Historic Manathala Chandanakudam started taking vows

ചാവക്കാട്:ടിപ്പു സുൽത്താൻ്റെ പടയാളികളുമായി ഏറ്റുമുട്ടി വീരചരമം പ്രാപിച്ച ധീരനായ നാലകത്ത് ചാന്ദിപ്പുറത്ത് ഹൈദ്രോസ് കുട്ടി മൂപ്പരുടെ സ്‌മരണയിൽ ചരിത്രപ്രസിദ്ധമായ 238-മത് മണത്തല ചന്ദനക്കുടം നേർച്ച തുടങ്ങി.പ്രധാന കാഴ്‌ച്ചയായ താബൂത്ത് കാഴ്‌ച്ചയും കൊടികയറ്റ കാഴ്‌ച്ചയും നാളെ നടക്കും.ഇന്ന് രാവിലെ പ്രജ്യോതിയുടെ ആദ്യ കാഴ്‌ച്ചയോടെയാണ് രണ്ട് ദിവസങ്ങളിലായി ആഘോഷിക്കുന്ന മണത്തല ചന്ദനക്കുടം നേർച്ചയ്ക്ക് ആരംഭമായത്.രണ്ട് ദിവസങ്ങളിലായി മുപ്പതോളം കാഴ്‌ച്ചകൾ ജാറത്തിലെത്തും.ക്ലബുകൾ,സംഘടനകൾ എന്നിവയുടെ കാഴ്‌ച്ചകൾ ഇന്ന് ജാറത്തിലെത്തി.നേർച്ചയുടെ പ്രധാന ദിവസമായ നാളെ പ്രധാന കാഴ്‌ച്ചയായ താബൂത്ത് കാഴ്‌ച്ച മണത്തല സിംങർ ലൈൻ ഒലീദ് നഗറിൽ നിന്നാരംഭിക്കും.ഹൈദ്രോസ് കുട്ടി മൂപ്പരെ രാജകീയ ബഹുമതികളോടെ ഖബറടക്കിയതിൻ്റെ ഓർമയുണർത്തുന്ന താബൂത്ത് കാഴ്‌ച്ച നാടിൻ്റെ വിവിധ ഭാഗങ്ങളിൽ സഞ്ചരിച്ച് ഉച്ചയ്ക്ക് 12-ന് ജാറത്തിലെത്തും.ആന,വാദ്യമേളങ്ങൾ,മുട്ടുംവിളി എന്നിവ അകമ്പടിയാകും.ഇതേ സമയം വിവിധ ദേശങ്ങളിൽ നിന്നുള്ള കൊടികയറ്റ കാഴ്‌ച്ചകൾ ജാറത്തിലെത്തി കൊടികയറ്റം നിർവഹിക്കും.വൈകിട്ട് 6-ന് നാട്ടുകാഴ്‌ച്ചകളുമെത്തും.ക്ലബുകൾ,സംഘടനകൾ എന്നിവയുടെ കാഴ്‌ച്ചകൾ കൂടാതെ കൊടികയറ്റകാഴ്‌ച്ച,നാട്ടുകാഴ്‌ച്ച,താബൂത്ത് കാഴ്‌ച്ച ഉൾപ്പെടെ ഇരുപതോളം കാഴ്‌ച്ചകൾ നാളെ ജാറത്തിലെത്തും.