ഒമാൻ പ്രവാസി അസോസിയേഷന്റെ ‘ആരവം 2026’ നാളെ; പാട്ട് ഫാമിലി ആദ്യമായി ഒമാനിൽ

മസ്‌കറ്റ്: ഒമാൻ പ്രവാസി അസോസിയേഷൻ (OPA) സംഘടിപ്പിക്കുന്ന ബഹുസ്വരതയുടെയും സൗഹൃദത്തിന്റെയും ആഘോഷമായ ‘ആരവം 2026’ നാളെ (സെപ്റ്റംബർ 25) ബൗഷാർ കോളേജ് ഓഫ് ബാങ്കിങ് ഹാൾ ഓഡിറ്റോറിയത്തിൽ അരങ്ങേറും.

ഓണാഘോഷങ്ങളുടെ ഭാഗമായി സംഘടിപ്പിക്കുന്ന പരിപാടിയിൽ ഇന്ത്യയുടെ വിവിധ ഭാഗങ്ങളിൽ നിന്നുള്ള പ്രവാസി സമൂഹത്തിന്റെ വലിയ പങ്കാളിത്തമാണ് പ്രതീക്ഷിക്കുന്നത്.

സോഷ്യൽ മീഡിയയിലൂടെ വിവിധ മതവിഭാഗങ്ങളുടെ ഭക്തിഗാനങ്ങൾ ആലപിച്ച് ശ്രദ്ധ നേടിയ ‘പാട്ട് ഫാമിലി’ ആദ്യമായി ഒമാനിലെ വേദിയിലെത്തുന്നതാണ് പരിപാടിയുടെ പ്രധാന ആകർഷണം. ജാതി, മതം, രാഷ്ട്രീയം എന്നീ വേർതിരിവുകൾക്കപ്പുറം എല്ലാ വിശ്വാസങ്ങളെയും ഒരുപോലെ ആദരിക്കുകയും മനുഷ്യസ്നേഹത്തിന്റെയും ഐക്യത്തിന്റെയും സന്ദേശം ഉയർത്തിപ്പിടിക്കുകയും ചെയ്യുന്ന കലാപരിപാടികളാണ് വേദിയിൽ ഒരുക്കിയിരിക്കുന്നതെന്ന് സംഘാടകർ അറിയിച്ചു.

“മതങ്ങൾ പലത്... മനസ്സുകൾ ഒന്ന്... മനുഷ്യൻ ഒന്നാണ്” എന്ന സന്ദേശം ഉയർത്തിപ്പിടിച്ചാണ് പരിപാടി സംഘടിപ്പിക്കുന്നത്. സ്നേഹത്തിന്റെയും സൗഹൃദത്തിന്റെയും ഒരുമയുടെയും മഹോത്സവമായി ‘ആരവം 2026’ മാറുമെന്ന് ഒമാൻ പ്രവാസി അസോസിയേഷൻ പ്രതീക്ഷ പ്രകടിപ്പിച്ചു.

ഗ്രൂപ്പ് അംഗങ്ങൾക്കായി പ്രത്യേക ഗെയിമുകൾ

പരിപാടിക്ക് മുന്നോടിയായി ഉച്ചയ്ക്ക് 2 മണി മുതൽ 4 മണി വരെ അസോസിയേഷന്റെ വാട്ട്‌സ്ആപ്പ് ഗ്രൂപ്പ് അംഗങ്ങൾക്കായി പ്രത്യേക ഗെയിമുകൾ സംഘടിപ്പിച്ചിട്ടുണ്ട്. വിജയികൾക്കായി ആകർഷകമായ സമ്മാനങ്ങളും ഒരുക്കിയിട്ടുണ്ട്. ഗെയിമുകളിൽ പങ്കെടുക്കാൻ താൽപര്യമുള്ളവർ കൃത്യം 2 മണിക്ക് തന്നെ ഹാളിൽ എത്തിച്ചേരണമെന്ന് സംഘാടകർ അറിയിച്ചു.

ഹാൾ പ്രവേശനം വൈകിട്ട് 4 മുതൽ

വൈകിട്ട് 4 മണിക്ക് പ്രോഗ്രാം ഹാളിന്റെ ഗേറ്റുകൾ തുറക്കും. ഒരു എൻട്രി പാസിന് ഒരാൾ എന്ന രീതിയിലായിരിക്കും പ്രവേശനം. ഏകദേശം 800 പേർക്കുള്ള സീറ്റിംഗ് സൗകര്യം മാത്രമാണ് ഹാളിലുള്ളത്. അതിനാൽ ‘ഫസ്റ്റ് കം, ഫസ്റ്റ് സർവ്ഡ്’ അടിസ്ഥാനത്തിലായിരിക്കും പ്രവേശനം അനുവദിക്കുക.

പരിപാടിക്കായി വിതരണം ചെയ്തിരിക്കുന്ന സമ്മാന കൂപ്പൺ തന്നെയാണ് പ്രവേശന പാസും. ഗേറ്റിൽ കൂപ്പൺ കാണിച്ചാൽ മാത്രമേ പ്രവേശനം അനുവദിക്കുകയുള്ളൂ. സീറ്റുകൾ പൂർണമായും നിറഞ്ഞാൽ പിന്നീട് പ്രവേശനം സാധ്യമാകില്ലെന്നും അതിനാൽ നേരത്തെ എത്തി സീറ്റ് ഉറപ്പാക്കണമെന്നും സംഘാടകർ അറിയിച്ചു.

വൈകിട്ട് 5 മുതൽ പ്രധാന പരിപാടികൾ

വൈകിട്ട് 5 മണി മുതൽ രാത്രി 11 മണിവരെ നീളുന്ന പ്രധാന പരിപാടികളിൽ ഡാൻസ്, ഗാനമേള, കോമഡി ഷോകൾ തുടങ്ങി വൈവിധ്യമാർന്ന കലാപരിപാടികൾ അരങ്ങേറും. ഓരോ നിമിഷവും ആഘോഷമാക്കുന്ന തരത്തിൽ നോൺ-സ്റ്റോപ്പ് വിനോദപരിപാടികളാണ് ഒരുക്കിയിരിക്കുന്നതെന്ന് സംഘാടകർ വ്യക്തമാക്കി.

ഫുഡ് സ്റ്റാളുകളും സമ്മാനക്കൂപ്പൺ നറുക്കെടുപ്പും

പരിപാടി വേദിക്ക് സമീപം വിവിധ ഭക്ഷ്യവിഭവങ്ങളുമായി ഫുഡ് സ്റ്റാളുകളും പ്രവർത്തിക്കും. കൂടാതെ എല്ലാവരും ആകാംക്ഷയോടെ കാത്തിരിക്കുന്ന ഭാഗ്യശാലി സമ്മാന കൂപ്പൺ നറുക്കെടുപ്പ് പരിപാടിയുടെ അവസാനഘട്ടത്തിൽ നടക്കും. അതിനാൽ അവസാന നിമിഷം വരെ പ്രേക്ഷകരുടെ സാന്നിധ്യം ഉറപ്പാക്കണമെന്ന് സംഘാടകർ അഭ്യർഥിച്ചു.

വാഹനങ്ങൾ പാർക്ക് ചെയ്യുന്നതിനായി ബിൽഡിംഗിന്റെ ബേസ്‌മെന്റിൽ വിപുലമായ സൗകര്യവും പ്രവേശന കവാടത്തിന് പുറത്തായി പരിമിതമായ പാർക്കിംഗ് സൗകര്യവും ഒരുക്കിയിട്ടുണ്ട്.

പ്രവാസി മലയാളികൾക്കിടയിൽ ഐക്യത്തിന്റെയും സൗഹൃദത്തിന്റെയും പുതിയ അധ്യായം കുറിക്കാൻ ഒരുങ്ങുന്ന ‘ആരവം 2026’, ഒമാനിലെ ഈ വർഷത്തെ ശ്രദ്ധേയമായ ഓണാഘോഷ വേദികളിലൊന്നായി മാറുമെന്ന പ്രതീക്ഷയിലാണ് സംഘാടകർ.