Tue Dec 12, 2023 10:56 PM 1ST
Location
Sign In
Tue Dec 12, 2023 10:56 PM 1ST
Location
Sign In
04 Jul 2026 11:16 IST
Share News :
മേപ്പയൂർ: വിദ്യാർത്ഥി മനസ്സുകളിൽ ജനാധിപത്യ പ്രക്രിയയുടെയും ഉത്തരവാദിത്തമുള്ള നേതൃത്വത്തിന്റെയും വലിയ പാഠങ്ങൾ പകർന്നു നൽകി മേപ്പയൂർ സിറാജുൽ ഹുദാ സ്കൂൾ പാർലമെന്റ് തിരഞ്ഞെടുപ്പിന് ഉജ്ജ്വല പരിസമാപ്തി. സ്കൂൾ തലത്തിൽ ഭരണസംവിധാനം ഏൽപ്പിക്കുന്നതിനുള്ള മികച്ച നേതൃത്വത്തെ കണ്ടെത്താനായി നടത്തിയ തിരഞ്ഞെടുപ്പിന്റെ ഓരോ ഘട്ടവും ക്യാമ്പസിൽ വലിയ ആവേശമാണ് സൃഷ്ടിച്ചത്.
തിരഞ്ഞെടുപ്പ് കമ്മീഷൻ ഔദ്യോഗികമായി വിജ്ഞാപനം പുറപ്പെടുവിച്ചതു മുതൽ സ്കൂളിൽ പ്രചാരണ പ്രവർത്തനങ്ങൾ സജീവമായിരുന്നു. ഹെഡ് ബോയ്, ഹെഡ് ഗേൾ, ജനറൽ ക്യാപ്റ്റൻ, സ്റ്റുഡന്റ് എഡിറ്റർ, ഫൈൻ ആർട്സ് സെക്രട്ടറി തുടങ്ങിയ തന്ത്രപ്രധാനമായ സ്ഥാനങ്ങളിലേക്കായിരുന്നു മത്സരം നടന്നത്. മത്സരാർത്ഥികളുടെ നാമനിർദ്ദേശ പത്രിക സമർപ്പണം, സൂക്ഷ്മ പരിശോധന, പത്രിക പിൻവലിക്കാനുള്ള അവസാന തീയതി തുടങ്ങിയ ഔദ്യോഗിക നടപടിക്രമങ്ങളെല്ലാം കൃത്യമായ മാനദണ്ഡങ്ങൾ പാലിച്ചാണ് പൂർത്തിയാക്കിയത്.
വോട്ടെടുപ്പ് ദിവസം സ്കൂളിൽ പ്രത്യേകം സജ്ജമാക്കിയ പോളിങ് ബൂത്തുകൾക്ക് മുന്നിൽ വിദ്യാർത്ഥികളുടെ നീണ്ട നിരയാണ് ദൃശ്യമായത്. കൃത്യമായ തിരിച്ചറിയൽ രേഖകൾ പോളിങ് ഉദ്യോഗസ്ഥർക്ക് മുമ്പാകെ സമർപ്പിച്ചാണ് വോട്ടർമാർ ബൂത്തിനകത്തേക്ക് പ്രവേശിച്ചത്. കന്നിവോട്ടർമാരായ ചെറിയ ക്ലാസുകളിലെ കുട്ടികൾക്ക് വോട്ട് രേഖപ്പെടുത്തുന്നതിനുള്ള പ്രത്യേക നിർദ്ദേശങ്ങളും മുൻകൂട്ടി പരിശീലനവും നൽകിയിരുന്നു. വോട്ട് രേഖപ്പെടുത്തിയ ശേഷം മഷിപുരണ്ട വിരലുകളുമായി പുറത്തിറങ്ങിയ കുട്ടികൾക്ക് തിരഞ്ഞെടുപ്പ് പ്രക്രിയ വേറിട്ടൊരു അനുഭവമായി മാറി.
സ്കൂൾ അധികൃതരുടെ കൃത്യമായ മേൽനോട്ടത്തിലാണ് തിരഞ്ഞെടുപ്പ് നടപടികൾ പൂർത്തിയായത്. അഡ്മിനിസ്ട്രേറ്റീവ് ഓഫീസർ കോച്ചേരി കുഞ്ഞബ്ദുള്ള സഖാഫി, പ്രിൻസിപ്പൽ ഷുഹൈബ് കെ, വൈസ് പ്രിൻസിപ്പാൾ അബ്ദു റഹീം കെ കെ എന്നിവർ പ്രക്രിയകൾക്ക് പൊതുവായ നേതൃത്വം നൽകി. ഇലക്ഷൻ ചീഫ് സൗമ്യ, പോളിങ് ഓഫീസർമാരായ റെഹിയാന, ശ്യാമ പി ടി, വിൻസി, ഫാത്തിമ ഹന, സിനി കെ തുടങ്ങിയവർ ബൂത്തുകളിലെ വോട്ടെടുപ്പ് നിയന്ത്രിച്ചു. ജനാധിപത്യത്തിന്റെ അന്തസ്സും മൂല്യങ്ങളും ഉയർത്തിപ്പിടിച്ചുകൊണ്ട് പുതിയ ഭരണസമിതിയെ തിരഞ്ഞെടുത്ത വിദ്യാർത്ഥികളെ സ്കൂൾ മാനേജ്മെന്റ് അഭിനന്ദിച്ചു.
Follow us on :
Tags:
Please select your location.
36.jpeg)
