Kerala Blasters to host first home match in 2025

കൊച്ചി : ഐ എസ് എൽ ഫുട്ബോളിൽ കേരള ബ്ലാസ്റ്റേഴ്‌സ്, ഒഡിഷ എഫ് സി യെ നേരിടും. ഇന്ന് വൈകിട്ട് 7.30 ന് കൊച്ചി കലൂർ ജവഹാർലാൽ നെഹ്‌റു അന്താരാഷ്ട്ര സ്റ്റേഡിയത്തിലാണ് മത്സരം. രണ്ട് റെഡ് കാർഡ് കണ്ട് ഒൻപത് പേരായി ചുരുങ്ങിയിട്ടും കഴിഞ്ഞ കളിയിൽ പഞ്ചാബ് എഫ് സി യെ ഒരു ഗോളിന് കീഴടക്കിയതിന്റെ ആത്മവിശ്വാസവുമായാണ് ബ്ലാസ്റ്റേഴ്‌സ് ഈ വർഷത്തെ തങ്ങളുടെ ആദ്യ ഹോം മാച്ചിനിറങ്ങുന്നത്. 15 കളിയിൽ 17 പോയിന്റുമായി പട്ടികയിൽ ഒമ്പതാം സ്ഥാനത്താണ് കേരള ടീം.

ഇത്രയും കളിയിൽ 21 പോയിന്റുള്ള ഒഡിഷ ഏഴാം സ്ഥാനത്തുമുണ്ട്.

പഞ്ചാബിനെതിരായ കളിയിൽ ചുവപ്പ് കാർഡ് കണ്ട മിലോസ് ഡ്രിൻസിച്ച്, ഐബാൻബ ഡോളിങ് എന്നിവർക്ക് പുറമെ തുടർച്ചയായ മഞ്ഞകാർഡിന്റെ പേരിൽ വിലക്ക് നേരിടുന്ന ഡാനിഷ് ഫാറൂഖിയുടെ ആഭാവവും ബ്ലാസ്റ്റേഴ്‌സ് നിരയിലെ ഊർജം കെടുത്തിയിരുന്നു. എന്നാൽ, അപ്പീൽ നൽകി ഐബാൻബയുടെ സസ്പെൻഷൻ പിൻവലിപ്പിക്കാൻ കഴിഞ്ഞത് ആശ്വാസമായിട്ടുണ്ട്. പരിക്കിലായിരുന്ന സ്പാനിഷ് താരം ജെസ്യുസ് ജിമെനസ്, മലയാളി താരം വിബിൻ മോഹനൻ എന്നിവർ തിരിച്ചെത്തിയിട്ടുണ്ട്. മൊറോക്കൻ താരം നോഹ സദോയിക്കൊപ്പം ജിമനസ് ചേരുന്നതോടെ മുന്നേറ്റം ദൃഢപ്പെടുമെന്ന് കോച്ച് പുരുഷോത്തമൻ കരുതുന്നു.

ഏഴ് ഗോളുമായി ടോപ് സ്‌കോറർ ടേബിളിൽ മുൻനിരയിൽ നിൽക്കുന്ന ബ്രസീലിയൻ താരം ഡീഗോ മൗറീഷ്യോയുടെ കാലുകളെ തന്നെയാണ് ഒഡിഷക്കാർ വിശ്വസിക്കുന്നത്.

Tags: