പാമ്പാടിയിൽ ചെങ്കൊടി ഉയർന്നു; സിപിഐഎം കോട്ടയം ജില്ലാ സമ്മേളനത്തിന് പ്രൗഢോജ്വല തുടക്കം

കോട്ടയം: സിപിഐഎം കോട്ടയം ജില്ലാ സമ്മേളനത്തിന്‌ കോട്ടയം പാമ്പാടിയിൽ ചെങ്കൊടി ഉയർന്നു. പാമ്പാടി നഗരത്തെ ആവേശചെങ്കടലാക്കിയായിരുന്നു പതാക, കൊടിമര, ബാനർ ജാഥകൾ പാമ്പാടിയിൽ സംഗമിച്ചത്‌. തുടർന്നാണ് പൊതുസമ്മേളനനഗരിയിൽ പതാക ഉയർത്തിയത്‌. പതാകയും കൊടിമരവും ബാനറും സ്വാഗതസംഘം ചെയർമാൻ കെ എം രാധാകൃഷ്ണൻ, സെക്രട്ടറി സുഭാഷ് പി വർഗീസ് എന്നിവർ ചേർന്ന് ഏറ്റുവാങ്ങി. സ്വാഗതസംഘം ചെയർമാൻ കെ എം രാധാകൃഷ്‌ണൻ പൊതുസമ്മേളന നഗറിൽ പതാക ഉയർത്തി. മന്ത്രി വി എൻ വാസവൻ, സിപിഐഎം ജില്ലാ സെക്രട്ടറി എ വി റസൽ, സംസ്ഥാന കമ്മറ്റിയംഗം അഡ്വ. കെ അനിൽകുമാർ, ദേശാഭിമാനി ജനറൽ മാനേജർ കെ ജെ തോമസ്, ജില്ലാ സെക്രട്ടറിയറ്റംഗങ്ങളായ ലാലിച്ചൻ ജോർജ്, സി ജെ ജോസഫ്, അഡ്വ. റജി സഖറിയ, ടി ആർ രഘുനാഥൻ, കൃഷ്ണകുമാരി രാജശേഖരൻ എന്നിവർ പങ്കെടുത്തു.

ബസ് സ്റ്റാൻഡ് മൈതാനത്ത് നടന്ന ചടങ്ങിൽ മുതിർന്ന സിപിഐഎം പ്രവർത്തകരെ ആദരിച്ചു. ചടങ്ങ്‌ മന്ത്രി വി എൻ വാസവൻ ഉദ്‌ഘാടനം ചെയ്‌തു. ജില്ലാ സെക്രട്ടറി എ വി റസൽ അധ്യക്ഷത വഹിച്ചു. സമ്മേളനത്തോടനുബന്ധിച്ച്‌ നടത്തിയ വിവിധ മത്സരങ്ങളിലെ വിജയികൾക്ക്‌ സമ്മാനങ്ങൾ നൽകി. പുതുപ്പള്ളി ഏരിയ ആദ്യമായാണ് ജില്ലാ സമ്മേളനതിന് വേദിയാകുന്നത്.

വടയാർ തങ്കപ്പൻ സ്‌മൃതിമണ്ഡപത്തിൽനിന്ന്‌ കെ ശെൽവരാജ്‌ ക്യാപ്‌റ്റനായ പതാകജാഥ അഡ്വ. പി കെ ഹരികുമാറും കെ പി രമണൻ സ്‌മൃതിമണ്ഡപത്തിൽനിന്ന്‌ കെ സി ജോസഫ്‌ ക്യാപ്‌റ്റനായ പതാകജാഥ കൃഷ്‌ണകുമാരി രാജശേഖരനും ഈരാറ്റുപേട്ടയിൽ കെ എം അലിയാർ സ്മൃതിമണ്ഡപത്തിൽ നിന്ന്‌ ജോയി ജോർജ്‌ ക്യാപ്‌റ്റനായ കൊടിമരജാഥ ലാലിച്ചൻ ജോർജും ഉദ്ഘാടനം ചെയ്തു. അലിയാരുടെ മകൻ ഹബീബ് അലിയാരിൽ നിന്ന് ഏറ്റുവാങ്ങി.

മുണ്ടക്കയത്ത് വി കെ രാജപ്പൻ സ്മൃതിമണ്ഡപത്തിൽ നിന്ന് കെ രാജേഷ്‌ ക്യാപ്‌റ്റനായ കൊടിമരജാഥ ടി ആർ രഘുനാഥനും മീനടം അവറാമി സ്‌മൃതിമണ്ഡപത്തിൽനിന്ന്‌ സുഭാഷ്‌ പി വർഗീസ്‌ ക്യാപ്‌റ്റനായ ബാനർജാഥ അഡ്വ. റെജി സഖറിയയും പള്ളിക്കത്തോട്‌ ഇളംപള്ളി വിശ്വംഭരൻ സ്‌മൃതിമണ്ഡപത്തിൽനിന്ന്‌ ഗിരീഷ്‌ എസ്‌ നായർ ക്യാപ്‌റ്റനായ ബാനർജാഥ കെ എം രാധാകൃഷ്‌ണനും ഉദ്‌ഘാടനംചെയ്‌തു.

ജില്ലാ സമ്മേളനത്തിന്റെ പ്രതിനിധി സമ്മേളനം വെള്ളിയാഴ്‌ച ആരംഭിക്കും. പാമ്പാടി കത്തീഡ്രൽ ഓഡിറ്റോറിയത്തിൽ (സ. കോടിയേരി ബാലകൃഷ്‌ണൻ നഗർ) ആരംഭിക്കുന്ന പ്രതിനിധി സമ്മേളനം വെള്ളി രാവിലെ 9.30ന്‌ സംസ്ഥാന സെക്രട്ടറി എം വി ഗോവിന്ദൻ ഉദ്‌ഘാടനം ചെയ്യും. പ്രതിനിധി സമ്മേളന നഗറിലേക്കുള്ള ദീപശിഖ ജാഥ രാവിലെ ഏഴിന്‌ നീണ്ടൂർ രക്തസാക്ഷിമണ്ഡപത്തിൽനിന്ന്‌ ആരംഭിക്കും. കെ എൻ വേണുഗോപാൽ ക്യാപ്‌റ്റനാകുന്ന ജാഥ അഡ്വ. കെ അനിൽകുമാർ ഉദ്‌ഘാടനം ചെയ്യും. കലാസാഹിത്യ കായിക മത്സരങ്ങൾ, സാംസ്‌കാരിക സമ്മേളനങ്ങൾ, യുവജന, വിദ്യാർഥി, മഹിളാ സംഗമങ്ങൾ എന്നിങ്ങനെ എണ്ണമറ്റ അനുബന്ധ പരിപാടികൾ പൂർത്തിയാക്കിയാണ്‌ പ്രതിനിധി സമ്മേളനത്തിലേക്ക്‌ കടക്കുന്നത്‌.

വെള്ളിയാഴ്ച വൈകിട്ട് അഞ്ചിന് നടക്കുന്ന സാംസ്കാരിക സംഗമം സുനിൽ പി ഇളയിടം ഉദ്ഘാടനം ചെയ്യും.

ശനിയാഴ്ചയും ഞായറാഴ്ചറും പ്രതിനിധി സമ്മേളനം തുടരും. ഞായറാഴ്ച പകൽ മൂന്നിന്‌ പാമ്പാടിയിൽ ചുവപ്പുസേനാ മാർച്ചും റാലിയും നടക്കും. വൈകിട്ട്‌ നാലിന്‌ സീതാറാം യെച്ചൂരി നഗറിൽ (പാമ്പാടി കമ്യൂണിറ്റി ഹാൾ മൈതാനം) നടക്കുന്ന പൊതുസമ്മേളനം പൊളിറ്റ്‌ ബ്യൂറോ അംഗം പിണറായി വിജയൻ ഉദ്‌ഘാടനംചെയ്യും.