കേരള സ്റ്റേറ്റ് എക്സ് സർവീസസ് ലീഗ് കടുത്തുരുത്തി യൂണിറ്റ് 15-ാമത് വാർഷികവും കുടുംബ സംഗമവും സംഘടിപ്പിച്ചു

Kerala State X Services League Kaduthuruthy Unit organized 15th Anniversary and Family Meeting

കടുത്തുരുത്തി: രാജ്യത്തിനായി ജീവൻ നൽകിയും ത്യാഗങ്ങൾ സഹിച്ചും സേവനം അനുഷ്ഠിച്ച വിമുക്തഭടന്മാരുടെയും അവരുടെ കുടുംബങ്ങളുടെയും ഒത്തുചേരൽ പ്രൗഢഗംഭീരമാക്കി

കേരള സ്റ്റേറ്റ് എക്സ് സർവീസസ് ലീഗ് (KSESL) കടുത്തുരുത്തി യൂണിറ്റിന്റെ നേതൃത്വത്തിൽ നടന്ന 15-ാമത് വാർഷികവും കുടുംബ സംഗമവും കടുത്തുരുത്തി വിമുക്ത ഭട ഭവനിൽ വെച്ചാണ് ആഘോഷിച്ചത്.

ഗാന്ധിജയന്തി ദിനത്തിന്റെ സ്മരണകളുണർത്തിയ ചടങ്ങ് കെ.എസ്.ഇ.എസ്.എൽ പ്രസിഡന്റ് സാബു ജോസഫിന്റെ അധ്യക്ഷതയിലാണ് ചേർന്നത്. ജലവിഭവ - ഭവന നിർമ്മാണ വകുപ്പ് മന്ത്രി അഡ്വ. മോൻസ് ജോസഫ് ചടങ്ങ് ഔദ്യോഗികമായി ഉദ്ഘാടനം ചെയ്തു.

രാജ്യത്തിന് സേവനം നൽകിയ പട്ടാളക്കാരുടെയും അവരുടെ കുടുംബങ്ങളുടെയും ഉന്നമനം ലക്ഷ്യമാക്കി വിവിധ പദ്ധതികൾ നടപ്പിലാക്കുമെന്നും, അടുത്ത ഒരു വർഷത്തിനുള്ളിൽ കടുത്തുരുത്തിയിൽ ഒരു 'വാർ മെമ്മോറിയൽ (War Memorial) നിർമ്മിക്കുമെന്നും മന്ത്രി തന്റെ ഉദ്ഘാടന പ്രസംഗത്തിൽ പ്രഖ്യാപിച്ചു. ഇത് വിമുക്തഭടന്മാർക്കും കുടുംബങ്ങൾക്കും വലിയൊരു അംഗീകാരമായി മാറും.

ചടങ്ങിൽ കോട്ടയം ജില്ല രക്ഷാധികാരി റിട്ട. ബ്രിഗേഡിയർ എം.ഡി. ചാക്കോ മുഖ്യപ്രഭാഷണം നടത്തി. വിക്രമൻ സി.കെ. സ്വാഗതം ആശംസിച്ച യോഗത്തിൽ ടി.വി. വർക്കി, അന്നമ്മ സിറിയക് എന്നിവർ വാർഷിക റിപ്പോർട്ടും കണക്കുകളും അവതരിപ്പിച്ചു. കടുത്തുരുത്തി ഗ്രാമപഞ്ചായത്ത് പ്രസിഡന്റ് അഡ്വ. റോയ് ജോർജ് വെട്ടിക്കത്തടം ചടങ്ങിന് ഗാന്ധി ദിന സന്ദേശം നൽകി.

ലെഫ്റ്റനന്റ് കേണൽ കെ.എം.ജി. നായർ, ടി.ജെ. നൊബർട്ട്, വാർഡ് മെമ്പർ രമ്യ മോൾ അജിത്, ലളിത എം. നായർ (സംസ്ഥാന പ്രസിഡന്റ്, KSESL മഹിളാവിംഗ്), തോമസ് മാത്യു എം., കെ.ഡി. സോമൻ, വി.എസ്. ജോസഫ്, ജെയിംസ് മാത്യു, ജോളി ജോസഫ്, സണ്ണി ടി.ജെ. എന്നിവർ ചടങ്ങിൽ ആശംസകൾ നേർന്നു സംസാരിച്ചു.

വിമുക്തഭടന്മാരുടെയും കുടുംബാംഗങ്ങളുടെയും കലാപരിപാടികളും ഒത്തുചേരലിന് മാറ്റുകൂട്ടി. തുടർന്ന് ജോർജ്ജ് ടി.പി.യുടെ കൃതജ്ഞതയ്ക്കും ദേശീയഗാന ആലാപനത്തിനും ശേഷം പരിപാടികൾ വിജയകരമായി സമാപിച്ചു.