ചോറ്റാനിക്കരയിൽ 20 കാരിയെ അവശനിലയിൽ കണ്ടെത്തിയ സംഭവം; ആൺസുഹൃത്തിൻ്റെ അറസ്റ്റ് രേഖപ്പെടുത്തി.

വൈക്കം: ചോറ്റാനിക്കരയിൽ വീടിനുള്ളിൽ 20 കാരിയെ അവശ നിലയിൽ കണ്ടെത്തിയ സംഭവത്തിൽ പെൺ കുട്ടിയുടെ ആൺസുഹൃത്തിനെ പോലീസ് അറസ്റ്റ് ചെയ്തു.

തലയോലപ്പറമ്പ് മിഠായിക്കുന്നം

കുഴിപ്പുറത്ത് വീട്ടിൽ കെ.എം അനൂപ് (25)നെയാണ് ചോറ്റാനിക്കര പോലിസ് അറസ്റ്റ് ചെയ്തത്. സംഭവവുമായി ബന്ധപ്പെട്ട് ബുധനാഴ്ച പുലർച്ചെ ചോറ്റാനിക്കര പോലീസ് തലയോലപ്പറമ്പിലെ വീട്ടിൽ എത്തി

യുവാവിനെ കസ്റ്റഡിയിൽ എടുത്തിരുന്നു. വധശ്രമം ഉൾപ്പടെയുള്ള വകുപ്പുകൾ ചുമത്തിയാണ് പോലീസ് കേസ് എടുത്തിരിക്കുന്നത്. ശനിയാഴ്ച‌ രാത്രി 11 മണിയോടെ പെൺകുട്ടിയുടെ വീട്ടിലെത്തിയ പ്രതി ഞായറാഴ്ച രാവിലെ വരെ പെൺകുട്ടിയെ ക്രൂരമായി മർദ്ദിക്കുകയായിരുന്നു. ഈ സമയം പെൺകുട്ടി വീട്ടിൽ ഒറ്റയ്ക്ക് ആണെന്ന് അറിഞ്ഞാണ് എത്തിയതെന്നും മരിച്ചെന്നു കരുതിയാണ് സ്ഥലം വിട്ടതെന്നും യുവാവ് പോലീസിന് നൽകിയ മൊഴിയിൽ പറയുന്നു. നിലവിൽ പെൺകുട്ടി എറണാകുളത്തെ സ്വകാര്യ ആശുപത്രിയിൽ ഐസിയുവിൽ ചികിത്സയിൽ തുടരുകയാണ്. ലഹരി കേസിലെ പ്രതിയാണ് പിടിയിലായ യുവാവ്. പീരുമേട് സ്റ്റേഷനിൽ ഇയാൾക്കെതിരെ കഞ്ചാവ് കേസുണ്ട്. തലയോലപ്പറമ്പ് പോലീസ് സ്റ്റേഷനിൽ റജിസ്റ്റർ ചെയ്ത രണ്ട് ആക്രമണ കേസുകളിലും പ്രതിയാണ് ഇയാൾ. വൈക്കം, കടുത്തുരുത്തി സ്റ്റേഷനുകളിലും ഇയാൾക്കെതിരെ കേസ്സുണ്ട്. ഒരു വർഷം മുമ്പ് ഇൻസ്റ്റാഗ്രാം വഴിയാണ് യുവാവ് പെൺകുട്ടിയുമായി പരിചയപ്പെട്ടത്.

ക്രൂരമർദ്ദനത്തിനു ശേഷം മരിച്ചെന്നു കരുതി സ്ഥലം വിട്ടെന്ന് ഇയാൾ പോലീസിന് മൊഴി നൽകിയിട്ടുണ്ട്. ഇയാളെ പോലിസ് വിശദമായി ചോദ്യം ചെയ്തോടെയാണ് കൂടുതൽ വിവരങ്ങൾ ലഭിച്ചത്. ഞായറാഴ്ച ഉച്ചയോടെയാണ് അടുത്ത ബന്ധു യുവതിയെ ഗുരുതരാവസ്ഥയിൽ കണ്ടെത്തുന്നത്. മാതാവ് ഒരു വിവാഹ ചടങ്ങിനു പോയതിനാൽ യുവതി മാത്രമേ വീട്ടിൽ ഉണ്ടായിരുന്നുള്ളൂ. കഴുത്തിൽ കയർ മുറുകി ഗുരുതരമായി പരുക്കേറ്റ് കയ്യിലും തലയിലും പരുക്കുകളോടെ അർധനഗ്ന‌യായയാണ് യുവതി കിടന്നിരുന്നത്. തുടർന്ന് ചോറ്റാനിക്കര പോലീസും ബന്ധുക്കളും മറ്റും ചേർന്ന് തൃപ്പൂണിത്തുറ ഗവൺമെൻ്റ് ആശുപത്രിയിലും തുടർന്ന് എറണാകുളം ജനറൽ ആശുപത്രിയിലും എത്തിച്ചെങ്കിലും ആരോഗ്യനില ഗുരുതരമായതോടെ പിന്നീട് സ്വകാര്യ ആശുപത്രിയിലേക്ക് മാറ്റുകയായിരുന്നു. യുവാവ് ശനിയാഴ്ച രാത്രി തന്നെ യുവതിയുടെ വീട്ടിൽ എത്തിയിരുന്നുവെന്നും ഞായറാഴ്ച പുലർച്ചെയാണ് ഇവിടെ നിന്നും പോയതെന്നുമുള്ള സിസിടിവി ദൃശ്യങ്ങൾ അടക്കം പോലീസിന് ലഭിച്ചതോടെയാണ് ഇയാളെ തലയോലപ്പറമ്പിൽ നിന്നും കസ്റ്റഡിയിൽ എടുത്തത്. പോക്സോ അതിജീവിതയാണ് പെൺകുട്ടി.

പെണ്‍കുട്ടി ഇപ്പോഴും അബോധാവസ്ഥയിലായതിനാല്‍ പോലീസിന് ഇതുവരെ മൊഴിയെടുക്കാനായിട്ടില്ല.