Tue Dec 12, 2023 10:56 PM 1ST

Sign In

ദേശീയ ദിനാഘോഷങ്ങൾ സുരക്ഷിതമാക്കണം

19 Nov 2026 16:27 IST

ENLIGHT MEDIA OMAN

Share News :

മസ്ക‌റ്റ്: ഒമാന്റെ 56-ാമത് ദേശീയദിനാഘോഷങ്ങൾ ഉത്തരവാദിത്തത്തോടെയും സുരക്ഷാ മുൻകരുതലുകളോടെയും നടത്തണമെന്ന് റോയൽ ഒമാൻ പൊലീസ് പൊതുജനങ്ങളോട് അഭ്യർഥിച്ചു.

ആഘോഷങ്ങളുടെ ഭാഗമായി പൊതുസുരക്ഷയ്ക്കും ഗതാഗതത്തിനും ക്രമസമാധാനത്തിനും തടസ്സമുണ്ടാക്കുന്ന പ്രവർത്തനങ്ങളിൽനിന്ന് എല്ലാവരും വിട്ടുനിൽക്കണമെന്നും അധികൃതർ നിർദേശിച്ചു.

ദേശീയദിനാഘോഷങ്ങളുടെ ഭാഗമായി പൊതുസ്ഥലങ്ങളിൽ അനാവശ്യമായി ഒത്തുകൂടുന്നതും ബഹളമുണ്ടാക്കുന്നതും വാഹനങ്ങൾ ഉപയോഗിച്ച് അഭ്യാസപ്രകടനങ്ങൾ നടത്തുന്നതും ഒഴിവാക്കണം. ഗതാഗതനിയമങ്ങൾ കർശനമായി പാലിക്കുകയും സുരക്ഷ ഉറപ്പാക്കുന്നതിനായി പൊലീസ് ഉദ്യോഗസ്ഥർ നൽകുന്ന നിർദേശങ്ങളോട് പൂർണമായി സഹകരിക്കുകയും വേണം. ആഘോഷങ്ങളിൽ കുട്ടികൾ ഉത്തരവാദിത്തത്തോടെയും സുരക്ഷിതമായും പങ്കെടുക്കുന്നുവെന്ന് മാതാപിതാക്കളും രക്ഷിതാക്കളും പ്രത്യേകം ഉറപ്പുവരുത്തണമെന്നും റോയൽ ഒമാൻ പൊലീസ് അഭ്യർഥിച്ചു.

നിയമവിരുദ്ധമായ ആൾക്കൂട്ടങ്ങൾക്കെതിരെ കർശന ശിക്ഷ

അതേസമയം, പൊതുസുരക്ഷയെയും ക്രമസമാധാനത്തെയും ബാധിക്കുന്ന തരത്തിലുള്ള നിയമവിരുദ്ധമായ ഒത്തുചേരലുകൾക്കെതിരെ ഒമാനിൽ കർശനമായ നിയമനടപടികളാണ് നിലവിലുള്ളതെന്ന് അധികൃതർ പുറത്തിറക്കിയ നിയമബോധവത്കരണ അറിയിപ്പിൽ വ്യക്തമാക്കുന്നു.

ഒമാൻ ശിക്ഷാനിയമത്തിലെ 121-ാം വകുപ്പ് പ്രകാരം, പൊതുസുരക്ഷയ്ക്കോ ക്രമസമാധാനത്തിനോ ഭീഷണിയാകാൻ സാധ്യതയുള്ള സാഹചര്യത്തിൽ പൊതുസ്ഥലത്ത് പത്തോ അതിലധികമോ ആളുകൾ ഒത്തുചേരുന്നതും, പിരിഞ്ഞുപോകാൻ ബന്ധപ്പെട്ട അധികാരികൾ നിർദേശിച്ചിട്ടും കൂട്ടമായി തുടരുന്നതും കുറ്റകരമാണ്.

ഇത്തരം കുറ്റങ്ങൾക്ക് പരമാവധി ഒരു വർഷം തടവോ 500 ഒമാനി റിയാൽ വരെ പിഴയോ അല്ലെങ്കിൽ ഇവയിൽ ഏതെങ്കിലും ഒരു ശിക്ഷയോ ലഭിക്കാം.

ഒത്തുചേർന്നവർ നടത്തുന്ന അക്രമപ്രവർത്തനങ്ങൾക്ക് ഒരാൾ പ്രേരിപ്പിക്കുകയോ അത്തരം അക്രമങ്ങളിൽ പങ്കാളിയാകുകയോ ചെയ്താൽ ശിക്ഷ കൂടുതൽ കടുപ്പിക്കും. ഈ സാഹചര്യത്തിൽ പരമാവധി മൂന്ന് വർഷം തടവോ 1,000 ഒമാനി റിയാൽ വരെ പിഴയോ അല്ലെങ്കിൽ ഇവയിൽ ഏതെങ്കിലും ഒരു ശിക്ഷയോ ലഭിക്കുമെന്ന് നിയമബോധവത്കരണ അറിയിപ്പിൽ വ്യക്തമാക്കുന്നു.

ദേശീയദിനം രാജ്യത്തിന്റെ ഐക്യവും പാരമ്പര്യവും അഭിമാനവും വിളിച്ചോതുന്ന ആഘോഷമാണ്. അതിന്റെ സന്തോഷവും ആവേശവും മറ്റുള്ളവരുടെ സുരക്ഷയ്ക്കും പൊതുസമാധാനത്തിനും ഭീഷണിയാകാത്ത വിധത്തിൽ പ്രകടിപ്പിക്കേണ്ടത് ഓരോരുത്തരുടെയും ഉത്തരവാദിത്തമാണ്. നിയമങ്ങൾ പാലിച്ചും അധികൃതരുമായി സഹകരിച്ചും ആഘോഷങ്ങളിൽ പങ്കുചേരണമെന്ന് റോയൽ ഒമാൻ പൊലീസ് പൊതുജനങ്ങളോട് അഭ്യർഥിച്ചു.

Follow us on :

More in Related News