Tue Dec 12, 2023 10:56 PM 1ST
Location
Sign In
21 Nov 2026 01:43 IST
Share News :
മസ്കറ്റ്: പ്രവാസജീവിതത്തിന്റെ അനുഭവങ്ങളും സാഹിത്യസപര്യയും ചേർത്തുവെച്ച് മലയാള സാഹിത്യലോകത്ത് ശ്രദ്ധേയമായ സാന്നിധ്യമായി മാറിയ എഴുത്തുകാരൻ ഹാറൂൺ റഷീദിന്റെ പന്ത്രണ്ടാമത് പുസ്തകം ‘യുഷ്കയും അത്ഭുതഡോക്ടറും’ മസ്കറ്റിൽ പ്രകാശനം ചെയ്തു. കുട്ടികൾക്കായി ഒരുക്കിയ ബാലസാഹിത്യ കൃതിയുടെ പ്രകാശനച്ചടങ്ങ് നവംബർ 19 വ്യാഴാഴ്ച മസ്കറ്റിലെ ദനത് ഹാളിൽ നടന്നു. കവി അമ്മു വള്ളിക്കാട്ട് പുസ്തകം പ്രകാശനം ചെയ്തു. ചടങ്ങിൽ കുട്ടികളുടെ പ്രതിനിധി സംഘം പുസ്തകം ഏറ്റുവാങ്ങി.
പ്രമുഖ റഷ്യൻ സാഹിത്യകാരനായ അലക്സാണ്ടർ കുപ്രീന്റെ കഥകളെ അടിസ്ഥാനമാക്കി ഹാറൂൺ റഷീദ് തയ്യാറാക്കിയ പുനരാഖ്യാനമാണ് ‘യുഷ്കയും അത്ഭുതഡോക്ടറും’. ലോക സാഹിത്യത്തിലെ ശ്രദ്ധേയമായ കഥകളെ മലയാളത്തിലെ ബാലവായനക്കാർക്ക് പരിചയപ്പെടുത്തുകയും കുട്ടികളിൽ വായനാശീലം വളർത്തുകയും ചെയ്യുക എന്ന ലക്ഷ്യത്തോടെ ഒരുക്കിയ കൃതിയാണിത്. ലളിതവും ആകർഷകവുമായ ആഖ്യാനത്തിലൂടെ കുട്ടികൾക്ക് ആസ്വദിച്ചുവായിക്കാൻ കഴിയുന്ന രീതിയിലാണ് പുസ്തകം അവതരിപ്പിച്ചിരിക്കുന്നത്. മാതൃഭൂമിയാണ് പുസ്തകത്തിന്റെ പ്രസാധകർ.
യൂണിവേഴ്സിറ്റി ഓഫ് ബുറൈമിയിലെ അസിസ്റ്റന്റ് പ്രൊഫസർ ഡോ. സോണി വി. റഷീദ് പുസ്തകപരിചയം നടത്തി. കുപ്രീന്റെ കഥാലോകവും അതിന്റെ സാഹിത്യപ്രാധാന്യവും മലയാളത്തിലെ പുനരാഖ്യാനത്തിന്റെ പ്രസക്തിയും ചടങ്ങിൽ പരിചയപ്പെടുത്തി.
മസ്കറ്റിൽ പതിറ്റാണ്ടുകളായി പ്രവാസജീവിതം നയിച്ചുവരുന്ന ഹാറൂൺ റഷീദ്, ജോലി ജീവിതത്തോടൊപ്പം എഴുത്തിനെയും വായനയെയും സാഹിത്യപ്രവർത്തനങ്ങളെയും ചേർത്തുപിടിച്ച എഴുത്തുകാരനാണ്. പന്ത്രണ്ടാമത് പുസ്തകത്തിന്റെ പ്രകാശനത്തോടെ അദ്ദേഹത്തിന്റെ സാഹിത്യയാത്രയിലെ മറ്റൊരു പ്രധാന അധ്യായത്തിനാണ് തുടക്കമായിരിക്കുന്നത്. മുതിർന്നവർക്കും കുട്ടികൾക്കും ഒരുപോലെ വായനയുടെ ലോകം തുറന്നുകൊടുക്കുന്ന രചനകളിലൂടെ മലയാള സാഹിത്യരംഗത്ത് തന്റെ സാന്നിധ്യം അറിയിച്ചിട്ടുള്ള അദ്ദേഹം, പ്രവാസജീവിതത്തിന് വിരാമമിട്ട് നാട്ടിലേക്ക് മടങ്ങാനുള്ള ഒരുക്കത്തിലാണ്. മസ്കറ്റിലെ സാഹിത്യ-സാംസ്കാരിക കൂട്ടായ്മകളിൽ സജീവമായിരുന്ന അദ്ദേഹത്തിന് പുസ്തകപ്രകാശനം പ്രവാസകാലത്തെ സർഗാത്മക യാത്രയുടെ ഓർമിക്കപ്പെടുന്ന നിമിഷം കൂടിയായി.
മലയാളം മിഷൻ ഒമാൻ സെക്രട്ടറി അനു ചന്ദ്രൻ അധ്യക്ഷത വഹിച്ചു. റിയാസ് അമ്പലവൻ സ്വാഗതവും ബിജോയ് പാറാട്ട് നന്ദിയും പറഞ്ഞു.
ഇന്ത്യൻ സ്കൂൾ ബോർഡ് അംഗം നിധീഷ് കുമാർ, ലോക കേരള സഭാംഗവും മലയാളം മിഷൻ പ്രസിഡന്റുമായ സുനിൽ കുമാർ, ഇന്ത്യൻ സോഷ്യൽ ക്ലബ് സാമൂഹ്യക്ഷേമ വിഭാഗം സെക്രട്ടറി സന്തോഷ് കുമാർ, മാധ്യമപ്രവർത്തകൻ കബീർ യൂസഫ്, അൽബാജ് ബുക്ഷോപ്പ് ഉടമ ഷൗക്കത്തലി, സാമൂഹിക പ്രവർത്തക തങ്കം കവിരാജ്, ഇന്ത്യൻ സോഷ്യൽ ക്ലബ് കേരള വിഭാഗം കോ-കൺവീനർ ജഗദീഷ് കീരി എന്നിവർ ആശംസകൾ നേർന്നു.
സാഹിത്യ-സാംസ്കാരിക-സാമൂഹിക രംഗങ്ങളിലെ പ്രമുഖരും വായനക്കാരും സുഹൃത്തുക്കളും ഉൾപ്പെടെ നിരവധി പേർ ചടങ്ങിൽ പങ്കെടുത്തു. പ്രവാസത്തിന്റെ തിരക്കുകൾക്കിടയിലും എഴുത്തിനെയും വായനയെയും കൈവിടാതെ മുന്നോട്ടുപോയ ഹാറൂൺ റഷീദിന്റെ സാഹിത്യജീവിതത്തിലെ ശ്രദ്ധേയമായ നേട്ടമായി പുസ്തക പ്രകാശനം മാറി.
Follow us on :
Tags:
More in Related News
Please select your location.