13-Year-Old Sexually Assaulted: 19-Year-Old Sentenced to 38 Years Rigorous Imprison

ചാവക്കാട്:13 വയസ്സ് പ്രായമുള്ള പെൺകുട്ടിയെ വീട്ടിൽ അതിക്രമിച്ചുകയറി പല തവണ ലൈംഗിക പീഢനം നടത്തിയ കേസിൽ 19 കാരന് 38 വർഷം കഠിനതടവും 96,000 രൂപ പിഴയും ശിക്ഷ.പിഴ അടക്കാത്ത പക്ഷം 19 മാസവും 5 ദിവസവും കൂടി അധിക തടവ് അനുഭവിക്കണം.പിഴ അടയ്ക്കുന്ന പക്ഷം പിഴ തുകയിൽ നിന്നും 50,000 രൂപ അതിജീവിതയ്ക്ക് നൽകാനും ഉത്തരവായി.വെങ്കിടങ്ങ് പാടൂർ ഇടിയഞ്ചിറ വെട്ടേക്കാട്ട് വീട്ടിൽ മനോഹരൻ മകൻ നവീൻകൃഷ്ണ(19)യെയാണ് ചാവക്കാട് പ്രത്യേക അതിവേഗ കോടതി ജഡ്ജി എസ്.ലിഷ കുറ്റക്കാരനാണെന്ന് കണ്ടെത്തി ശിക്ഷ വിധിച്ചത്.2023 ഓഗസ്റ്റ് മുതൽ ഒക്ടോബർ വരെയുള്ള കാലയളവിൽ പല ദിവസങ്ങളിൽ പെൺകുട്ടിയുടെ വീട്ടിൽ അതിക്രമിച്ചുകയറി ലൈംഗിക പീഢനം നടത്തി എന്നതാണ് പ്രോസിക്യൂഷൻ കേസ്.പീഡന വിവരം കുട്ടിയുടെ ഉപ്പ പാവറട്ടി പോലീസ് സ്റ്റേഷനിൽ അറിയിച്ചതിന് തുടർന്ന് ജിഎസ് സിപിഒ ബിന്ദു പെൺകുട്ടിയുടെ മൊഴി രേഖപ്പെടുത്തി ഹാജരാക്കിയതിന്റെ അടിസ്ഥാനത്തിൽ എസ്ഐ ഡി.വൈശാഖ് എഫ്ഐആർ രജിസ്റ്റർ ചെയ്ത് എസ്എച്ച്ഒ എം.കെ.രമേഷ് തുടരാന്വേഷണം നടത്തി കുറ്റപത്രം സമർപ്പിച്ചു.പ്രോസിക്യൂഷൻ ഭാഗത്ത് നിന്നും 17 സാക്ഷികളെ വിസ്തരിക്കുകയും 20 രേഖകൾ ഹാജരാക്കുകയും ചെയ്തു.പ്രോസിക്യൂഷന് വേണ്ടി സ്പെഷ്യൽ പബ്ലിക് പ്രോസിക്യൂട്ടർ സിജു മുട്ടത്ത്,അഡ്വ.സി.നിഷ എന്നിവർ ഹാജരായി.ലെയ്സൺ ഓഫീസർമാരായ സിന്ധു,പ്രസീത എന്നിവർ കോടതി നടപടികൾ ഏകോപിപ്പിക്കുന്നതിനായി പ്രോസിക്യൂഷനെ സഹായിച്ചു.