വൈക്കത്തഷ്ടമി ഉത്സവത്തിന് നാളെ കൊടിയേറും; ക്ഷേത്രനഗരി ഇനി 13 ദിനരാത്രങ്ങൾ ഉത്സവ ലഹരിയിലമരും.

വൈക്കം: വൈക്കം മഹാദേവക്ഷേത്രത്തിലെ അഷ്ടമി ഉത്സവത്തിന് നാളെ കൊടിയേറുന്നതോടെ 13 ദിനരാത്രങ്ങൾ ക്ഷേത്രനഗരി ഉത്സവ ലഹരിയിലമരും.

ദക്ഷിണേന്ത്യയിലെ പേരെടുത്ത കലാകാരന്മാർ നാദ ശരീരൻ്റെ സന്നിധിയിൽ നാട്യ, താള,മേള വിസ്മയം ഒരുക്കും.നാളെ രാവിലെ 6.30നും 7.30നും മധ്യേ തന്ത്രിമാരായ ഭദ്രകാളി മറ്റപ്പിള്ളി നാരായണന്‍ നമ്പൂതിരിയുടെയും കിഴക്കിനിയേടത്ത് മേക്കാട് ഇല്ലത്ത് മാധവന്‍ നമ്പൂതിരിയുടെയും മുഖ്യകാര്‍മികത്വത്തിലാണ് കൊടിയേറ്റ്. തിരുവിതാംകൂര്‍ ദേവസ്വം ബോര്‍ഡ് കമ്മീഷണര്‍ ബി. സുനില്‍കുമാര്‍ കൊടിക്കീഴില്‍ ഭദ്രദീപം തെളിയിക്കും. നടന്‍ ദിലീപും നടി ഗൗരിനന്ദയും ചേര്‍ന്ന് കലാമണ്ഡപത്തില്‍ തിരിതെളിയിക്കും. തുടര്‍ന്ന് ആദ്യശ്രീബലി. രാത്രി ഒമ്പതിന് കൊടിപ്പുറത്തുവിളക്ക്.

ഡിസംബര്‍ രണ്ടിന് വൈകിട്ട് 5ന് കാഴ്ചശ്രീബലി. രാത്രി 8.30ന് കര്‍ണാട്ടിക് ലയവാദ്യസമുച്ചയം. 3 ന് രാവിലെ 8ന് ശ്രീബലി, വൈകിട്ട് 5ന് കാഴ്ചശ്രീബലി, രാത്രി 8 ന് ഭക്തിഗാനമഞ്ജരി, 8.45ന് ഭക്തിഗാനസുധ. 4 ന് വൈകിട്ട് 5ന് കാഴ്ചശ്രീബലി, രാത്രി 9 ന് വിളക്ക്. 5 ന് ഉച്ചയ്ക്ക് 1 ന് ഉത്സവബലിദര്‍ശനം, വൈകിട്ട് 5ന് കാഴ്ചശ്രീബലി, രാത്രി 11ന് കൂടിപ്പുജവിളക്ക്. 6 ന് ഉച്ചയ്ക്ക് 1 ന് ഉത്സവബലിദര്‍ശനം, രാത്രി 7 ന് ക്ലാസിക്കല്‍ ഫ്യൂഷന്‍, 10ന് വിളക്ക്. 7ന് രാവിലെ 8 ശ്രീബലി, 11ന് കീഴൂര്‍ മധുസൂദനക്കുറുപ്പിന്റെ മേജര്‍സെറ്റ് പഞ്ചവാദ്യം. തുടര്‍ന്ന് തേരോഴിരാമക്കുറുപ്പിന്റെ പഞ്ചാരിമേളം, രാത്രി 11ന് ഋഷഭവാഹനം എഴുന്നള്ളിപ്പ്. 8 ന് രാവിലെ 8ന് ശ്രീബലി എഴുന്നള്ളിപ്പ്. 10.30ന് കാലാക്കല്‍ ക്ഷേത്രത്തില്‍ നിന്നും ഉടവാള്‍ എഴുന്നള്ളിപ്പ്, ഉച്ചയ്ക്ക് 2 ന് ഉത്സവബലിദര്‍ശനം, വൈകിട്ട് 5ന് കാഴ്ചശ്രീബലി, രാത്രി 11ന് മേജര്‍സെറ്റ് കഥകളി. 9 ന് രാവിലെ 8ന് ഗജപൂജ, വൈകിട്ട് 4ന് ആനയൂട്ട്, 4.30ന് കാഴ്ചശ്രീബലി, പെരുവനംകുട്ടന്‍മാരാരും സംഘവും അവതരിപ്പിക്കുന്ന മേജര്‍സെറ്റ് പഞ്ചാരിമേളം, രാത്രി 10ന് മേജര്‍സെറ്റ് കഥകളി. 10ന് രാവിലെ 10ന് ശ്രീബലി, ഉച്ചയ്ക്ക് 1ന് ചോറ്റാനിക്കര നന്ദപ്പമാരാരും സംഘവും അവതരിപ്പിക്കുന്ന മേജര്‍സെറ്റ് പഞ്ചവാദ്യം, വൈകിട്ട് 5ന് കാഴ്ചശ്രീബലി, രാത്രി 9.30ന് പിന്നണി ഗായകരായ വൈക്കം വിജയലക്ഷ്മിയും പള്ളിപ്പുറം സുനിലും ചേര്‍ന്ന് അവതരിപ്പിക്കുന്ന ഭക്തിഗാനമേള, 11ന് വലിയ വിളക്ക്. 11ന് രാവിലെ 8ന് ശ്രീബലി, ഉച്ചയ്ക്ക് 2 ന് ഉത്സവബലിദര്‍ശനം, വൈകിട്ട് 5ന് കാഴ്ചശ്രീബലി, രാത്രി 7.45ന് വയലിനിസ്റ്റ് ഗംഗാ ശശിധരനും സംഘവും അവതരിപ്പിക്കുന്ന ഗംഗാതരംഗം.

12ന് പുലര്‍ച്ചെ 4.30 മുതല്‍ അഷ്ടമിദര്‍ശനം, രാവിലെ 9 ന് യാഴ്പാണം പി.എസ്.ബാലമുരുകന്‍ ജാഫ്‌ന, പി.എസ്. സാരംഗ് ജാഫ്‌ന എന്നിവരുടെ നാദസ്വരകച്ചേരി. വൈകിട്ട് ആറിന് ഹിന്ദുമത കണ്‍വെന്‍ഷന്‍. ഉദ്ഘാടനം ജസ്റ്റിസ് എന്‍.നഗരേഷ്. തിരുവിതാംകൂര്‍ ദേവസ്വംബോര്‍ഡ് പ്രസിഡന്റ് കെ. ജയകുമാര്‍ അധ്യക്ഷത വഹിക്കും. രാത്രി 7.30ന് നൃത്താര്‍ച്ചന, 9 ന് സംഗീതസദസ്സ്, 11ന് ഉദയനാപുരത്തപ്പന്റെ വരവ്, 13ന് പുലര്‍ച്ചെ രണ്ടിന് അഷ്ടമിവിളക്ക്, വലിയകാണിക്ക, 3.30ന് ഉദയനാപുരത്തപ്പന്റെ യാത്രയയപ്പ്. വൈകിട്ട് ആറിന് ആറാട്ട് എഴുന്നള്ളിപ്പ്, രാത്രി 11ന് ഉദയനാപുരം സുബ്രഹ്‌മണ്യസ്വാമി ക്ഷേത്രത്തില്‍ കൂടിപ്പൂജ വിളക്ക്.14 ന് രാവിലെ 11ന് മുക്കുടി നിവേദ്യം.

കൊടിയേറ്റിന് മുന്നോടിയായി

മഹാദേവ ക്ഷേത്രത്തിലെ കൊടിയേറ്ററിയിപ്പ് ഞായറാഴ്ച നടന്നു. വൈക്കം ക്ഷേത്രത്തിലെ വിശേഷാൽ ചടങ്ങുകൾക്ക് ശേഷം ആചാരപ്രകാരം അവകാശിയായ മൂസത് ഓലക്കുട ചൂടി ചമയങ്ങളില്ലാത്ത ആനപ്പുറത്തെഴുന്നള്ളി ഉദയനാപുരം ക്ഷേത്രത്തിൽ കൊടിയേറ്ററിയിച്ചു.ഗജരാജൻ തടത്താ വിള സുരേഷ് അകമ്പടിയായി.

ഉദയനാപുരം ക്ഷേത്രത്തിലെ പന്തീരടി പൂജയ്ക്ക് ശേഷം മുഹൂർത്ത ചാർത്ത് വായിച്ച് കൊടിയേറ്ററിയിച്ചു.തുടർന്ന് പെരുമ്പള്ളിയാഴത്ത് മനയെ പ്രതിനിധീകരിച്ച് അയ്യർകുളങ്ങര കുന്തീദേവി ക്ഷേത്രത്തിലും ഇണ്ടംതുരുത്തി മനയിലും എത്തി ആചാര പ്രകാരം കൊടിയേറ്ററിയിച്ചു. അതാത് അവസരങ്ങളിലെ ഊരാഴ്മക്കാർ ഉത്സവ വിവരം ഔദിഗികമായി ക്ഷേത്ര ഉടമസ്ഥരായ മറ്റു ഊരാഴ്മക്കാരെ അറിയിക്കുന്നതാണ് ചടങ്ങ്.