നിലമ്പൂർ ഗോത്ര മേഖലയിലെ ജനങ്ങൾ നേരിടുന്ന വിവിധ പ്രശ്നങ്ങൾക്ക് അടിയന്തര പരിഹാരം കാണുന്നതിനായി പ്രിയങ്ക ഗാന്ധി എം.പി.യുടെ നേതൃത്വത്തിൽ യോഗം ചേർന്നു

29 Jun 2026 11:03 IST

Share News :

Priyanka Gandhi holds meeting under the chairmanship of MP to find urgent solutions to various problems faced by the people of Nilambur tribal area

നിലമ്പൂർ : നിലമ്പൂർ ഗോത്ര മേഖലയിലെ ജനങ്ങൾ നേരിടുന്ന വിവിധ പ്രശ്നങ്ങൾക്ക് അടിയന്തര പരിഹാരം കാണുന്നതിനായി പ്രിയങ്ക ഗാന്ധി എം.പി.യുടെ നേതൃത്വത്തിൽ ഉദ്യോഗസ്ഥരുടെയും ആദിവാസി പ്രതിനിധികളുടെയും പ്രത്യേക അവലോകന യോഗം ചേർന്നു. നിലമ്പൂർ കെ.ടി.ഡി.സി. താമരിൻഡ് ഹോട്ടലിൽ വെച്ചായിരുന്നു യോഗം.

നിലമ്പൂർ കാടുകളിലെ ചോലനായ്ക്കർ കോളനികളിൽ എം.പി. മുൻപ് നടത്തിയ സന്ദർശന വേളയിൽ ഉന്നയിക്കപ്പെട്ട പ്രായോഗിക ബുദ്ധിമുട്ടുകൾക്ക് കൃത്യമായ പരിഹാരം കാണുക എന്നതായിരുന്നു യോഗത്തിൻ്റെ പ്രധാന ലക്ഷ്യം.

വനാവകാശ നിയമപ്രകാരം അർഹതപ്പെട്ട ഭൂമി അനുവദിക്കുന്നതുമായി ബന്ധപ്പെട്ട ഫയലുകളുടെ നിലവിലെ സ്ഥിതി വിലയിരുത്തി. ഊരുകളിലെ റേഷൻ വിതരണം, മികച്ച ആരോഗ്യ പരിരക്ഷ, തടസ്സമില്ലാത്ത ഗതാഗത സൗകര്യങ്ങൾ എന്നിവ ഉറപ്പാക്കുന്നതിനെക്കുറിച്ച് വിശദമായി ചർച്ച ചെയ്തു.

ഗോത്രവിഭാഗക്കാരുടെ ന്യായമായ ആവശ്യങ്ങൾ സമയബന്ധിതമായി പരിഹരിക്കാൻ ബന്ധപ്പെട്ട എല്ലാ വകുപ്പുകൾക്കും യോഗത്തിൽ നിർദ്ദേശം നൽകി.

റവന്യു വകുപ്പ് മന്ത്രി എ.പി. അനിൽ കുമാർ, ആര്യാടൻ ഷൗക്കത്ത് എം.എൽ.എ, മലപ്പുറം ജില്ലാ കളക്ടർ ഡോ. വിനയ് ഗോയൽ, സബ് കളക്ടർ സാക്ഷി മോഹൻ എന്നിവരും പട്ടികവർഗ്ഗ വികസന വകുപ്പ്, വനം വകുപ്പ്, പോലീസ്, ആരോഗ്യം, സിവിൽ സപ്ലൈസ് എന്നീ വകുപ്പുകളിലെ ഉന്നത ഉദ്യോഗസ്ഥരും ആദിവാസി പ്രതിനിധികളും യോഗത്തിൽ പങ്കെടുത്തു.