Drug abuse is on the rise among students; strong intervention is needed

കോഴിക്കോട്: വിദ്യാർത്ഥികളുടെയും യുവജനങ്ങളുടെയും ഇടയിൽ വേഗത്തിൽ വ്യാപിക്കുന്ന മയക്കുമരുന്ന് ദുരുപയോഗത്തെക്കുറിച്ച് ദേശീയ ശിശു ക്ഷേമ സംഘടനയായ നാഷണൽ

ചൈൽഡ് ഡെവലപ്മെന്റ് കൗൺസിൽ (എൻ.സി.ഡി.സി) കോർ കമ്മിറ്റി

ആശങ്ക പ്രകടിപ്പിച്ചു. പ്രശ്നം നിയന്ത്രണാതീതമാകുന്നതിന് മുൻപ് തന്നെ രാജ്യതലത്തിൽ അടിയന്തര ഇടപെടലുകളും നിയമ, ഡിജിറ്റൽ, സ്ഥാപന, സാമൂഹിക തലങ്ങളിലായുള്ള ശക്തമായ നടപടികളും സ്വീകരിക്കണമെന്ന് കമ്മിറ്റി ആവശ്യപ്പെട്ടു.

പുതിയ മൊബൈൽ ആപ്പുകൾ വ്യാജ അവസരങ്ങൾ വാഗ്ദാനം ചെയ്ത് വിദ്യാർത്ഥികളെ കുടുക്കുകയാണ്. ഈ ആപ്പുകളെ മയക്കുമരുന്ന് മാഫിയകൾ യുവാക്കളെ പിടികൂടാനുള്ള വലയമായി ഉപയോഗിക്കുന്നുവെന്ന് കമ്മിറ്റി അംഗങ്ങൾ പറഞ്ഞു. ഡിജിറ്റൽ പ്ലാറ്റ്‌ഫോമുകളിലേക്കുള്ള സർക്കാരിന്റെ കർശനമായ മേൽനോട്ടവും അപകടകരമായ ആപ്പുകൾ അടച്ചുപൂട്ടാനുള്ള നടപടിയും അംഗങ്ങൾ ആവശ്യപ്പെട്ടു.

പ്രായപൂർത്തിയാകാത്തവർക്കെതിരെ നിയമനടപടികൾ എടുക്കുന്നതിൽ ഉള്ള പരിമിതികളെ ചൂണ്ടിക്കാട്ടി, ശിക്ഷയ്ക്കു പകരം പുനരധിവാസവും മാനസിക പിന്തുണയും നൽകണമെന്ന് ആവശ്യപ്പെട്ടു. സ്കൂളുകളിൽ മയക്കുമരുന്ന് ബോധവത്കരണ ക്ലാസുകൾ ഉൾപ്പെടുത്താനും, മാതാപിതാക്കൾ കുട്ടികളുടെ ബാഗുകൾ പരിശോധിക്കാനും നിർദേശിച്ചു. കുട്ടികളുടെ പെരുമാറ്റത്തിൽ ഉണ്ടാകുന്ന പെട്ടെന്നുള്ള മാറ്റങ്ങൾ അവഗണിക്കരുതെന്ന് മുന്നറിയിപ്പ് നൽകി.

എൻ.സി.ഡി.സി മാസ്റ്റർ ട്രെയിനർ ബാബാ അലക്സാണ്ടർ, റീജണൽ അഡ്മിനിസ്ട്രേറ്റിവ് ഓഫീസർ മുഹമ്മദ് റിസ്വാൻ, അധ്യാപകരായ ബിന്ദു സരസ്വതി ഭായ്, ആനന്ദി.പി, രാധ സജീവ് തുടങ്ങിയവർ പങ്കെടുത്തു.