കുറുവാ സംഘം എത്തിയതായി സംശയം

പറവൂർ: ആലപ്പുഴ ജില്ലയിലെത്തിയ കുറുവാ സംഘം മോഷ്‌ടാക്കൾ പറവൂരിലും കവർച്ചക്കായി എത്തിയെന്നു സംശയം. കഴിഞ്ഞ പുലർച്ച ഒന്നിനും മുന്നിനും ഇടയിലാണ് ഇവർ ചേന്ദമംഗലത്തെ കരിമ്പാടം, കുമാരമംഗലം പ്രദേശങ്ങളിൽ എത്തിയെന്നു പറയപ്പെടുന്നത്. കരിമ്പാടത്തെ ഒരു വീട്ടുകാർ വാതിലിൽ ശക്ത്‌തിയായി അടിക്കുന്ന ശബ്ദം കേട്ട് ഉണർന്ന് ലൈറ്റ് ഇട്ടതോടെ മോഷ്‌ടാക്കൾ രക്ഷപ്പെട്ടു. പിന്നിലെ വാതിൽ തുറക്കാൻ ശ്രമിച്ച മോഷ്ടാക്കൾ താഴത്തെ കുറ്റി ഇളക്കുകയും ചെയ്‌തു. രണ്ട് പേർ വീതമുള്ള സംഘമാണ് എത്തിയത്. ഒരേ ആളുകൾ തന്നെയാണോയെന്ന് ക്യാമറ ദൃശ്യത്തിൽ വ്യക്‌തമല്ല. മുഖംമൂടി ധരിച്ചു കയ്യിൽ ആയുധങ്ങളുമായി എത്തി വീടുകളുടെ പിന്നിലെ വാതിലുകൾ തുറക്കാനാണ് ശ്രമിച്ചത്. ഒരിടത്തു നിന്നും സാധനങ്ങൾ മോഷണം പോയിട്ടില്ല. ഒരു വീട്ടിൽ കമ്പിപ്പാര ഉപേക്ഷിച്ചിട്ടുണ്ട്. മൂന്ന് വീടുകളിൽ മോഷ്‌ടാക്കൾ എത്തിയെന്നാണ് പൊലീസ് പറയുന്നതെങ്കിലും പത്തോളം വീടുകളിൽ വന്നിട്ടുണ്ടെന്നാണ് നാട്ടുകാർ നൽകുന്ന വിവരം. സിസിടിവി ദൃശ്യങ്ങൾ ലഭിച്ചതിനാൽ വടക്കേക്കര പൊലീസ് അന്വേഷണം ആരംഭിച്ചു. കുറുവാ സംഘങ്ങൾ അക്രമകാരികളായതിനാൽ പറവൂർ മേഖലയിലെ വീടുകളിൽ എത്തിയത് കുറുവാ സംഘം തന്നെയാണെന്ന് ഉറപ്പിക്കാൻ കഴിഞ്ഞിട്ടില്ലെന്നും പട്രോളിങ് ശക്തമാക്കിയിട്ടുണ്ടെന്നും പൊലീസ് പറഞ്ഞു.