ഒമാനിലെ ക്രൈസ്തവ സമൂഹം ക്രിസ്മസ് ആഘോഷത്തിന്റെ നിറവിൽ

മസ്‌കറ്റ്: ഒമാനിലെ ക്രൈസ്തവ സമൂഹം ക്രിസ്മസ് ആഘോഷത്തിന്റെ നിറവിൽ. ചർച്ചുകളിലും ഫ്ലാറ്റുകളിലും പുൽക്കൂടും, നക്ഷത്രങ്ങളും, ക്രിസ്തുമസ് ട്രീയും മറ്റ് അലങ്കാരങ്ങളും ഒരുക്കിയാണ് ഒമാനിലെ ക്രൈസ്തവ സമൂഹം ക്രിസ്മസിനെ വരവേൽക്കുന്നത്.

മസ്‌കറ്റ് ഗാല സെന്റ് മേരീസ് ഓർത്തഡോക്സ് ഇടവക അങ്കണത്തിൽ 20 അടിയോളം ഉയരത്തിൽ ഒമാനിലെ ഏറ്റവും വലിയ സാന്റാക്ലോസിനെ ഒരുക്കിയാണ് ക്രിസ്മസ്നേ വരവേറ്റത്.

മാളുകളിലും, സൂപ്പർ മാർക്കറ്റുകളിലും പ്രത്യേക കൃസ്മസ് ഇടങ്ങൾ ഒരുക്കി ആവശ്യം വേണ്ട സാധനങ്ങൾ നിരത്തിയായിരുന്നു കഴിഞ്ഞ ദിവസങ്ങളിലെ കച്ചവടം.

ക്രിസ്മസ് ദിനം പ്രവർത്തി ദിനം ആയത് കൊണ്ട് തന്നെ തൊട്ടടുത്ത അവധി ദിവസമായ വെള്ളിയാഴ്ചയാവും പ്രധാന ആഘോഷങ്ങൾ.

അവധിയെടുത്ത് ക്രിസ്തുമസ് ദിനം കുടുംബത്തോടൊപ്പം ആഘോഷിക്കുന്നവരും കുറവല്ല. രാജ്യത്തെ വിവിധ ദേവാലയങ്ങളിൽ നടക്കുന്ന ക്രിസ്തുമസ് ശുഷ്രൂഷകളിലും നിരവധി വിശ്വാസികൾ പങ്കെടുത്തു.

കരോൾ സംഘങ്ങളിൽ കുട്ടികളും മുതിർന്നവരും അടക്കമുള്ളവർ സജീവമായി താമസയിടങ്ങളും ഫ്ലാറ്റുകളും കയറിയിറങ്ങി. വിവിധ സഭകളുടെയും കൂട്ടായ്മകളുടെയും നേതൃത്വത്തിൽ ആയിരുന്നു കരോൾ പരിപാടികൾ.

മസ്കറ്റിലെ റൂവിയിലും, ഗാലയിലും ക്രിസ്തീയ ദേവാലയങ്ങൾ പുൽകൂടും നക്ഷത്രങ്ങളും ക്രിസ്മസ് ട്രീയും എല്ലാം ഒരുക്കി വൈദ്യുതി വിളക്കിന്റെ അലങ്കാര ശോഭയിലാണ് ആഘോഷിക്കുന്നത്.