സ്പോർട്സ് ഹബ്ബ് ഉദ്ഘാടനം ചെയ്തു

പറവൂർ: ശതോത്തര സുവർണ്ണ ജൂബിലി ആഘോഷിക്കുന്ന പറവൂർ ഗവ. സെക്കൻ്ററി സ്കൂളിൻ്റെ ചിരകാല സ്വപ്നമായ സ്പോർട്സ് ഹബ്ബ് യാഥാർത്ഥ്യമായി.

സ്കൂളിലെ പൂർവ വിദ്യാർത്ഥിയും ഐ ടി കമ്പനിയായ യു എസ് ടി യുടെ സ്ഥാപക ഡയറക്ടറുമായ ജി എം മേനോന്റെ സ്മരണാർത്ഥം 35 ലക്ഷം രൂപ ചിലവിട്ട് സജ്ജീകരിച്ച സ്പോർട്സ് ഹബ്ബ് പ്രതിപക്ഷ നേതാവ് വി ഡി സതീശനും, ഹൈബി ഈഡൻ എംപിയും ചേർന്ന് ഉദ്ഘാടനം ചെയ്തു. നഗരസഭാധ്യക്ഷ ബീന ശശിധരൻ അധ്യക്ഷയായി. ഫുട്ബോൾ താരം ഐ എം വിജയൻ മുഖ്യാതിഥിയായി. ഒരു സ്പോർട്സിൻ്റെ വാതിൽ തുറന്നാൽ ഒരു ജയിലിൻ്റെ വാതിലടയുമെന്നും, സ്പോർട്സിലും വലിയ ലഹരി ലോകത്തെവിടേയും കണ്ടിട്ടില്ലെന്നും ഐ എം വിജയൻ പറഞ്ഞു. ഫുട്ബോൾ ഗ്രൗണ്ടിൽ അദ്ദേഹം ആദ്യ കിക്കെടുത്തു. അത്‌ലറ്റിക് ട്രാക്ക്, ഫുട്ബോൾ ഗ്രൗണ്ട്, വോളിബോൾ കോർട്ട്, ലോങ്ങ് ജംബ് പിറ്റ് എന്നിവയാണ് സ്പോർട്സ് ഹബ്ബിൻ്റെ ഭാഗമായി ഒരുക്കിയിട്ടുള്ളത്. വിശാലവും വിപുലവുമായ സൗകര്യങ്ങളോടുകൂടി സജ്ജീകരിച്ചിരിക്കുന്ന ഈ ഗ്രൗണ്ട് ജില്ലയിലെ സർക്കാർ വിദ്യാലയങ്ങളിൽ ഏറ്റവും വലിയ സ്പോർട്സ് ഗ്രൗണ്ടാണ്. എസ് ശർമയും, കെ പി ധനപാലനും ചേർന്ന് വോളിബോൾ കോർട്ട് ഉദ്ഘാടനം ചെയ്തു. യു എസ് ടിയുടെ ചീഫ് വാല്യു ഓഫീസർ സുനിൽ ബാലകൃഷ്ണൻ ഫലകം അനാഛാദനം ചെയ്തു. നഗരസഭ ഉപാധ്യക്ഷൻ എം ജെ രാജു, ടി വി നിഥിൻ, കെ ജെ ഷൈൻ, സജി നമ്പിയത്ത്, രമേഷ് ഡി കുറുപ്പ്, പി എസ് എം അഷ്റഫ്, എം ജെ വിനു, ശിൽപ മേനോൻ, സോഫി ജാനറ്റ്, എ എസ് സിനി, വി കെ സുനിൽ കുമാർ, ജോസ് തോമസ് എന്നിവർ സംസാരിച്ചു.