Banned Lyrica tablets were seized from a passenger arriving at Hamad Airport in Qatar.

ദോഹ: ഖത്തറിലേക്ക് നിരോധിത ലിറിക്ക ഗുളികകൾ കടത്താൻ ശ്രമിച്ച ഒരു യാത്രക്കാരനെ വിമാനത്താവള അധികൃതർ പിടികൂടി. ഭക്ഷണ പാത്രത്തിനുള്ളിൽ ഒളിപ്പിച്ച നിലയിൽ രാജ്യത്തേക്ക് കടത്താൻ ശ്രമിച്ച ലഹരി ഗുളികകളാണ് പിടികൂടിയത് . പാചകം ചെയ്ത ഭക്ഷണം നിറച്ച ചൂടാറാത്ത പാത്രത്തിന്റെ പുറംപാളിക്കുള്ളിലായി ഒളിപ്പിച്ച് കടത്തിയ ഗുളികകളാണ് പിടിച്ചെടുത്തത്.

യാത്രക്കാരിൽ ഒരാളുടെ ബാഗിൽ നിരോധിത ഉത്പന്നം ഉണ്ടെന്ന കസ്റ്റംസ് ഇൻസ്പെക്ടറുടെ സംശയത്തെ തുടർന്നാണ് പ്രത്യേക ഉപകരണങ്ങൾ ഉപയോഗിച്ചുള്ള പരിശോധന നടത്തിയത്. ഫോയിൽ പേപ്പറിൽ പൊതിഞ്ഞ നിലയിൽ 2100 ലിറിക ഗുളികകൾ ഇയാളിൽനിന്ന് കണ്ടെത്തി. യാത്രക്കാരനെ എക്സ്റേ പരിശോധനക്കായി മാറ്റുന്നതിന്റെയും ബാഗിൽനിന്ന് പാത്രം പൊളിച്ച് മരുന്ന് പിടിക്കുന്നതിന്റെയും ദൃശ്യങ്ങൾ ഖത്തർ കസ്റ്റംസ് സമൂഹ മാധ്യമ പേജിൽ പങ്കുവെച്ചു. രാജ്യത്തേക്ക് ലഹരി മരുന്നുകളും നിരോധിത മരുന്നുകളും കടത്താൻ ശ്രമിക്കരുതെന്ന് അധികൃതർ ആവർത്തിച്ച് മുന്നറിയിപ്പ് നൽകുന്നതിനിടെയാണ് ഇത്തരം സംഭവങ്ങൾ ആവർത്തിക്കുന്നത്. ലഹരിക്കേസുകളിൽ കുറ്റക്കാർക്ക് കനത്ത ശിക്ഷയാണ് ഖത്തർ നിയമം അനുശാസിക്കുന്നത്.