Attack on Vaikkathu due to previous enmity; Patient's brother stabbed.

വൈക്കം: ആശുപത്രിയിൽ ചികിത്സയിൽ കഴിയുകയായിരുന്ന യുവാവിനെ മുൻ വൈരാഗ്യത്തെ തുടർന്ന് ആക്രമിക്കാൻ ശ്രമിക്കുന്നതിനിടെ പിടിച്ചു മാറ്റാൻ ശ്രമിച്ച രോഗിയുടെ സഹോദരന് കുത്തേറ്റു. വ്യാഴാഴ്ച രാത്രി 10 മണിയോടെ വൈക്കം ടൗണിലെ സ്വകാര്യ ആശുപത്രിയിലാണ് സംഭവം. ചാലപ്പറമ്പ് കച്ചേരിത്തറ ബാദുഷ (18) നാണ് കുത്തേറ്റത്. ബാദുഷയുടെ പിതാവ് ഷാജി, സഹോദരൻ മനാഫ് എന്നിവർ പനി ബാധിച്ച് ആശുപത്രിയിൽ ചികിത്സയിൽ കഴിയുകയായിരുന്നു.ഇവരുടെ സഹായത്തിനായിട്ടാണ് ബാദുഷ ആശുപത്രിയിൽ എത്തിയത്.കെ എസ് ഇ ബി കരാർ തൊഴിലാളിയായ മനാഫുമായി അക്കരപ്പാടം സ്വദേശിയായ അക്ഷയ് എന്ന യുവാവിന് വൈരാഗ്യം നിലനിന്നിരുന്നു. ഇതിനിടെ മനാഫ് ആശുപത്രിയിൽ ഉണ്ടെന്ന് അറിഞ്ഞ് അക്ഷയുടെ നേതൃത്വത്തിലുള്ള ഒരു സംഘം ആശുപത്രിയിൽ അതിക്രമിച്ച് കയറി ആക്രമിക്കാൻ ശ്രമിക്കുകയായിരുന്നു. പിടിച്ച് മാറ്റാൻ ശ്രമിക്കുന്നതിനിടെയാണ് കുത്തേറ്റത്.

തുടർന്ന് അക്രമിസംഘം അവിടെ നിന്നും ഓടി രക്ഷപ്പെടുകയായിരുന്നു. കുത്തേറ്റ് കൈക്ക് ഗുരുതരമായി പരിക്കേറ്റ ബാദുഷയെ എറണാകുളത്തുള്ള സ്പെഷ്യലിസ്റ്റ് ആശുപത്രിയിൽ പ്രവേശിപ്പിച്ചു.സംഭവത്തിൽ വൈക്കം പോലീസ് കേസ്സെടുത്ത് അന്വോഷണം ആരംഭിച്ചു.