The man who snatched Rs 2 crore from Kanjirappallikari was caught in Goa.

കോട്ടയം: കാഞ്ഞിരപ്പള്ളി സ്വദേശിനിയായ വീട്ടമ്മയെ സി.ബി.ഐയുടെ ഓഫിസില്‍നിന്നാണ് വിളിക്കുന്നതെന്ന് പറഞ്ഞ് കബളിപ്പിച്ച് ഒരു കോടി 86 ലക്ഷത്തോളം രൂപ തട്ടിയ കേസിൽ അറസ്റ്റിലായ തൃശൂർ വരന്തരപ്പിള്ളി ചന്ദ്രശ്ശേരി വീട്ടിൽ സലീഷ് കുമാർ (47) ഇന്ത്യയിലെ വിവിധ സംസ്ഥാനങ്ങളിൽ വിവിധ തട്ടിപ്പുകേസുകളിൽ പ്രതിയെന്ന് പൊലീസ് കണ്ടെത്തൽ. കാഞ്ഞിരപ്പള്ളി സ്വദേശിനിയായ വീട്ടമ്മയുടെ ഫോണിലേക്ക് സി.ബി.ഐയിൽനിന്നാണെന്ന് പറഞ്ഞ് വിളിക്കുകയും മുംബൈയിലുള്ള വീട്ടമ്മയുടെ അക്കൗണ്ടിൽ കള്ളപ്പണം വെളുപ്പിക്കൽ നടന്നതായി കണ്ടെത്തിയിട്ടുണ്ടെന്നും കോടതി അറസ്റ്റ് വാറന്‍റ് പുറപ്പെടുവിച്ചിട്ടുണ്ടെന്ന വ്യാജേന ഭീഷണിപ്പെടുത്തി വീട്ടമ്മയിൽനിന്ന് പലതവണയായി 1,86,62,000 രൂപയാണ് ഇയാൾ തട്ടിയത്.

പരാതിയെത്തുടർന്ന് കാഞ്ഞിരപ്പള്ളി പൊലീസ് കേസെടുക്കുകയും തുടർന്ന് നടത്തിയ അന്വേഷണത്തിൽ പണം ഇയാളുടെ അക്കൗണ്ടിലേക്ക് എത്തിയതായും കണ്ടെത്തി.

ജില്ല പൊലീസ് മേധാവി ഷാഹുൽ ഹമീദിന്‍റെ നിർദേശത്തെ തുടർന്ന് അന്വേഷണസംഘം നടത്തിയ തിരച്ചിലിൽ ഇയാളെ ഗോവയിൽനിന്നാണ് പിടികൂടിയത്. ക്രൈംബ്രാഞ്ച് ഡിവൈ.എസ്.പി സാജു വർഗീസിന്‍റെ നേതൃത്വത്തിൽ നടത്തിയ തുടരന്വേഷണത്തിൽ വീട്ടമ്മയുടെ നഷ്ടപ്പെട്ട പണം ഇയാൾ രാജസ്ഥാൻ, ഹരിയാന, കോയമ്പത്തൂർ, ഗുജറാത്ത് എന്നിവിടങ്ങളിലെ വിവിധ അക്കൗണ്ടുകളിലേക്ക് ട്രാൻസ്ഫർ ചെയ്തതായി കണ്ടെത്തി. ഇന്ത്യയിലെ വിവിധ സംസ്ഥാനങ്ങളിലെ തട്ടിപ്പുകേസുകളിൽ പ്രതിയാണ് ഇയാൾ.