Launched Happiness Centre at Kundamangalam

കുന്ദമംഗലം : സമൂഹത്തിന്റെ ആരോഗ്യം, ഉന്മേഷം, സന്തോഷം എന്നിവ ലക്ഷ്യമാക്കി കുന്ദമംഗലത്ത് ഹാപ്പിനസ് സെൻറർ ഉദ്ഘാടനം ചെയ്തു. പി.ടി.എ. റഹീം എം.എൽ.എ ഉദ്ഘാടനം നിർവഹിച്ചു. പഞ്ചായത്ത് പ്രസിഡൻറ് ലിജി പുൽക്കുന്നുമ്മൽ അധ്യക്ഷയായി.

മാലിന്യ നിക്ഷേപ കേന്ദ്രമായിരുന്ന റവന്യൂ വകുപ്പിന്റെ സ്ഥലം പുനർജീവിപ്പിച്ച് ആധുനിക സൗകര്യങ്ങളോടെ ഒരുക്കിയതാണ് ഹാപ്പിനസ് സെൻറർ. നാട്ടുകാരുടെ ശാരീരിക-മാനസികാരോഗ്യത്തിന് കൂട്ടായി പ്രവർത്തിക്കാനാണ് പദ്ധതിയുടെ ലക്ഷ്യം. വ്യായാമത്തിനും കൂട്ടായ പ്രവർത്തനങ്ങൾക്കും അനുയോജ്യമായ സംവിധാനങ്ങളോടെയാണ് സെൻറർ നിർമ്മിച്ചിരിക്കുന്നത്.

സാമൂഹ്യ സേവന മനോഭാവത്തോടെ ഹാപ്പിനസ് സെൻറർ നിർമ്മിക്കാനുള്ള തുക സംഭാവന ചെയ്തത് അരിയിൽ മൊയ്തീൻ ഹാജിയാണ്. സമൂഹത്തിന്റെ കൂട്ടായ്മയുടെയും പങ്കാളിത്തത്തിന്റെയും മികച്ച ഉദാഹരണമായി മാറിയ പദ്ധതിക്ക് ജനശബ്ദം ന്യൂസാണ് സംരക്ഷണ ചുമതല ഏറ്റെടുത്തത്.

ബ്ലോക്ക് പഞ്ചായത്ത് പ്രസിഡൻറ് അരിയിൽ അലവി മുഖ്യാതിഥിയായി. പഞ്ചായത്ത് വൈസ് പ്രസിഡൻറ് വി. അനിൽകുമാർ, സ്ഥിരം സമിതി അധ്യക്ഷരായ യു.സി. പ്രീതി, ശബ്ന റഷീദ്, ചന്ദ്രൻ തിരുവലത്ത്, മെമ്പർമാരായ നജീബ് പാലക്കൽ, കെ.കെ.സി. നൗഷാദ്, ഫാത്തിമ ജസ്‌ലിൻ, സജിത ഷാജി, ജനശബ്ദം എഡിറ്റർ എം. സിബ്ഗത്തുള്ള എന്നിവർ പ്രസംഗിച്ചു.