UDF should ensure victory in by-elections: KMCC Qatar

ദോഹ: വയനാട് ലോക്സഭാ മണ്ഡലം, പാലക്കാട്, ചേലക്കര നിയമസഭാമണ്ഡലം എന്നിവിടങ്ങളിൽ നടക്കുന്ന ഉപതിരഞ്ഞെടുപ്പുകളിൽ യു.ഡി.എഫിന്റെ വിജയം ഉറപ്പ് വരുത്താൻ കെ.എം.സി.സി. പ്രവർത്തകർ രംഗത്തിറങ്ങണമെന്ന് കെ.എം.സി.സി. ഖത്തർ സംസ്ഥാന കമ്മറ്റി സംഘടിപ്പിച്ച കൺവെൻഷൻ ആഹ്വാനം ചെയ്തു. വയനാട് ലോക്സഭാ തെരഞ്ഞെടുപ്പിൽ പ്രിയങ്കാ ഗാന്ധി സ്ഥാനാർത്ഥിയായി മത്സരിക്കുന്നത് കൊണ്ട് തന്നെ രാജ്യം മുഴുവൻ ഉറ്റുനോക്കുന്ന ഒരു തെരഞ്ഞെടുപ്പാണിത്. കഴിഞ്ഞ പൊതു തെരഞ്ഞെടുപ്പിൽ കോൺഗ്രസ്സിന്റെ നേതൃത്വത്തിലുള്ള ഇന്ത്യ മുന്നണി ശക്തമായ തിരിച്ചുവരവ് നടത്തിയതോടെ രാജ്യം മുഴുവനും ഫാസിസ്റ്റ് വിരുദ്ധ പോരാട്ടത്തിന്റെ വരവറിയിച്ച് കഴിഞ്ഞു. പ്രിയങ്കാ ഗാന്ധിയുടെ വരവോടെ ഈ മുന്നേറ്റത്തിന് കരുത്തേകുമെന്ന് കൺവെൻഷനിൽ മുഖ്യപ്രഭാഷണം നടത്തിയ മുസ്‌ലിം ലീഗ് കോഴിക്കോട് ജില്ല ജനറൽ സെക്രട്ടറി ടി.ടി ഇസ്മായിൽ അഭിപ്രായപ്പെട്ടു.

കെ.എം.സി.സി. ഖത്തർ സംസ്ഥാന പ്രസിഡന്റ് ഡോ. അബ്ദുൽ സമദ് അദ്ധ്യക്ഷത വഹിച്ച കൺവെൻഷൻ ഉപദേശക സമിതി വൈസ് ചെയർമാൻ എസ്.എ.എം. ബഷീർ ഉദ്ഘാടനം ചെയ്തു. മുസ്‌ലിം ലീഗ് കോഴിക്കോട് ജില്ലാ ട്രഷറർ സൂപ്പി നരിക്കാട്ടേരി ആശംസകൾ നേർന്നു.

കോറോത്ത് മുഹമ്മദ്‌ മൗലവി ഖിറാഅത്ത് നടത്തി. സംസ്ഥാന ഭാരവാഹികളായ കെ.മുഹമ്മദ് ഈസ, അൻവർ ബാബു, ബഷീർ ടി.ടി.കെ, അബൂബക്കർ പുതുക്കുടി, ആദം കുഞ്ഞി, സിദ്ധീഖ് വാഴക്കാട്, അജ്മൽ നബീൽ ,അഷ്‌റഫ് ആറളം, അലി മൊറയൂർ, താഹിർ തഹക്കുട്ടി ,വി ടി എം സാദിഖ്, ഫൈസൽ മാസ്റ്റർ, സമീർ മുഹമ്മദ്, ശംസുദ്ധീൻ വാണിമേൽ എന്നിവർ നേതൃത്വം നൽകി. വിവിധ ജില്ലാ, ഏരിയ, മണ്ഡലം, പഞ്ചായത്ത് ഭാരവാഹികൾ, കൗൺസിലർമാർ നേതാക്കളും സംബന്ധിച്ചു. സംസ്ഥാന ജനറൽ സെക്രട്ടറി സലീം നാലകത്ത് സ്വാഗതവും, ട്രഷറർ പി.എസ്.എം. ഹുസൈൻ നന്ദിയും പറഞ്ഞു.