Mentally challenged woman raped in Malappuram; two arrested

മലപ്പുറം : മലപ്പുറം അരീക്കോട് മാനസിക വെല്ലുവിളി നേരിടുന്ന യുവതിയെ ബലാത്സംഗത്തിനിരയാക്കിയെന്ന കേസില്‍ രണ്ട് പേര്‍ അറസ്റ്റില്‍. മഞ്ചേരി പുല്‍പറ്റ സ്വദേശികളായ പറമ്പടൻ മുഹമ്മദ്, അക്കരപറമ്പിൽ സമീര്‍ എന്നിവരെയാണ് അറസ്റ്റ് ചെയ്തത്. കൊണ്ടോട്ടി ഡിവൈഎസ്പിയുടെ നേതൃത്വത്തിലുള്ള അന്വേഷണസംഘമാണ് ഇരുവരെയും അറസ്റ്റ് ചെയ്തത്. അയല്‍വാസിയും അകന്ന ബന്ധുവും അടക്കം എട്ടുപേര്‍ക്കെതിരെയാണ് പരാതി നല്‍കിയത്. 36 കാരിയെ വിവിധയിടങ്ങളില്‍ കൊണ്ടുപോയി ബലാത്സംഗം ചെയ്‌തെന്നാണ് പരാതി. സംഭവത്തില്‍ മൂന്ന് എഫ്‌ഐആറുകള്‍ രജിസ്റ്റര്‍ ചെയ്തു.

2023 ഫെബ്രുവരി മുതലാണ് യുവതി ബലാത്സംഗത്തിന് ഇരയായത്. പ്രലോഭിപ്പിച്ച്‌ അയല്‍വാസിയായ യുവാവാണ് യുവതിയെ ലോഡ്ജിലെത്തിച്ച്‌ ആദ്യം ബലാത്സംഗം ചെയ്തത്. പിന്നീട് ഇയാളുടെ സുഹൃത്തുക്കളും യുവതിയുടെ അകന്ന ബന്ധുക്കളുമടക്കം ഏഴ് പേര്‍ വിവിധ സ്ഥലങ്ങളില്‍ കൊണ്ടുപോയി ബലാത്സംഗം ചെയ്തെന്നാണ് യുവതിയുടെ പരാതി. ഇതിനിടയില്‍ തന്‍റെ കൈവശമുണ്ടായിരുന്ന 15 പവൻ സ്വര്‍ണാഭരണങ്ങള്‍ തട്ടിയെടുത്തെന്നും യുവതി പരാതിയില്‍ പറയുന്നുണ്ട്.

രണ്ട് മക്കളുള്ള യുവതി ഏറെക്കാലമായി ഭര്‍ത്താവുമായി അകന്നാണ് കഴിയുന്നത്. കഴിഞ്ഞ നവംബര്‍ 20 ന് യുവതി കിണറ്റില്‍ ചാടി ആത്മഹത്യക്ക് ശ്രമിച്ചപ്പോഴാണ് ബലാത്സംഗ വിവരവും സ്വര്‍ണാഭരണം നഷ്ടപ്പെട്ടതും സഹോദരൻ അറിഞ്ഞത്. പിന്നാലെ അരീക്കോട് പോലീസിൽ പരാതി

നല്‍കുകയായിരുന്നു. മഞ്ചേരി കോടതിയില്‍ ഹാജരാക്കിയ മുഹമ്മദിനേയും ഷെമീറിനേയും പതിനാല് ദിവസത്തേക്ക് റിമാൻഡ് ചെയ്തു.