Car collides with interstate bus and bike; four injured.

തലയോലപ്പറമ്പ് : കാര്‍ അന്തർസംസ്ഥാന ബസ്സിലും ബൈക്കിലും കൂട്ടിയിടിച്ചുണ്ടായ അപകടത്തിൽ കാർ യാത്രികരായ ദമ്പതികൾ ഉൾപ്പടെ നാലുപേർക്ക് പരിക്ക്. തലയോലപ്പറമ്പ്-എറണാകുളം റോഡില്‍ നീര്‍പ്പാറ അസീസ് മൗണ്ടിന് സമീപം കലുങ്ക് ജങ്ഷനിൽ വ്യാഴാഴ്ച രാവിലെ 11.15 ഓടെയാണ് അപകടം. പാലക്കാട് നിന്നും നീണ്ടൂർക്ക് വരികയായിരുന്ന മഹീന്ദ്ര എക്‌സ്യുവി കാര്‍ അന്തർസംസ്ഥാന ബസ്സിലും ബൈക്കിലും കൂട്ടിയിടിച്ചാണ് അപകടം. കോട്ടയത്തുനിന്ന് എറണാകുളത്തേക്ക് പോവുകയായിരുന്നു ബസ്സ്. കാറിൽ യാത്ര ചെയ്തിരുന്ന നീണ്ടൂർ പ്രാവട്ടം ചക്രം പടി സ്വദേശിയും ഇടുക്കിയിലെ പോലീസ് ഉദ്യോഗസ്ഥനുമായ ബിജു. ഭാര്യ റാണി, ബസ് ഡ്രൈവർ മഹേഷ് അപകത്തെ തുടർന്ന് വെട്ടി തിരിഞ്ഞ കാർ തട്ടി ബൈക്ക് യാത്രക്കാരൻ മാഞ്ഞൂർ ചാമക്കാല പ്ലാപ്പറമ്പിൽ സിബിൻ ചാക്കോ എന്നിവർക്കാണ് പരിക്കേറ്റത്. പരിക്കേറ്റവരെ പൊതിയിലെ സ്വകാര്യ ആശുപത്രിയിൽ പ്രവേശിപ്പിച്ച ശേഷം വിദഗ്ധ ചികിത്സക്കായി പിന്നീട് കോട്ടയത്തെ സ്വകാര്യ ആശുപത്രിയിലേക്ക് മാറ്റി.

പാലക്കാട് പോയി തിരികെ

തലയോലപ്പറമ്പ് ഭാഗത്തേക്ക് വന്ന കാര്‍ ബൈക്കിനെ മറികടന്ന് വരുന്നതിനിടെ എതിര്‍ദിശയില്‍ വന്ന ബസിലിടിച്ചശേഷം പിന്നാലെയെത്തിയ ബൈക്കിലും വൈദ്യുതത്തൂണിലും ഇടിച്ചാണ് അപകടം. പരിക്കേറ്റവരെ നാട്ടുകാര്‍ ചേര്‍ന്ന് ആശുപത്രിയിലേക്ക് മാറ്റുകയായിരുന്നു. അപകടത്തിൽപ്പെട്ട ബസ്സിന് പിന്നിൽ മറ്റൊരു കാർ ഇടിച്ച് സാരമായ കേടുപാടുകൾ സംഭിച്ചു. ബസ്സിൽ യാത്രക്കാർ ആരും ഇല്ലാതിരുന്നതിനാൽ വൻ ദുരന്തം ഒഴിവായി.

അപകടത്തെ തുടർന്ന് പ്രധാന റോഡിൽ ഒരു മണിക്കൂറിലധികം ഗതാഗതം തടസ്സപ്പെട്ടു. ഇടിയുടെ ആഘാതത്തിൽ കാറിൻ്റെയും ബസ്സിൻ്റെയും മുൻവശം പൂർണ്ണമായി തകർന്നു. തലയോലപ്പറമ്പ് പോലീസ് സ്ഥലത്തെത്തി മേല്‍നടപടി സ്വീകരിച്ചു.