Thayolaparamba Pothi flagged off the festival at Thrikkaraikulam Mahadeva Temple; it will conclude on the 18th.

തലയോലപ്പറമ്പ്: പൊതി തൃക്കരായിക്കുളം മഹാദേവ ക്ഷേത്രത്തിലെ കൊടിയേറ്റും ഇതിനോടനുബന്ധിച്ച് നടന്ന സഹസ്രകലശവും ഭക്തിനിർഭരമായ ചടങ്ങുകളോടെ നടന്നു. വ്യാഴാഴ്ച വൈകിട്ട് 7.30 ന് തന്ത്രി മനയത്താറ്റില്ലത്ത് ചന്ദ്രശേഖരൻ നമ്പൂതിരിയുടെ സാന്നിദ്ധ്യത്തിൽ മനയത്താറ്റ് മന കണ്ണൻ നമ്പൂതിരി ക്ഷേത്രം മേൽശാന്തി കുന്നപള്ളി നാരായണൻ ഭട്ടതിരി എന്നിവർ കൊടിയേറ്റിന് മുഖ്യ കാർമികത്വം വഹിച്ചു. കൊടിയേറ്റും കലശവും ദർശനം നടത്തുവാൻ നൂറ് കണക്കിന് ഭക്തരും ക്ഷേത്രത്തിലെത്തിയിരുന്നു.

ക്ഷേത്ര പുനരുദ്ധാരണ സമിതി പ്രസിഡൻ്റ് പി.വി സുരേന്ദ്രൻ, സെക്രട്ടറി എസ്.എൻ സുരേഷ് സംക്രമത്ത്, ദേവസ്വം ഭരണസമിതി അംഗം ജി.എസ് വേണുഗോപാൽ, ട്രഷറർ എം.എൻ രമേശൻ സമിതി അംഗങ്ങൾ തുടങ്ങിയവർ ചടങ്ങുകൾക്ക് നേതൃത്വം നൽകി.18 ന് നടക്കുന്ന ആറാട്ടോടെ ഉൽസവം സമാപിക്കും. ക്ഷേത്രത്തിന്റെ നവീകരണ പ്രവർത്തനങ്ങളുടെ ഭാഗമായി രണ്ടു വർഷമായി ഉൽസവം നടന്നിരുന്നില്ല. ക്ഷേത്ര പുനരുദ്ധാരണ സമിതിയുടെ നേതൃത്വത്തിൽ നിർമാണം പൂർത്തിയാക്കി ബിംബപ്രതിഷ്ഠയും നവീകരണ കലശവും നടത്തിയ ശേഷമാണ് തിരുവുത്സവത്തിന് ഇത്തവണ കൊടിയേറ്റ് നടത്തുന്നത്. കൊടിയേറ്റ് ദിവസം ഉച്ചയ്ക്ക് നടന്ന പ്രസാദ ഊട്ടിലും വൈകിട്ട് നടന്ന കൊടിയേറ്റ് അത്താഴത്തിലും നിരവധി ഭക്തജനങ്ങൾ പങ്കെടുത്തു.