചാൽ പണം നൽകുകയോ വ്യക്തിഗത വിവരങ്ങൾ കൈമാറുകയോ ചെയ്യുന്നതിനു മുമ്പ് വിവരങ്ങൾ ഔദ്യോഗികമായി സ്ഥിരീകരിക്കണം. ജാഗ്രതയും സമയബന്ധിതമായ പരാതിയും സാമ്പത്തിക തട്ടിപ്പുകളിൽനിന്ന് രക്ഷപ്പെടാൻ നിർണായകമാണെന്ന് എംബസി ഓർമിപ്പിച്ചു.