PV Anvar Seats In Trinamool Congress; Membership Given To Abhishek Banerjee

ന്യൂഡൽഹി: നിലമ്പൂർ എം എൽ എ പി വി അൻവർ എംഎൽഎ തൃണമൂൽ കോൺഗ്രസിൽ. ടിഎംസി ദേശീയ ജനറൽ സെക്രട്ടറി അഭിഷേക് ബാനർജിയാണ് അൻവറിനെ പാർട്ടിയിലേക്ക് സ്വീകരിച്ചത്. അൻവറിന്റെ അംഗത്വം വ്യക്തമാക്കി അഭിഷേക് ബാനർജി എക്സിൽ പോസ്റ്റ് പങ്കുവെച്ചു.

കൊൽക്കത്തയിലെ തൃണമൂൽ കോൺഗ്രസ് ഓഫീസിൽ അഭിഷേക് ബാനർജിയുമായി അൻവർ കൂടിക്കാഴ്ച നടത്തിയിരുന്നു. ഇതിന് പിന്നാലെയാണ് തൃണമൂലിലേക്കുള്ള വഴി തെളിഞ്ഞത്. പാർട്ടി പ്രവേശനത്തിന് മുന്നോടിയായി തൃണമൂൽ കോൺഗ്രസ് അധ്യക്ഷയും ബംഗാൾ മുഖ്യമന്ത്രിയുമായ മമത ബാനർജിയുമായി അൻവർ ഫോണിൽ സംസാരിച്ചിരുന്നു. പാർട്ടിയിൽ സംസ്ഥാന കോ-ഓർഡിനേറ്റർ സ്ഥാനമാണ് ലഭിച്ചിരിക്കുന്നതെന്ന് പി വി അൻവർ പറഞ്ഞു. ജനക്ഷേമത്തിനായി ടിഎംസിക്ക് ഒപ്പം ചേർന്ന് പ്രവർത്തിക്കുമെന്നും അദ്ദേഹം കൂട്ടിച്ചേർത്തു.

നേരത്തേ യുഡിഎഫ് പ്രവേശന അഭ്യൂഹം സജീവമാക്കി പി വി അൻവർ പാണക്കാട്ടെത്തി മുസ്‌ലിം ലീഗ് നേതാക്കളുമായി കൂടിക്കാഴ്ച നടത്തിയിരുന്നു. അൻവറിനെ യുഡിഎഫുമായി സഹകരിപ്പിക്കുന്ന വിഷയത്തിൽ കോൺഗ്രസ് എടുക്കുന്ന ഏതു തീരുമാനത്തിനുമൊപ്പവും നിൽക്കുമെന്ന് മുസ്‍ലിം ലീഗും അറിയിച്ചിരുന്നു. എന്നാൽ കോൺഗ്രസ് നേതാക്കളെ കാണാൻ ലക്ഷ്യമിട്ട് അൻവർ തിരുവനന്തപുരത്തെത്തിയെങ്കിലും കോൺഗ്രസ്സ് നേതൃത്വം ഇതിന് താൽപര്യം കാട്ടിയില്ല. ഇതോടെയാണ് അൻവർ തൃണമൂലിലെത്തിയത്.

Tags:

enlightmedia,malayalamnews,kerala,latestnews