Tue Dec 12, 2023 10:56 PM 1ST
Location
Sign In
18 Nov 2026 20:57 IST
Share News :
മലപ്പുറം : കേരളത്തിന്റെ ഡിജിറ്റൽ മുന്നേറ്റചരിത്രത്തിൽ സുവർണ്ണലിപികളാൽ രേഖപ്പെടുത്തപ്പെട്ട ദിനമാണ് നവംബർ 18. 2002 നവംബർ 18-ന് മുൻ രാഷ്ട്രപതി ഡോ. എ.പി.ജെ. അബ്ദുൾ കലാം മലപ്പുറത്ത് ഉദ്ഘാടനം ചെയ്ത അക്ഷയ പദ്ധതിക്ക് ഇന്ന് 24 വർഷം പൂർത്തിയാകുന്നു.
ഇ-സാക്ഷരതയുടെ വിത്തുപാകി ആരംഭിച്ച ഈ ജനകീയ സംരംഭം രജതജൂബിലി വർഷത്തിലേക്കാണ് ഇന്ന് പ്രവേശിക്കുന്നത്.
മലപ്പുറത്ത് തുടക്കം, കേരളമാകെ വളർച്ച
കമ്പ്യൂട്ടറും ഇന്റർനെറ്റും സാധാരണക്കാർക്ക് അപരിചിതമായിരുന്ന കാലത്ത്, ഓരോ പൗരനെയും വിവരസാങ്കേതികവിദ്യയുടെ ലോകത്തേക്ക് കൈപിടിച്ചുയർത്തുക എന്ന ലക്ഷ്യത്തോടെയാണ് മലപ്പുറത്തിന്റെ മണ്ണിൽ അക്ഷയയ്ക്ക് തുടക്കമിട്ടത്. സമ്പൂർണ്ണ ഇ-സാക്ഷരതയിൽ നിന്ന് ഇ-ഗവേണൻസിലേക്കും, അവിടെനിന്ന് സമഗ്രമായ പൗരസേവന വിതരണത്തിലേക്കുമുള്ള അക്ഷയയുടെ വളർച്ച കേരളത്തിന്റെ വികസന ചരിത്രത്തിലെ ശ്രദ്ധേയമായ അധ്യായമാണ്.
ഇന്ന് സംസ്ഥാനത്തുടനീളമുള്ള മൂവായിരത്തിലധികം അക്ഷയ കേന്ദ്രങ്ങളിലൂടെ പ്രതിമാസം ശരാശരി 30 ലക്ഷത്തോളം ജനങ്ങളിലേക്ക് വിവിധ സർക്കാർ-സർക്കാരിതര സേവനങ്ങൾ എത്തിച്ചുകൊണ്ട് അക്ഷയ പൊതുജനങ്ങളുടെ നിത്യജീവിതത്തിന്റെ അവിഭാജ്യ ഘടകമായി മാറിയിരിക്കുന്നു.
സാങ്കേതികവിദ്യയുടെ ഗുണഫലങ്ങൾ സമൂഹത്തിലെ അവസാനത്തെ വ്യക്തിയിലേക്കും എത്തിക്കുക, ഡിജിറ്റൽ വിടവ് നികത്തുക, സർക്കാർ സേവനങ്ങൾ സുതാര്യമായും വേഗത്തിലും ജനങ്ങളുടെ വിരൽത്തുമ്പിൽ ലഭ്യമാക്കുക എന്നീ ലക്ഷ്യങ്ങളോടെ അക്ഷയയുടെ സേവനയാത്ര കൂടുതൽ കരുത്തോടെ തുടരുകയാണ്.
മലപ്പുറത്തിന്റെ മണ്ണിൽ പിറന്ന് കേരളത്തിന്റെ ഡിജിറ്റൽ മുന്നേറ്റത്തിന് വഴികാട്ടിയായ ഈ ജനകീയ പ്രസ്ഥാനത്തിന് പിന്നിൽ പ്രവർത്തിക്കുന്ന അക്ഷയ സംരംഭകരുടെയും ജീവനക്കാരുടെയും സമർപ്പണം പ്രത്യേകം അഭിനന്ദനാർഹമാണ്.
അക്ഷയയുടെ ഈ അഭിമാനകരമായ യാത്രയിൽ പങ്കാളികളായ എല്ലാ സംരംഭകർക്കും ജീവനക്കാർക്കും ജില്ലാ കളക്ടർ ഡോ. വിനയ് ഗോയൽ (IAS)
അഭിനന്ദനങ്ങൾ അറിയിച്ചു.
Follow us on :
Tags:
More in Related News
Please select your location.