Cyber security agency against cyberbullying.

ദോഹ: വ്യക്തികളുടെ സ്വകാര്യ വിവരങ്ങൾ ആവശ്യപ്പെട്ട് നടക്കുന്ന സാമ്പത്തിക തട്ടിപ്പുകൾക്കെതിരെ ജാഗ്രത നിർദേശവുമായി ദേശീയ സൈബർ സെക്യൂരിറ്റി ഏജൻസി (എൻ.സി.എസ്.എ). സമൂഹമാധ്യമങ്ങൾ വഴി പങ്കുവെച്ച നിർദേശത്തിലാണ് ദേശീയ സൈബർ സെക്യൂരിറ്റിയിൽനിന്നെന്ന പേരിൽ വ്യക്തിഗത-ബാങ്കിങ് വിവരങ്ങൾ തട്ടിപ്പു സംഘം ശേഖരിക്കുന്നതായി ശ്രദ്ധയിൽ പെട്ടതായും ഇത്തരം തട്ടിപ്പുകൾക്കെതിരെ ജാഗ്രത പാലിക്കണമെന്നും നിർദേശം നൽകിയത്.

ആഭ്യന്തര മന്ത്രാലയവും ഖത്തർ സെൻട്രൽ ബാങ്കും നേരത്തേ ഇത്തരം തട്ടിപ്പുകൾക്കെതിരെ മുന്നറിയിപ്പ് നൽകിയിരുന്നു. വ്യക്തിഗത വിവരങ്ങൾ ആവശ്യപ്പെട്ട് വിളിക്കുന്ന ഏജൻസിയുമായോ തട്ടിപ്പു സംഘങ്ങളുമായോ സ്വകാര്യ, ബാങ്കിങ് വിവരങ്ങൾ പങ്കുവെക്കരുതെന്നും ഇത് സൈബർ തട്ടിപ്പിനും സാമ്പത്തിക നഷ്ടങ്ങൾക്കും ഇടവരുത്തുമെന്നും ദേശീയ സൈബർ സെക്യൂരിറ്റി മുന്നറിയിപ്പ് നൽകി. ഏജൻസിയുടെ പേരിൽ ഇത്തരം ഫോൺ കാളുകൾ വന്നാൽ പ്രതികരിക്കരുതെന്ന് അധികൃതർ ഓർമപ്പെടുത്തുന്നു. വ്യക്തിഗത വിവരങ്ങൾ ചോർത്തുന്നതിനും മൊബൈൽ ഫോണും മറ്റ് ഉപകരണങ്ങളും ഹാക്ക് ചെയ്യപ്പെടുന്നതിനും ഇത്‌ കാരണമാകുമെന്നും അധികൃതർ വ്യക്തമാക്കി.