Tue Dec 12, 2023 10:56 PM 1ST

Sign In

ഒമാൻ പ്രവാസ ജീവിതത്തിന് വിരാമം; എഴുത്തുകാരൻ ഹാറൂൺ റഷീദിന് വായനക്കൂട്ടം ഒമാന്റെ ഹൃദയപൂർവമായ യാത്രയയപ്പ്

19 Nov 2026 14:10 IST

ENLIGHT MEDIA OMAN

Share News :

മസ്‌കറ്റ്: നീണ്ടകാലത്തെ ഒമാൻ പ്രവാസജീവിതത്തിന് വിരാമമിട്ട് നാട്ടിലേക്ക് മടങ്ങുന്ന എഴുത്തുകാരനും വായനക്കൂട്ടം ഒമാൻ അംഗവുമായ ഹാറൂൺ റഷീദിന് സ്നേഹനിർഭരമായ യാത്രയയപ്പ് നൽകി വായനക്കൂട്ടം ഒമാൻ. വർഷങ്ങളായി ഒമാനിലെ മലയാളി സാഹിത്യ-സാംസ്കാരിക കൂട്ടായ്മകളുടെ ഭാഗമായി പ്രവർത്തിച്ച അദ്ദേഹത്തിന്റെ മടക്കയാത്രയോടനുബന്ധിച്ച് സംഘടിപ്പിച്ച ചടങ്ങിൽ നിരവധി സാഹിത്യപ്രേമികളും സുഹൃത്തുക്കളും സഹപ്രവർത്തകരും പങ്കെടുത്തു.

നവംബർ 17 ചൊവ്വാഴ്ച രാത്രി മസ്‌കറ്റിലെ സി.ബി.ഡി.യിലുള്ള അൽബാജ് ബുക്‌സിൽ നടന്ന ചടങ്ങ് വായനയും സൗഹൃദവും സാഹിത്യവും ഒത്തുചേർന്ന ഹൃദ്യമായ സംഗമമായി. അന്നേദിവസം സംഘടിപ്പിച്ച പുസ്തകപരിചയവും ചർച്ചയും പൂർത്തിയായതിനു പിന്നാലെയാണ് ഹാറൂൺ റഷീദിനുള്ള യാത്രയയപ്പ് ചടങ്ങ് നടന്നത്.

പ്രവാസജീവിതത്തിന്റെ തിരക്കുകൾക്കിടയിലും വായനയോടും എഴുത്തിനോടും സാഹിത്യചർച്ചകളോടും ആത്മബന്ധം പുലർത്തിയ വ്യക്തിത്വമാണ് ഹാറൂൺ റഷീദ്. ഒമാനിലെ മലയാളി സാഹിത്യസമൂഹത്തിൽ തന്റെ വായനാനുഭവങ്ങളും നിരീക്ഷണങ്ങളും ആശയങ്ങളും പങ്കുവെച്ചുകൊണ്ട് അദ്ദേഹം ശ്രദ്ധേയമായ സാന്നിധ്യമായി. പുസ്തകങ്ങളെ അടുത്തറിയാനും വായനാനുഭവങ്ങൾ പങ്കുവെക്കാനും സാഹിത്യകൃതികളെക്കുറിച്ച് തുറന്ന സംവാദങ്ങൾ നടത്താനും വായനക്കൂട്ടം ഒമാൻ ഒരുക്കിയ വേദികളിൽ അദ്ദേഹം സജീവമായി ഇടപെട്ടിരുന്നു.

മലയാളത്തിൽ കഥാരചനയിലും സജീവമായ ഹാറൂൺ റഷീദിന്റെ പ്രധാന കൃതികളിലൊന്നാണ് മാതൃഭൂമി പ്രസിദ്ധീകരിച്ച 'ഒമാനിലെ നാടോടിക്കഥകൾ'. ഒമാനിലെ ജനതയ്ക്കിടയിൽ തലമുറകളായി കൈമാറിവന്നതും വാമൊഴിയായി പ്രചരിച്ചിരുന്നതുമായ നാടോടിക്കഥകൾ സമാഹരിച്ച ഈ പുസ്തകത്തിൽ 118 പേജുകളിലായി വിവിധ കഥകൾ ഉൾപ്പെടുത്തിയിട്ടുണ്ട്. ഒമാന്റെ തനതായ ജീവിതരീതികളും സാംസ്കാരിക പശ്ചാത്തലവും നാടോടി പാരമ്പര്യവും മലയാളി വായനക്കാർക്ക് പരിചയപ്പെടുത്തുന്ന ശ്രദ്ധേയമായ കൃതിയാണിത്. ഒമാന്റെ സാംസ്കാരിക പൈതൃകത്തെ മലയാള സാഹിത്യത്തിലൂടെ അടയാളപ്പെടുത്തുന്ന ഈ പുസ്തകം അദ്ദേഹത്തിന്റെ സാഹിത്യപ്രവർത്തനങ്ങളിലെ പ്രധാന സംഭാവനകളിലൊന്നാണ്.

എഴുത്തിനൊപ്പം സാഹിത്യനിരൂപണത്തിലും പുസ്തകചർച്ചകളിലും അദ്ദേഹം താൽപര്യം പുലർത്തിയിരുന്നു. ഒമാൻ ഒബ്‌സർവർ മുൻ സീനിയർ എഡിറ്റർ ടോബി സാലിൻസിന്റെ കവിതാസമാഹാരമായ 'ഉറങ്ങാത്ത ജനാല' യുടെ പ്രകാശനത്തോടനുബന്ധിച്ച് നടന്ന ചടങ്ങിൽ കവിതകളുടെ സവിശേഷതകൾ വിശകലനം ചെയ്തുകൊണ്ട് ഹാറൂൺ റഷീദ് ആഴത്തിലുള്ള നിരൂപണം അവതരിപ്പിച്ചിരുന്നു. ഒമാനിലെ വിവിധ സാഹിത്യസദസ്സുകളിലും പുസ്തകപരിചയ പരിപാടികളിലും അദ്ദേഹത്തിന്റെ സാന്നിധ്യവും ഇടപെടലുകളും ശ്രദ്ധേയമായിരുന്നു.

പ്രവാസി മലയാളികൾക്കിടയിൽ വായനാശീലം വളർത്തുന്നതിനും സാഹിത്യകൃതികളെക്കുറിച്ചുള്ള ആരോഗ്യകരമായ സംവാദങ്ങൾക്ക് വേദിയൊരുക്കുന്നതിനും വായനക്കൂട്ടം ഒമാൻ നടത്തുന്ന പ്രവർത്തനങ്ങളിൽ ഹാറൂൺ റഷീദ് സജീവ പങ്കാളിയായിരുന്നു. പുസ്തകങ്ങളെ കേവലം വായനയിൽ ഒതുക്കാതെ അവയെക്കുറിച്ചുള്ള ചിന്തകളും ആശയങ്ങളും മറ്റുള്ളവരുമായി പങ്കുവെക്കണമെന്ന നിലപാടാണ് അദ്ദേഹത്തെ വായനക്കൂട്ടത്തിന്റെ പ്രവർത്തനങ്ങളിൽ കൂടുതൽ സജീവനാക്കിയത്.

യാത്രയയപ്പ് ചടങ്ങിൽ ഷൗക്കത്ത് അലി സ്വാഗതം ആശംസിച്ചു. സിദ്ദീഖ് ഹസ്സൻ മോഡറേറ്ററായി. ഹാറൂൺ റഷീദുമായുള്ള ദീർഘകാല സൗഹൃദവും അദ്ദേഹത്തിന്റെ സാഹിത്യപ്രവർത്തനങ്ങളും വായനക്കൂട്ടം ഒമാനുമായുള്ള ആത്മബന്ധവും അനുസ്മരിച്ചുകൊണ്ട് ചടങ്ങിൽ പങ്കെടുത്തവർ ആശംസകൾ നേർന്നു. ഒമാനിലെ സാഹിത്യ-സാംസ്കാരിക മേഖലകളിൽ അദ്ദേഹം നൽകിയ സംഭാവനകളെയും സൗഹൃദബന്ധങ്ങളെയും പങ്കെടുത്തവർ സ്നേഹപൂർവം ഓർത്തെടുത്തു.

മനോജ് കെ.ടി., സന്തോഷ് കുമാർ, ചന്ദ്രശേഖരൻ, കുര്യൻ പോൾ, റഫീഖ്, സജീവൻ കെ.എസ്., സെയ്ദലി, രാജൻ വി. കൊക്കൂരി, റുക്സാന സാദിഖ്, ഫസലു റഹ്മാൻ, ജസീല നാസർ, ലക്ഷ്മി, മിനി സുനിൽ, സുമി ഐ.എസ്., ജിന്റു, ഇന്ദു, ആസിഫ്, സഞ്ജീവ് പി., ജി. സുനിൽകുമാർ, നിഷ പ്രഭാകരൻ, ലീല എസ്., രാജേഷ് കുമാർ, മുഹമ്മദ് യാസീൻ, ഒ.കെ. മുഹമ്മദ് അലി, ഷബീർ വി.കെ., ചാന്ദിനി മനോജ്, രാജി ദാമോദരൻ തുടങ്ങിയവർ ചടങ്ങിൽ പങ്കെടുത്തു.

കോഴിക്കോട് സ്വദേശിയായ ഹാറൂൺ റഷീദ് ഒമാനിലെ പ്രവാസജീവിതം അവസാനിപ്പിച്ച് നാട്ടിലേക്ക് മടങ്ങുമ്പോൾ, ഇവിടെ രൂപപ്പെട്ട സൗഹൃദങ്ങളും സാഹിത്യാനുഭവങ്ങളും വായനക്കൂട്ടവുമായുള്ള ബന്ധങ്ങളും വിലപ്പെട്ട ഓർമകളായി കൂടെയുണ്ടാകും. പ്രവാസത്തിന്റെ ഭൂമിശാസ്ത്രപരമായ അകലം അവസാനിക്കുമ്പോഴും വായനയുടെയും എഴുത്തിന്റെയും ലോകത്ത് അദ്ദേഹത്തിന്റെ സാന്നിധ്യം തുടരുമെന്ന പ്രതീക്ഷയാണ് സുഹൃത്തുക്കളും സഹപ്രവർത്തകരും പങ്കുവെച്ചത്.

പുതിയ ജീവിതയാത്രയിലേക്ക് കടക്കുന്ന ഹാറൂൺ റഷീദിന് എല്ലാവിധ ആശംസകളും നേർന്നുകൊണ്ടാണ് ചടങ്ങ് സമാപിച്ചത്. ഒമാനിലെ മലയാളി സാഹിത്യസൗഹൃദങ്ങൾക്ക് മറക്കാനാകാത്തൊരു അധ്യായം സമ്മാനിച്ചാണ് അദ്ദേഹം നാട്ടിലേക്ക് മടങ്ങുന്നത്.

Follow us on :

More in Related News