തലയോലപ്പറമ്പ് സെന്റ് ജോര്‍ജ് പള്ളി കുത്തിത്തുറന്നു കവര്‍ച്ച, രണ്ടു ലക്ഷം രൂപ മോഷണം പോയി; നഷ്ടപ്പെട്ടതു പാരിഷ് ഹാളിന്റെയും മുറികളുടെയും വാടക ഇനത്തില്‍ കിട്ടിയ തുക

10 Feb 2025 15:30 IST

Share News :

വൈക്കം: തലയോലപ്പറമ്പ് സെന്റ് ജോര്‍ജ് പള്ളി കുത്തിത്തുറന്നു കവര്‍ച്ച. രണ്ടു ലക്ഷം രൂപ കവര്‍ന്നു. പള്ളിയിലെ ഓഫീസ് മുറി കുത്തിത്തുറന്നാണു കവര്‍ച്ച നടത്തിയത്. തിങ്കളാഴ്ച പുലര്‍ച്ചെ 12.30 നും രണ്ടിനും മധ്യേയാണു മോഷണം നടന്നതെന്നാണു പള്ളിയിലെ സി.സി.ടിവി ദൃശ്യങ്ങളില്‍ നിന്നും വ്യക്തമാകുന്നതെന്നു പോലീസ് പറഞ്ഞു.

പള്ളിയില്‍ എത്തിയ മോഷ്ടാക്കള്‍ കൈക്കാരന്മാരുടെ മുറിയുടെ താഴ് തകര്‍ത്ത് അകത്തു കടന്നു. തുടര്‍ന്ന് മുറിയില്‍ ഉണ്ടായിരുന്ന അലമാരയുടെ ലോക്കര്‍ കുത്തിത്തുറന്ന് രണ്ടു ലക്ഷത്തോളം രൂപ കവരുകയായിരുന്നു. മുറിക്കുള്ളിലെ മേശയുടെ വലിപ്പും മറ്റും തുറന്നു നിലത്തു വാരിവലിച്ചിട്ട നിലയിലാണ്. പള്ളിയിലെയും പള്ളിക്കവല ജങ്ഷനു സമീപത്തെയടക്കം നേര്‍ച്ച കുറ്റികളുടെ പൂട്ടു തകര്‍ത്തു മോഷണം നടത്താന്‍ ശ്രമിച്ചെങ്കിലും വിഫലമായി.

ഇന്നു രാവിലെ ഇടവക വികാരി എത്തിയപ്പോള്‍ കൈക്കാരന്മാരുടെ മുറിയുടെ വാതില്‍ തുറന്നു കിടക്കുന്നതു കണ്ടു നോക്കിയപ്പോഴാണു മോഷണവിവരം അറിയുന്നത്. പാരിഷ് ഹാളിന്റെയും മുറികളുടെയും വാടക ഇനത്തില്‍ കിട്ടിയ രണ്ടു ലക്ഷത്തോളം രൂപയാണ് അപഹരിക്കപ്പെട്ടതെന്ന്. തലയോലപ്പറമ്പ് പോലീസ് സ്ഥലത്തെത്തി അന്വേഷണം ആരംഭിച്ചു.