Petition against issuance of phone number without permission

ചെന്നൈ: 'അമരന്‍' സിനിമയില്‍ അനുവാദമില്ലാതെ എന്‍ജിനീയറിങ് വിദ്യാര്‍ത്ഥിയുടെ ഫോണ്‍ നമ്പര്‍ നല്‍കിയതിനെതിരെ ഹര്‍ജി. സംഭവത്തില്‍ സംവിധായകനും നിര്‍മാതാക്കള്‍ക്കും മദ്രാസ് ഹൈക്കോടതി നോട്ടീസയച്ചു. ഡിസംബര്‍ 20-നകം വിശദീകരണം നല്‍കണമെന്നാണ് കോടതിയുടെ നിര്‍ദേശം. വിഷയത്തില്‍ എന്‍ജിനീയറിങ് വിദ്യാര്‍ത്ഥിയോട് അമരന്‍ സിനിമ നിര്‍മാതാക്കള്‍ മാപ്പ് പറഞ്ഞിരുന്നു.

ചെന്നൈ ആല്‍വാര്‍പ്പേട്ട് സ്വദേശിയായ വിദ്യാര്‍ത്ഥി വാഗീശ്വരനാണ് തന്റെ ഫോണ്‍നമ്പര്‍ സിനിമയില്‍ ഉപയോഗിച്ചതിനെതിരേ കോടതിയെ സമീപിച്ചത്. അമരന്റെ ഒ.ടി.ടി. റിലീസ് തടയുക, നഷ്ടപരിഹാരമായി 1.10 കോടി നല്‍കുക തുടങ്ങിയവയായിരുന്നു ആവശ്യങ്ങള്‍. ചിത്രത്തില്‍ സായ് പല്ലവിയുടെ കഥാപാത്രമായ ഇന്ദു റെബേക്കയുടെ ഫോണ്‍ നമ്പറായി ഉപയോഗിച്ചത് തന്റെ നമ്പര്‍ ആണെന്ന് ചൂണ്ടിക്കാണിച്ചായിരുന്നു പരാതി.

വിഷയത്തില്‍ എന്‍ജിനീയറിങ് വിദ്യാര്‍ത്ഥിയോട് അമരന്‍ സിനിമ നിര്‍മാതാക്കള്‍ മാപ്പ് പറഞ്ഞിരുന്നു. വാഗീശനുണ്ടായ അസൗകര്യത്തില്‍ മാപ്പ് പറയുന്നെന്നും ചിത്രത്തില്‍ നിന്ന് വിദ്യാര്‍ത്ഥിയുടെ ഫോണ്‍ നമ്പര്‍ നീക്കിയെന്നും രാജ്കമല്‍ ഫിലിംസ് അറിയിച്ചു. എന്നാല്‍ നിര്‍മാതാക്കളുടെ പ്രതികരണം വൈകിയെന്നാണ് വാഗീശന്റെ പ്രതികരണം. നവംബര്‍ ആറിനാണ് വാഗീശന്‍ അമരന്‍ നിര്‍മാതാക്കള്‍ക്കെതിരെ വക്കീല്‍ നോട്ടീസ് അയച്ചത്.

സിനിമയില്‍ തന്റെ മൊബൈല്‍ നമ്പര്‍ കാട്ടിയതോടെ വിദേശ രാജ്യങ്ങളില്‍നിന്നുള്‍പ്പെടെ ആയിരക്കണക്കിന് പേരാണ് വിളിക്കുന്നതെന്നും വിശ്രമിക്കാനോ പഠിക്കാനോ കഴിയുന്നില്ലെന്നും വാഗീശ്വരന്‍ ഹര്‍ജിയില്‍ വ്യക്തമാക്കിയിരുന്നു.