ഒമാൻ കൃഷിക്കൂട്ടം വിളവെടുപ്പ് ഉത്സവം ആഘോഷിച്ചു; ‎ ബിൻസി ജെയിംസിന് പ്രകൃതി മിത്ര അവാർഡ്

മസ്‌കറ്റ്: മണ്ണറിഞ്ഞും പ്രകൃതിയെ സ്നേഹിച്ചും പ്രവാസലോകത്ത് കാർഷിക ‎സംസ്കാരം പരിപോഷിപ്പിക്കുന്ന ഒമാൻ കൃഷിക്കൂട്ടത്തിന്റെ ഈ വർഷത്തെ ‎വിളവെടുപ്പ് ഉത്സവം മേയ് 8-ന് വാദി കബീറിലെ മജാൻ ഹൈറ്റ്‌സിൽ ‎അതിവിപുലമായി ആഘോഷിച്ചു.

കൃഷി സ്നേഹികളും പ്രമുഖ വ്യക്തിത്വങ്ങളും ‎പങ്കെടുത്ത ചടങ്ങ് ഒമാൻ പ്രവാസികൾക്കിടയിൽ വേറിട്ടൊരു അനുഭവമായി ‎മാറി.

അഡ്മിൻ പാനൽ അംഗമായ സന്തോഷ് വർഗീസ് അധ്യക്ഷത വഹിച്ച ‎ചടങ്ങിൽ ചലച്ചിത്ര-സീരിയൽ താരം വിനോദ് കോവൂർ ‎മുഖ്യാതിഥിയായിരുന്നു.

ശ്രീജിത്ത് കുമരകം സ്വാഗതം നേർന്ന ചടങ്ങിൽ, ‎സംഘടനയുടെ ഭാവി പ്രവർത്തനങ്ങളെയും ലക്ഷ്യങ്ങളെയും കുറിച്ച് അഡ്മിൻ ‎പാനൽ അംഗമായ സുനി ശ്യാം വിശദീകരിച്ചു.‎

ഈ വർഷത്തെ ഒമാൻ കൃഷിക്കൂട്ടം 'പ്രകൃതിമിത്ര' പുരസ്കാരം ബിൻസി ‎ജെയിംസിന് ലഭിച്ചു. മുഖ്യാതിഥി വിനോദ് കോവൂരിൽനിന്ന് ഫലകവും, ‎പുരസ്കാര തുകയും ബിൻസി ഏറ്റുവാങ്ങി.‎

കഠിനാധ്വാനത്തിലൂടെ കൃഷിയിൽ മികച്ച നേട്ടം കൈവരിച്ച കർഷകർക്കായി ‎വിവിധ വിഭാഗങ്ങളിൽ സംഘടിപ്പിച്ച മത്സര വിജയികളെയും ചടങ്ങിൽ ‎ആദരിച്ചു.

പോട്ട് വിഭാഗത്തിൽ മസ്ക‌റ്റിലെ സുമിത്ര സെൽവൻ ഒന്നാം സ്ഥാനവും, ബുറൈമിയിലെ സുനിത ഹരിദാസ് ‎ രണ്ടാം സ്ഥാനവും, സൊഹാറിലെ തോമസ് അലക്സാണ്ടർ മൂന്നാം സ്ഥാനവും കരസ്ഥമാക്കി. ‎

പോട്ട് ആൻഡ് സോയിൽ വിഭാഗത്തിൽ സൊഹാറിലെ അനിത അനിൽകുമാർ ഒന്നാം സ്ഥാനവും, ‎ബുറൈമിയിലെ ഷൈജുമോൻ റ്റി. റ്റി രണ്ടാം സ്ഥാനവും, മസ്കറ്റിലെ ശ്രീശൈല അരുൺ മൂന്നാം സ്ഥാനവും ‎കരസ്ഥമാക്കി.

സോയിൽ വിഭാഗത്തിൽ സൊഹാറിലെ സുനീദ ബീവി ഒന്നാം സ്ഥാനവും, ‎മസ്കറ്റിലെ അരുൺകുമാർ വിജയൻ രണ്ടാം സ്ഥാനവും ‎കരസ്ഥമാക്കി.

കൂടാതെ, ഈ വർഷത്തെ ഒമാൻ 'കർഷകശ്രീ' പുരസ്കാരം നേടിയ അനിത അനിൽകുമാറിന് പുരസ്കാരവും, ഷാഹി ഫുഡ്‌സ് സ്പോൺസർ ചെയ്ത 50,000 രൂപയുടെ ‎പുരസ്കാരം സമ്മാനിച്ചു.‎

കാർഷികരംഗത്ത് മാതൃകകളായ മുതിർന്ന പൗരന്മാരായ കൃഷ്ണവേണി ‎പ്രവീൺ, മല്ലിക സുകുമാരൻ, ജോൺ യോഹന്നാൻ, മോളി ‎എബ്രഹാം എന്നിവരെ ചടങ്ങിൽ പ്രത്യേകമായി ആദരിച്ചു. ബഹുമുഖ ‎പ്രതിഭാ പുരസ്കാരത്തിന് ദിയാ നായർ അർഹയായി.‎

ഷാഹി ഫുഡ്‌സ് മാനേജിംഗ് ഡയറക്ടർ മുഹമ്മദ് അഷ്റഫ് ‎ചടങ്ങിൽ ആശംസകൾ നേർന്നു. അഡ്മിൻ പാനൽ അംഗമായ രശ്മി ‎സന്ദീപ് നന്ദിപ്രകാശനം നിർവഹിച്ചു.‎

ആഘോഷങ്ങൾക്ക് മാറ്റു കൂട്ടിക്കൊണ്ട് മലയാളം ടെലിവിഷൻ റിയാലിറ്റി ‎ഷോകളിലൂടെയും സ്റ്റേജ് പ്രകടനങ്ങളിലൂടെയും ശ്രദ്ധേയയായ പിന്നണി ഗായിക ‎രേഷ്മ രാഘവേന്ദ്ര, അനന്തപത്മനാഭൻ, സനീഷ് പി. സത്യൻ, ആർച്ച ശ്രീകുമാർ ‎എന്നിവർ അവതരിപ്പിച്ച സംഗീതവിരുന്നും, കൃഷിക്കൂട്ടം അംഗങ്ങളുടെ ‎വർണ്ണാഭമായ നൃത്തപ്രകടനങ്ങളും ചടങ്ങിന് ഉത്സവപ്രതീതിയേകി കാണികളെ ‎ആവേശത്തിലാഴ്ത്തി.‎