another case against music composer Shaan Rahman

സംഗീത നിശയുടെ മറവില്‍ തട്ടിപ്പ് നടത്തിയതിന് വഞ്ചനാക്കുറ്റം ചുമത്തിയതിന് പിന്നാലെ സംഗീത സംവിധായകന്‍ ഷാന്‍ റഹ്‌മാനെതിരെ ഒരു കേസ് കൂടി. നിരോധിത മേഖലയില്‍ ഡ്രോണ്‍ പറത്തിയതിനാണ് കേസെടുത്തിരിക്കുന്നത്. എറണാകുളം സൗത്ത് പോലീസാണ് കേസെടുത്തത്. പോലീസിന് മുന്നില്‍ ഹാജരാകാന്‍ കോടതിയുടെ നിര്‍ദേശം.

സംഗീത പരിപാടിയുടെ പേരില്‍ ലക്ഷങ്ങള്‍ തട്ടിയെന്ന പരാതിയില്‍ ഷാന്‍ റഹ്‌മാനെതിരെ നേരത്തെ വഞ്ചനാ കേസ് എടുത്തിരുന്നു. മുന്‍കൂര്‍ ജാമ്യത്തിനായി കോടതിയെ സമീപിച്ചുവെങ്കിലും ജാമ്യം ലഭിച്ചില്ല. ഷാന്‍ റഹ്‌മാന്‍ ഇതുവരെ ചോദ്യം ചെയ്യലിന് ഹാജരായില്ല എന്ന് എറണാകുളം സൗത്ത് പോലീസ് പറഞ്ഞു. ചോദ്യം ചെയ്യിലില്‍ കൃത്യമായ രേഖകള്‍ ഹാജരാക്കിയില്ല എങ്കില്‍ അറസ്റ്റ് ഉണ്ടാകുമെന്നും പോലീസ് മുന്നറിയിപ്പ് നല്‍കി.

പ്രൊഡക്ഷന്‍ മാനേജരും, ഷോ ഡയറക്ടറുമായ നിജു രാജ് ആണ് പരാതിക്കാരന്‍. കൊച്ചിയില്‍ സംഗീത നിശ സംഘടിപ്പിച്ച വഴി 38 ലക്ഷം രൂപ തട്ടിച്ചുവെന്നാണ് പരാതിയില്‍ പറയുന്നത്. എറണാകുളം സൗത്ത് പൊലീസ് ഷാന്‍ റഹ്‌മാനും ഭാര്യക്കുമെതിരെയാണ് കേസെടുത്തത്. ജനുവരിയിലാണ് സംഗീത പരിപാടി നടന്നത്. പരിപാടി കഴിഞ്ഞ ശേഷം പണം നല്‍കാമെന്ന് പറഞ്ഞിട്ട് നല്‍കിയില്ലെന്നും അതിലൂടെ 38 ലക്ഷം രൂപയുടെ നഷ്ടമുണ്ടായെന്നുമാണ് നിജു രാജ് പരാതിയില്‍ പറയുന്നത്.