Vaikom Vellore scooter theft; Thiruvananthapuram native and minor friend arrested.

വൈക്കം: വെള്ളൂരിൽ വീടിന് മുന്നിൽ പാർക്ക് ചെയ്തിരുന്ന സ്കൂട്ടർ മോഷ്ടിച്ച കേസിൽ പ്രായപൂർത്തിയാകാത്ത ഒരാൾ അടക്കം രണ്ടു പേർ പോലീസ് പിടിയിൽ. തിരുവനന്തപുരം മുട്ടട സജു വിലാസത്തിൽ ഉദയന്റെ മകൻ ഹാബേൽ (19), ഇയാളുടെ സുഹൃത്തും പ്രായപൂർത്തിയാകാത്ത മറ്റൊരാളുമാണ് പിടിയിലായത്. കഴിഞ്ഞ മാസം 22ന് പുലർച്ചെ വെള്ളൂർ പഞ്ചായത്ത് ഓഫീസിന് പിൻവശത്തുള്ള കുറ്റിയാങ്കോണത്ത് ബിനീഷിന്റെ വീട്ടിന് മുൻവശത്ത് പാർക്ക് ചെയ്തിരുന്ന ആക്ടീവ സ്കൂട്ടറാണ് ഇവർ മോഷ്ടിച്ചത്. മോഷ്ടിച്ച സ്കൂട്ടറുമായി പ്രതികൾ തിരുവനന്തപുരത്തേക്ക് പോകുകയായിരുന്നു. ഇതിനിടെ തിരുവനന്തപുരം മണ്ണന്തലയിൽ വച്ച് പോലീസ് ചെക്കിങ്ങിനിടെ വാഹനം ഉപേക്ഷിച്ച് ഇരുവരും കടന്നു കളയുകയായിരുന്നു. സംഭവത്തിന് ശേഷം പ്രതി ഹാബേൽ കൺട്രോൾമെന്റ് സ്റ്റേഷൻ പരിധിയിൽ നിന്ന് മറ്റൊരു സ്കൂട്ടർ മോഷ്ടിക്കുകയും തുടർന്ന് പോലീസ് നടത്തിയ അന്വേഷണത്തിൽ ഇയാളെ തിരുവനന്തപുരം ചാലിൽ നിന്ന് പിടികൂടുകയുമായിരുന്നു. ഈ കേസിൽ റിമാൻഡിൽ കഴിഞ്ഞിരുന്ന പ്രതിയെ വെള്ളൂർ പോലീസ് കസ്റ്റഡിയിൽ വാങ്ങുകയും സ്ഥലത്തെത്തിച്ച് തെളിവെടുപ്പ് നടത്തുകയുമായിരുന്നു. പ്രതി ഹാബേലിന് മണ്ണന്തല പോലീസ് സ്റ്റേഷനിൽ ഭണ്ഡാര മോഷണ കേസ്, മ്യൂസിയം, കണ്ടോൺമെന്റ്, പോത്തൻകോട് തുടങ്ങിയ സ്റ്റേഷനുകളിൽ വാഹന മോഷണ കേസുകൾ എന്നിവ നിലവിലുണ്ടെന്ന് പോലീസ് പറഞ്ഞു. മോഷണത്തിൽ നിന്നും ലഭിക്കുന്ന പണം ധൂർത്തടിച്ച് ജീവിക്കാനാണ് പ്രതികൾ വിനിയോഗിച്ചിരുന്നത്. പ്രായപൂർത്തിയാകാത്ത പ്രതിയെ ജുവനൈൽ ഹോമിലാക്കി. വെള്ളൂർ എസ്. എച്ച്. ഒ. മുഹമ്മദ് നിസാറിൻ്റെ നേതൃത്വത്തിലായിരുന്നു അന്വേഷണം. പ്രതിയെ വൈക്കം ജുഡീഷനിൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കി റിമാൻഡ് ചെയ്തു.