പി പി മൂസ്സ മാതൃകാ രാഷ്ട്രീയ പ്രവർത്തകൻ: വി എം സുധീരൻ

പുളിക്കൽ : പൊതുപ്രവർത്തനരംഗത്ത് നിൽക്കുന്നവർക്ക് മാതൃകയാക്കാവുന്ന രാഷ്ട്രീയ പ്രവർത്തകനാണ് പി പി മൂസ്സ എന്ന് മുൻ കെ പി സി സി പ്രസിഡന്റ് വി എം സുധീരൻ പറഞ്ഞു. ആറ് പതിറ്റാണ്ട് കാലത്തെ മികവുറ്റ രാഷ്ട്രീയ പ്രവർത്തനത്തിന് പി പി മൂസ്സയെ ജന്മനാടായ പുളിക്കൽ ആദരിക്കുന്ന പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സ്ഥാനമാനങ്ങളുടെ പിറകെ പോകാതെ തന്നിലർപ്പിച്ച ചുമതലകൾ ഉത്തരവാദിത്തത്തോടെ നിർവ്വഹിക്കുക എന്നതാണ് ഒരു പൊതുപ്രവർത്തകൻ്റെ കടമയെന്ന് അദ്ദേഹം സമൂഹത്തിന് കാണിച്ചു കൊടുത്തു. നേതൃത്വം പറയുന്നത് അക്ഷരം പ്രതി അനുസരിക്കുന്ന ഒരു കോൺഗ്രസുകാരനായിരുന്നു മൂസ്സ.രാഷ്ട്രീയക്കാരൻ എന്നതിലുപരി ഉത്തമനായ ഒരു സഹകാരി കൂടിയാണ് താൻ എന്ന് അദ്ദേഹം തെളിയിച്ചതാണ് എന്നും സുധീരൻ പറഞ്ഞു.പുളിക്കൽ മണ്ഡലം കോൺഗ്രസ് കമ്മിറ്റിയും രാജീവ് ഗാന്ധി എജ്യുക്കേഷണൽ ആൻ്റ് ചാരിറ്റബിൾ ട്രസ്റ്റും സംയുക്തമായിട്ടാണ് ആദരിക്കൽ ചടങ്ങ് സംഘടിപ്പിച്ചത്. എഴുത്തുകാരായ വഹീദ് സമാൻ, മജീദ് ബക്കർ എന്നിവർ കേട്ടെഴുതിയ പി.പി മൂസയുടെ ആത്മകഥയായ " എൻ്റെ ത്രിവർണ്ണ പാതകൾ" ആര്യാടൻ ഷൗക്കത്തിന് നൽകി സുധീരൻ പ്രകാശനം ചെയ്തു. പഞ്ചായത്തിലെ ഇരുപത്തഞ്ച് മുതിർന്ന കോൺഗ്രസ് പ്രവർത്തകരെ ചടങ്ങിൽ സുധീരൻ ആദരിച്ചു.

സംഘാടക സമിതി ചെയർമാൻ ടി ആലിഹാജി അധ്യക്ഷത വഹിച്ചു. എ പി അനിൽ കുമാർ എംഎൽ എ, ഡി സി സി പ്രസിഡൻ്റ് വി എസ് ജോയ്, കെ പി സി സി ജന. സെക്രട്ടറി ആര്യാടൻ ഷൗക്കത്ത്, അഖിലേന്ത്യ മഹിള കോൺഗ്രസ് ജനറൽ സെക്രട്ടറി അഡ്വ. ഫാത്തിമ റോഷ്ന, ഡിസിസി വൈസ് പ്രസിഡൻ്റ് വീക്ഷണം മുഹമ്മദ്, ഡി സി സി ജന. സെക്രട്ടറി അജീഷ് എടാളത്ത്, ഗാന്ധി ചെയർ ചെയർമാൻ ആർ എസ് പണിക്കർ, മുൻ കെ.പി.സി.സി. ജന. സെക്രട്ടറി വി എ കരീം, കൊണ്ടോട്ടി ബ്ലോക്ക് കോൺഗ്രസ് കമ്മിറ്റി പ്രസിഡന്റ് പി അഹമ്മദ് കബീർ,വാഴക്കാട് ബ്ലോക്ക് കോൺഗ്രസ് കമ്മിറ്റി പ്രസിഡന്റ് കെ.പി. മുജീബ് റഹ്‌മാൻ , പെരുവള്ളൂർ ബ്ലോക്ക് കോൺഗ്രസ് പ്രസിഡൻ്റ് ഗഫൂർ പള്ളിക്കൽ, യു.ഡി.എഫ് നിയോജക മണ്ഡലം ചെയർമാൻ കെ.കെ. ആലി ബാപ്പു, കൊണ്ടോട്ടി നഗരസഭാധ്യക്ഷ നിത ഷഹീർ,ജില്ലാ പഞ്ചായത്ത് സ്റ്റാൻ്റിംഗ് കമ്മിറ്റി ചെയർപേഴ്‌സൺ സെറീന ഹസീബ് ,ജില്ലാ പഞ്ചായത്തംഗങ്ങളായ പി.കെ.സി. അബ്ദുറഹിമാൻ, സുഭദ്ര ശിവദാസൻ, കെ എം എ റഹ്മാൻ, ടി വനജ ടീച്ചർ, കൊണ്ടോട്ടി മുനിസിപ്പൽ വൈസ് ചെയ്രമാർ അഷ്റഫ് മടാൻ, മുസ്ലീം ലീഗ് പുളിക്കൽ പഞ്ചായത്ത് പ്രസിഡൻ്റ് പി വി മുഹമ്മദലി,പുളിക്കൽ മണ്ഡലം പ്രസിഡന്റ് കെ.വി.സൈനുദ്ധീൻ എന്നിവർ പങ്കെടുത്തു.

സ്വാഗത സംഘം ജനറൽ കൺവീനർ എം പി അബ്ദുറഹ്മാൻ സ്വാഗതവും എം.സി. ശങ്കരൻ നന്ദിയും പറഞ്ഞു. ചടങ്ങിൽ പി.പി മൂസക്കുള്ള പ്രശംസാപത്രം സത്യൻ പുളിക്കൽ അവതരിപ്പിച്ചു.