Street dog attack on skull; pedestrian bitten.

തലയോലപ്പറമ്പ്: തെരുവ് നായയുടെ ആക്രമണത്തിൽ കാൽനട യാത്രക്കാരന് കടിയേറ്റു. പൊതി പുതുക്കാട്ടിൽ വേണു ( 60) നാണ് തെരുവ് നായയുടെ ആക്രമണത്തിൽ സാരമായി പരിക്കേറ്റത്.തിങ്കളാഴ്ച രാവിലെ 7 മണിയോടെ പൊതി ജംഗ്ഷന് സമീപമാണ് സംഭവം. റോഡിലൂടെ നടന്ന് പോകുന്നതിനിടെ നായ ഓടിച്ചിട്ട് ആക്രമിക്കുകയായിരുന്നു.

കൈയ്ക്കും കാലിനും സാരമായി പരിക്കേറ്റ ഇയാളെ വൈക്കം താലൂക്ക് ആശുപത്രിയിലും തുടർന്ന് കോട്ടയം മെഡിക്കൽ കോളേജ് ആശുപത്രിയിലും പ്രവേശിപ്പിക്കുകയായിരുന്നു. റോഡിൽ അലഞ്ഞ് തിരിയുന്ന നായ നേര പാഞ്ഞടുക്കുകയും വസ്ത്രത്തിൽ പിടിച്ചു വലിച്ചു കീറുകയുമായിരുന്നു. ഇതിനിടെ നിലത്ത് വീണപ്പോഴാണ് കടിയേറ്റത്. കഴിഞ്ഞ ദിവസം കാൽനടയാത്രക്കാരനായ പൊതി പുതുക്കാട്ട് കെ.കെ പുരുഷോത്തമന് തെരുവ് നായയുടെ ആക്രമണത്തിൽ പരിക്കേറ്റിരുന്നു. ഇയാളും ചികിത്സയിലാണ്. ഏ.ബി.സി പദ്ധതി നടപ്പാക്കുമെന്നും പിടികൂടുന്നവയെ പാർപ്പിക്കുന്നതിനായി ഷെൽട്ടർ സ്ഥാപിക്കുമെന്നും പഞ്ചായത്ത് അധികൃതർ പറയുന്നുണ്ടെങ്കിലും യാതൊരു നടപടിയും സ്വീകരിച്ചിട്ടില്ലെന്ന് ആക്ഷേപം ശക്തമാണ്. ആക്രമണകാരികളായ തെരുവ് നായ്ക്കൾ ഇരു ചക്രവാഹനങ്ങൾക്ക് കുറുകെ ചാടി യാത്രക്കാർക്ക് പരിക്കേൽക്കുന്ന സംഭവങ്ങളും നിരവധിയാണ്. വെള്ളൂർ, പൊതി, തലപ്പാറ, വെട്ടിക്കാട്ട് മുക്ക് തുടങ്ങിയ സ്ഥലങ്ങളിൽ തെരുവ് നായ്ക്കളുടെ ശല്യം അതിരൂക്ഷമാണ്.സ്കൂൾ പരിസരങ്ങൾ, റെയിൽവേ സ്റ്റേഷൻ പരിസരം, ബസ്റ്റോപ്പുകൾ, മാർക്കറ്റ്, പ്രൈവറ്റ് ബസ്റ്റാൻ്റ് എന്നിവിടങ്ങളിൽ തെരുവ് നായ്ക്കളുടെ വിഹാര കേന്ദ്രമാണ്. കൂട്ടം കൂടി എത്തുന്ന തെരുവ് നായ്ക്കൾ കടിപിടികൂടി ഭീകരാന്തരീക്ഷം സൃഷ്ടിക്കുന്നതും പതിവാണ്.

Tags:

തലയോലപ്പറമ്പിൽ തെരുവ് നായയുടെ ആക്രമണം; കാൽനടയാത്രക്കാരന് കടിയേറ്റു. വൈക്കം വാർത്ത