Accident at Chendamangalam intersection again

ചേന്ദമംഗലം കവലയിൽ വീണ്ടും അപകടം

പറവൂർ: അപകടമേഖലയായ ചേന്ദമംഗലം കവലയിൽ വീണ്ടും അപകടം. കഴിഞ്ഞ ഏതാനും ദിവസങ്ങളായി അപകടങ്ങൾ തുടർക്കഥയായ ഇവിടെ ഐസ് കയറ്റി വന്ന മിനി ലോറിയും കാറും കൂട്ടിയിടിച്ചാണ് വ്യാഴാഴ്ച അപകടമുണ്ടായത്. പുലർച്ചെ 6 മണിയോടെയാണ് സംഭവം.

കാറിൽ ഇടിച്ചു നിയന്ത്രണം വിട്ട മിനി ലോറി ഒരു ഇരുചക്രവാഹന യാത്രികനെ ഇടിച്ചിട്ടു. കാറിൻ്റെ മുൻഭാഗം തകർന്നു. ലോറി മറിഞ്ഞ് ഐസ് മുഴുവൻ റോഡിൽ വീണു. ചേന്ദമംഗലം ഭാഗത്തു നിന്നെത്തിയ കാറും, മുനിസിപ്പൽ ടൗൺഹാളിൻ്റെ ഭാഗത്ത് നിന്നെത്തിയ മിനി ലോറിയുമാണ് അപകടമുണ്ടാക്കിയത്. സ്‌കൂട്ടർ യാത്രികൻ കെടാമംഗലം സ്വദേശി റോജിയുടെ കയ്യിൽ ഒടിവുണ്ട്. നിസാര പരിക്കുകൾ ഏറ്റ കാർ യാത്രികരായ കരുപ്പടന്ന സ്വദേശികളായ മൂന്ന് പേർ ആശുപത്രിയിൽ ചികിത്സ തേടി. മണിക്കൂറുകൾ കഴിഞ്ഞാണ് ഐസ് പൂർണമായി നീക്കി റോഡ് ഗതാഗത യോഗ്യമാക്കിയത്.

വീതി കുറഞ്ഞ ചേന്ദമംഗലം കവലയിൽ അപകടങ്ങൾ പതിവാണ്. കുറച്ചു ദിവസങ്ങൾക്ക് മുൻപു കവലയിൽ വച്ചു ബസും ഇരുചക്രവാഹനവും ഇടിച്ചു. ഏതാനും മാസങ്ങൾക്ക് മുൻപ് നിയന്ത്രണം വിട്ട ലോറി കവലയിലെ പഴയ കെട്ടിടത്തിലേക്ക് ഇടിച്ചു കയറിയുണ്ടായ അപകടത്തിൽ പത്ര ഏജന്റ് മരിച്ചിരുന്നു. ചുവപ്പുനാടയിൽ കുരുങ്ങിയ കവലയുടെ വികസനമാണ് പ്രശ്നങ്ങൾക്കു കാരണം.