വൈക്കം: ദേശീയ ചലച്ചിത്ര പുരസ്‌കാരം കലയുടെ നാടായ വൈക്കത്തിന് വീണ്ടും അഭിമാന നിമിഷം. വൈക്കം പുളിം ചുവട് ആഞ്ഞിലിക്കാവിൽ തരുൺമൂർത്തി സംവിധാനം ചെയ്ത സൗദി വെള്ളക്ക എന്ന സിനിമയ്ക്ക് ദേശീയ അവാർഡ് ലഭിച്ചത് വൈക്കം സത്യഗ്രഹത്തിൻ്റെ നൂറാം വാർഷികം ആഘോഷിക്കുന്ന വേളയിൽ മറ്റൊരു അഭിമാനത്തിൻ്റെ നിമിഷംകൂടിയാണ് സമ്മാനിച്ചത്. പ്രശസ്തരായ നിരവധി കലാകാരൻമാർക്ക് ജന്മം നൽകിയ വൈക്കത്തിന് തരുൺമൂർത്തിയിലൂടെ ലഭിച്ച ഈ പുരസ്‌കാരം മറ്റൊരു തിലകക്കുറിയായി.സൗദി വെള്ളയ്ക്കായിലെ പ്രധാന കഥാപാത്രമായ അയിഷ റാവുത്തറെ അവതരിപ്പിച്ച ദേവി വർമ, അയിഷ റാവുത്തർക്ക് ശബ്ദം നൽകിയ നടികൂടിയായ പൗളി വിത്സൻ, കഥാപാത്രങ്ങൾക്ക് വസ്ത്രാലങ്കാരം നടത്തിയ മഞ്ജുഷ രാധാകൃഷ്ണൻ എന്നിവർക്ക് 2022-ലെ സംസ്ഥാന അവാർഡുകൾ ലഭിച്ചിരുന്നു.

ഓപ്പറേഷൻ ജാവ ആണ് തരുൺ മൂർത്തി സംവിധാനം ചെയ്‌ത ആദ്യ ചിത്രം. രണ്ടാമത്തെ ചിത്രമായിരുന്നു സൗദി വെള്ളക്ക. കൊച്ചി തേവര പാലത്തിനടത്തുള്ള സൗദി എന്ന ചെറിയ സ്‌ഥലത്തെ തെങ്ങിൽനിന്ന് വീണ വെള്ളക്ക കുറേപ്പേരെ കോടതി കയറ്റുന്നതാണ് സിനിമയുടെ ഇതിവൃത്തം. കംമ്പ്യൂട്ടർ സയൻസിൽ എം.ടെക്. പൂർത്തിയാക്കിയ തരുൺ മൂർത്തി കിടങ്ങൂർ എൻജിനീയറിങ് കോളേജിൽ അധ്യാപകനായിരുന്നു. ഹ്രസ്വചിത്രങ്ങൾ സംവിധാനം ചെയ്‌താണ് സിനിമ മേഖലയിൽ അദ്ദേഹം എത്തുന്നത്.

പരസ്യചിത്രങ്ങൾ നിർമിക്കാനായി സ്വന്തം കമ്പനിയും തുടങ്ങി. മോഹൻലാലിനെ നായകനാക്കി സംവിധാനം ചെയ്യുന്ന ചിത്രത്തിൻ്റെ എഡിറ്റിങ്ങിനിടെയാണ് അവാർഡ് വിവരം അറിയുന്നത്. അവാർഡിന് തൻ്റെ സിനിമ അയ്ച്ചിട്ടുണ്ടെന്ന് അറിഞ്ഞിരുന്നെങ്കിലും എവിടെയെങ്കിലും ഒരു പരാമർശം ഉണ്ടാകുമെന്നാണ് ധരിച്ചിരുന്നതെങ്കിലും ദേശീയ പുരസ്‌കാരം സൗദി വെള്ളയ്ക്ക എന്ന സിനിമയ്ക്കാണ് എന്നറിഞ്ഞപ്പോൾ ആദ്യം വിശ്വസിക്കാൻ ആയില്ലെന്നും സുഹൃത്തുക്കൾ വിളിച്ച് പറയുമ്പോഴാണ് അവാർഡ് ലഭിച്ചത് അറിഞ്ഞതെന്നും തരുൺ മൂർത്തി പ്രതികരിച്ചു.മുന്നോട്ടുള്ള പ്രയാണത്തിന് ഈ അവാർഡ് വലിയ പ്രചോദനമാണെന്നും തരുൺ മൂർത്തി പറഞ്ഞു.അവാർഡ് ലഭിച്ച വിവരം അറിഞ്ഞ ഉടൻ വൈക്കം ആഞ്ഞിലിക്കാവിൽ തറവാട്ടിലും ആഹ്ലാദം അണപൊട്ടി.ഷിപ്പിയാർ ഡിലെ മുൻ ഉദ്യോഗസ്ഥനും കലാകരനുമായിരുന്ന ഡി. മൂർത്തി (മധു) അമ്മ വിനു മറ്റ് ബന്ധുക്കളും വാർത്ത അറിഞ്ഞത് മുതൽ ഇത് അറിഞ്ഞ് എത്തിയവർക്ക് മധുരം നൽകിയാണ് സന്തോഷം പങ്കിട്ടത്. ഭാര്യ - രേവതി റോയി മക്കളായ ഇസയ്, ഇമയ് എന്നിവർ തരുണിന് എല്ലാത്തിനും പിന്തുണയുമായി ഒപ്പമുണ്ട്.