Old man's box shop in Mannar rammed into an unidentified vehicle in the night

കടുത്തുരുത്തി :റോഡരികില്‍ പെട്ടികട നടത്തി കുടുംബം പോറ്റിയിരുന്ന വയോധികന്റെ കട രാത്രിയില്‍ അജ്ഞാത വാഹനമിടിച്ചു തകര്‍ത്തു. കട തകര്‍ന്നതോടെ നിര്‍ദ്ധനനായ വയോധികന്റെയും ഭാര്യയുടെയും ഏക വരുമാനമാര്‍ഗം ഇല്ലാതായി. മാന്നാര്‍ ജംഗ്ഷനില്‍ ബസ് കാത്തിരിപ്പ് കേന്ദ്രത്തിന് സമീപം പ്രവര്‍ത്തിച്ചിരുന്ന മാന്നാര്‍ മഠത്തിക്കുന്നേല്‍ മണി (77) യുടെ കടയാണ് തകര്‍ന്നത്. ചൊവ്വാഴ്ച്ച

രാത്രിയിലാണ് സംഭവം. വാഹനമിടിച്ചു തകര്‍ന്ന കട റോഡില്‍ തലകുത്തനെ കിടക്കുന്ന നിലയിലായിരുന്നു. ആറ് വര്‍ഷത്തിലേറേയായി ഇവിടെ പ്രവര്‍ത്തിച്ചിരുന്ന കടയാണ്. മണിയും ഭാര്യ തങ്കമണിയും ജീവിച്ചിരുന്നത് ഈ കടയില്‍ നിന്നു ലഭിച്ചിരുന്ന വരുമാനം കൊണ്ടായിരുന്നു. ചായയും കാപ്പിയും ചെറുകടികളും വിറ്റിരുന്ന കടയുടെ പ്രവര്‍ത്തനം രാത്രി 11 മുതല്‍ രാവിലെ ഏഴ് വരെയായിരുന്നു. ഒരു മാസം മുമ്പ് പകല്‍ ശബരിമല തീര്‍ത്ഥാടകരുടെ വാഹനമിടിച്ചു കടയുടെ സമീപത്തെ ആളുകള്‍ ഇരിക്കുന്ന ഭാഗം തകര്‍ന്നിരുന്നു. തുടര്‍ന്ന് കട അടച്ചിട്ടിരിക്കുകയായിരുന്നു.

പൈപ്പില്‍ ഗ്ലാസ്സും ഷീറ്റുമെല്ലാമിട്ട് ബലവത്തായി നിര്‍മിച്ചിരുന്ന കടയ്ക്കുള്ളില്‍ ചെറിയ അലമാരയും ഗ്യാസ് സ്റ്റൗവും ഗ്ലാസ്സുകളെല്ലുമുണ്ടായിരുന്നു. ഇവയെല്ലാം തകര്‍ന്നിട്ടുണ്ട്. ഏതാണ്ട് ഒരു ലക്ഷത്തിലേറേ രൂപയുടെ നഷ്ടമുണ്ടായിട്ടുള്ളതായി മണി പറയുന്നു. സംഭവത്തില്‍ കടുത്തുരുത്തി പോലീസിലും പിഡബ്യൂഡിയിലും പരാതി നല്‍കിയതായും അദേഹം പറഞ്ഞു.

Tags:

enlightmedia,malayalamnews,kerala,latestnews