ചരിത്രപ്രസിദ്ധമായ വൈക്കത്തഷ്ടമി മഹോത്സവത്തിന് ഡിസംബർ ഒന്നിന് കൊടിയേറും; പ്രസിദ്ധമായ അഷ്ടമി ദർശനം 12 ന് പുലർച്ചെ 4.30 ന്.

വൈക്കം: വൈക്കം മഹാദേവ ക്ഷേത്രത്തിലെ അഷ്ടമി മഹോത്സവത്തിന് ഡിസംബർ ഒന്നിന് രാവിലെ 6.30 നും 7.30 നും ഇടയിൽ തന്ത്രിമാരായ ഭദ്രകാളി മറ്റപ്പള്ളി നാരായണൻ നമ്പൂതിരി, കിഴക്കിനിയേടത്ത് മേക്കാട് മാധവൻ നമ്പൂതിരി എന്നിവരുടെ കാർമ്മികത്വത്തിൽ കൊടിയേറും. പ്രസിദ്ധമായ വൈക്കത്തഷ്ടമി 12നാണ്. അഷ്ടമി ദർശനം പുലർച്ചെ 4.30 നും ഉദയനാപുരത്തപ്പന്റെ വരവ്, അഷ്ടമി വിളക്ക് എന്നിവ രാത്രി 10 നും നടക്കും. 13ന് വൈകിട്ട് 5ന് ആറാട്ട്. 14 ന് രാവിലെ 11ന് മുക്കുടി നിവേദ്യം.കൊടിയേറ്റിന് മുന്നോടിയായി ആചാരനിറവിൽ സംയുക്ത എൻ.എസ്.എസ് കരയോഗങ്ങൾ നാളെ കുലവാഴപ്പുറപ്പാട് നടത്തും. വൈക്കം മഹാദേവക്ഷേത്രത്തിലെ അഷ്ടമി മഹോത്സവത്തിൻ്റെ ഭാഗമായ കുലവാഴ പുറപ്പാട് ടൗണിലെ ആറ് എൻ.എസ്.എസ് കരയോഗങ്ങൾ ചേർന്നാണ് നടത്തുക. താലൂക്ക് യൂണിയൻ മേൽനോട്ടം വഹിക്കും. വൈകിട്ട് 4 ന് ആറാട്ടുകുളങ്ങര ക്ഷീരവൈകുണ്ഠപുരം പാർത്ഥസാരഥി ക്ഷേത്രത്തിൽ നിന്നും പുറപ്പെടുന്ന കുലവാഴ പുറപ്പാടിന് 1573-ാം നമ്പർ കിഴക്കുംചേരി നടുവിലെമുറി കരയോഗമാണ് ആതിഥേയത്വം വഹിക്കുന്നത്. താലപ്പൊലി, വിവിധ വാദ്യമേളങ്ങൾ, മുത്തുക്കുട, ഗജവീരൻ എന്നിവ അകമ്പടിയാകും.കുലവാഴ പുറപ്പാട് മുരിയൻ കുളങ്ങര, ദളവാക്കുളം, കിഴക്കേ നട, പടിഞ്ഞാറെ നട വഴി വടക്കേ ഗോപുരനടയിൽ എത്തും. വൈകിട്ട് 6.30 ന് ക്ഷേത്ര ഭാരവാഹികൾ ക്ഷേത്രത്തിലേക്ക് ആനയിക്കും. കുലവാഴകളും കരിക്കിൻ കുലകളും കൊടിമരച്ചുവട്ടിൽ സമർപ്പിക്കും. തുടർന്ന് ക്ഷേത്രത്തിന്റെ പ്രധാന ഭാഗങ്ങളിൽ കെട്ടി അലങ്കരിക്കും. അഷ്ടമി ഒന്നും രണ്ടും ഉത്സവങ്ങളിൽ കരയോഗങ്ങളുടെ നേതൃത്വത്തിൽ അഹസും കലാപരിപാടികളും നടക്കും. വൈക്കത്തഷ്ടമിയുടെ കോപ്പു തൂക്കൽ നാളെ ക്ഷേത്രകലവറയിൽ നടക്കും. രാവിലെ 10 നും 11.30 നും ഇടയിലാണ് കോപ്പു തൂക്കൽ. ക്ഷേത്രത്തിലെ ആട്ടവിശേഷമായി വരുന്ന അടിയന്തരങ്ങൾക്ക് മുൻപായി നടത്തുന്ന ചടങ്ങാണ് കോപ്പുതുക്കൽ. വൈക്കത്തപ്പനും ഉപദേവതമാർക്കും വിശേഷാൽ വഴിപാട് നടത്തിയ ശേഷമാണ് ചടങ്ങ്. ദേവസ്വം ഭരണാധികാരി അഷ്ടമിക്ക് ആവശ്യമായ സാധനങ്ങൾ അളന്നു തൂക്കി ക്ഷേത്ര കാര്യക്കാരനെ എൽപ്പിക്കുന്നതാണ് ചടങ്ങ്. പ്രതീകാന്മകമായി മംഗള വസ്തുക്കളായ മഞ്ഞളും ചന്ദനവുമാണ് അളന്ന് എല്പിക്കുക. മഹാദേവ ക്ഷേത്രത്തിലെ കൊടിയേറ്ററിയിപ്പും നാളെ നടക്കും. വൈക്കം ക്ഷേത്രത്തിലെ വിശേഷാൽ ചടങ്ങുകൾക്ക് ശേഷം ആചാരപ്രകാരം അവകാശിയായ മൂസത് ഓലക്കുട ചൂടി ചമയങ്ങളില്ലാത്ത ആനപ്പുറത്തെഴുന്നള്ളി ഉദയനാപുരം ക്ഷേത്രത്തിൽ കൊടിയേറ്ററിയിക്കും. ഉദയനാപുരം ക്ഷേത്രത്തിലെ പന്തീരടി പൂജയ്ക്ക് ശേഷമാണ് മുഹൂർത്ത ചാർത്ത് വായിച്ച് കൊടിയേറ്ററിയിക്കുന്നത്. പെരുമ്പള്ളിയാഴത്ത് മനയെ പ്രതിനിധീകരിച്ച് അയ്യർകുളങ്ങര കുന്തീദേവി ക്ഷേത്രത്തിലും ഇണ്ടംതുരുത്തി മനയിലും എത്തി ആചാര പ്രകാരം കൊടിയേറ്ററിയിക്കും. അതാത് അവസരങ്ങളിലെ ഊരാഴ്മക്കാർ ഉത്സവ വിവരം ഔദിഗികമായി ക്ഷേത്ര ഉടമസ്ഥരായ മറ്റു ഊരാഴ്മക്കാരെ അറിയിക്കുന്നതാണ് ചടങ്ങ്. വൈക്കം മഹാദേവക്ഷേത്രത്തിലെ അഷ്ടമി ഉത്സവം നടക്കുന്ന ഡിസംബർ ഒന്നു മുതൽ 13 വരെ ക്ഷേത്രവും എട്ടു കിലോമീറ്റർ ചുറ്റളവിലുള്ള പ്രദേശങ്ങളും ഉത്സവമേഖലയായി പ്രഖ്യാപിച്ചുകൊണ്ട് ജില്ലാ കളക്ടർ ചേതൻകുമാർ മീണ ഉത്തരവായി.